ދިވެހިރާއްޖޭން ޔުނައިޓެޑް އަރަބް އެމިރޭޓްސް (ޔޫއޭއީ) އަށް ކަނޑައެޅުއްވި އައު ސަފީރު، ތޯރިގު އިބްރާހީމް، އެމަނިކުފާނުގެ ސަފީރުކަމުގެ ފަތްކޮޅު ޔޫއޭއީގެ ރައީސް އަދި އަބޫދާބީގެ ވެރިޔާ ހިޒް ހައިނެސް ޝައިހް މުހައްމަދު ބިން ޒާޔިދު އަލް ނަހްޔާނަށް މިއަދު އަރުވައިފިއެވެ.

މި ރަސްމިއްޔާތު ބާއްވަވާފައިވަނީ ޔޫއޭއީގެ ވެރިރަށް އަބޫދާބީގައި ހުންނަ ރިޔާސީ ގަނޑުވަރު، ގަސްރު އަލް ވަޠަންގައެވެ. މި ބައްދަލުކުރެއްވުމުގައި ޔޫއޭއީގެ ރައީސް ޝައިހް މުހައްމަދު ބިން ޒާޔިދު ވަނީ ސަފީރު ތޯރިޤު އިބްރާހީމަށް މަރުހަބާ ދަންނަވައި، އެމަނިކުފާނުގެ ސަފީރުކަމުގެ ދައުރު ފެށުމާ ގުޅިގެން ތަހުނިޔާ ވިދާޅުވެފައެވެ. އަދި ދިވެހިރާއްޖޭގެ ސަފީރުގެ މަސްއޫލިއްޔަތުތައް އަދާކުރެއްވުމުގައި ފުރިހަމަ ކާމިޔާބީއަށް އެދިވަޑައިގަންނަވާކަންވެސް ޔޫއޭއީގެ ރައީސް ހާމަކުރެއްވިއެވެ.

މި ރަސްމިއްޔާތުގައި ސަފީރު ތޯރިގު އިބްރާހީމް ވަނީ ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނަންފުޅުގައާއި، ދިވެހި ސަރުކާރާއި ރައްޔިތުންގެ ނަމުގައި ޔޫއޭއީގެ ރައީސްއަށާއި އެގައުމުގެ ސަރުކާރާއި ރައްޔިތުންނަށް ހެޔޮއެދުންތަކާއި އިހްލާސްތެރި ސަލާމް ރައްދުކުރައްވާފައެވެ.

މީގެއިތުރުން، އެމަނިކުފާނުގެ ސަފީރުކަމުގެ ދައުރުގެ ތެރޭގައި ދިވެހިރާއްޖެއާއި ޔޫއޭއީއާ ދެމެދު އޮތް ޒަމާންވީ ގާތް ގުޅުމާއި، ދެގައުމުގެ މެދުގައިވާ އެކި ދާއިރާތަކުގެ އެއްބާރުލުން އިތުރަށް ވަރުގަދަކޮށް ބަދަހިކުރުމަށް މިންނެތް މަސައްކަތްތަކެއް ކުރައްވާނެކަމުގެ ފުރިހަމަ ޔަގީންކަން ސަފީރު ދެއްވިއެވެ.

ދިވެހިރާއްޖެއާއި އަރަބި އެކުވެރި އެމިރޭޓްސްއާ ދެމެދު ރަސްމީކޮށް ސިޔާސީ ގުޅުން ގާއިމުކޮށްފައިވަނީ 15 މާރިޗު 1978 ގައެވެ. ސަފީރު ތޯރިގު އިބްރާހީމަކީ ދިވެހިރާއްޖޭން ޔޫއޭއީއަށް ކަނޑައެޅުއްވި 7 ވަނަ ސަފީރެވެ.