ޔުނައިޓެޑް އަރަބް އެމިރޭޓްސް (ޔޫއޭއީ) ގެ ފުޖައިރާގައި ހިނގި ނުރައްކާތެރި ޓްރެފިކް އެކްސިޑެންޓެއްގައި މަދުވެގެން 14 މީހުން މަރުވެ، އިތުރު 30 މީހުން ޒަހަމްވެއްޖެއެވެ. ޖުމްލަ 18 ކާރާއި ފަސް ލޮރީ (ޓްރަކް) ޖެހި ހިނގި މި އެކްސިޑެންޓާ ގުޅޭ ތަފުސީލު ހާމަކޮށްފައިވަނީ ޔޫއޭއީގެ ދާހިލީ ވުޒާރާއިންނެވެ.
އެ ވުޒާރާއިން ބުރާސްފަތި ދުވަހު ބުނި ގޮތުގައި، މި ހާދިސާ ހިނގާފައިވަނީ ބުދަ ދުވަހުގެ ރޭ މެންދަމު 12 ޖަހަން ކައިރިވެފައި ވަނިކޮށް (ގްރީންވިޗް މާގަޑިން 20:00 ގައި)، ފުޖައިރާއަށް ވަންނަ ދޮރޯށި ކައިރީގައެވެ. މި އެކްސިޑެންޓް ހިނގަން މެދުވެރިވީ ޓްރަކެއްގެ ޑްރައިވަރަށް އުޅަނދު ކޮންޓްރޯލް ނުކުރެވި، އެހެން ޓްރަކެއްގައި ޖެހި، މަގުން ކަހާލައިގެން ގޮސް ޓްރެފިކް ބާރުބޮޑުވުމުގެ ސަބަބުން މަޑުކޮށްގެން ތިބި ގިނަ އަދަދެއްގެ އުޅަނދުތަކެއްގައި ޖެހިގެންނެވެ.
މި ހާދިސާގައި އެއް ޓްރަކުގައި އަލިފާން ރޯވެ، ކައިރީގައި ހުރި އިތުރު އެތައް އުޅަނދަކަށް އަލިފާންގަނޑު ފެތުރިގެން ދިޔަ ކަމަށް ވެސް ދާހިލީ ވުޒާރާއިން މައުލޫމާތު ދެއެވެ.
Advertisement
ކުއްލި ނުރައްކަލުގެ ހާލަތްތަކުގައި ހަރަކާތްތެރިވާ ހާއްސަ ޓީމުތަކުން މި ހާދިސާއާ ގުޅިގެން އަޅަންޖެހޭ ފިޔަވަޅުތައް އަޅަމުންދާ ކަމަށް އެ ވުޒާރާއިން 'އެކްސް' ގައި ކުރި ޕޯސްޓެއްގައި ބަޔާންކޮށްފައިވެއެވެ. އަދި ޒަހަމްވި މީހުންގެ ތެރެއިން ފަރުވާއަށް ފަހު 15 މީހަކު ހޮސްޕިޓަލުން ދޫކޮށްލާފައިވާއިރު، އަނެއް 15 މީހުންނަށް އަދިވެސް ދަނީ ހޮސްޕިޓަލުގައި ފަރުވާ ދެމުންނެވެ.
ފުލުހުން ބުނި ގޮތުގައި މި ހާދިސާގައި މަރުވި 14 މީހުންގެ ތެރޭގައި އެމިރޭޓްސްގެ ރައްޔިތުންނާއި ބޭރު ގައުމުތަކުގެ ބައެއް ރައްޔިތުން ހިމެނެއެވެ. އަދި މަރުވި މީހުންގެ ވަނަވަރު ކަށަވަރުކުރުމަށްޓަކައި ޑީއެންއޭ ޓެސްޓުތައް ހެދުމުގެ މަސައްކަތް ދަނީ ކުރަމުންނެވެ.
މީގެއިތުރުން، މި އެކްސިޑެންޓުގައި އަނިޔާވި މީހުންގެ ތެރޭގައި ޔޫއޭއީ، އޮމާން، އިންޑިއާ، ބްރެޒިލް، ޕާކިސްތާން، އުރުދުން އަދި މިސްރުގެ ރައްޔިތުން ހިމެނޭ ކަމަށް ދާޚިލީ ވުޒާރާއިން ވަނީ ކަށަވަރުކޮށްދީފައެވެ.
