މާލޭގެ ފިހާރައަކުން ގިނަ އަދަދެއްގެ ފައިސާއާއި ފޯނެއް ވަގަށް ނެގުމަށްފަހު ރާއްޖެއިން ފުރައިގެން ދާން މަސައްކަތްކުރި ސްރީލަންކާގެ ރައްޔިތެއް ކަމަށްވާ އުމުރުން 41 އަހަރުގެ ޗަންދްރެސްކަރަން އެންތޮނީ ފުލުހުން ހައްޔަރުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައިވާ ޗަންދްރެސްކަރަން އެންތޮނީ އަކީ ވައްކަން ކުރި ކަމަށް ބުނާ ފިހާރައިގައި ކުރިން މަސައްކަތް ކުރި މުވައްޒަފެއް ކަމުގައި ފުލުހުން ހާމަކުރިއެވެ. އޭނާގެ ބަންދާމެދު ގޮތެއް ނިންމުމަށް މި މަހުގެ 1 ވަނަ ދުވަހު ކްރިމިނަލް ކޯޓަށް ހާޒިރުކުރުމުން، ކޯޓުން ވަނީ އޭނާގެ ބަންދަށް 15 ދުވަހުގެ މުއްދަތެއް ދީފައެވެ. ކޯޓު އަމުރުގައިވާ ގޮތުން، އެ ފިހާރައިގެ އެ ދުވަހުގެ ވިޔަފާރި ފައިސާގެ ގޮތުގައި ލިބުނު 25،000 ރުފިޔާގެ އިތުރުން މޯބައިލް ފޯނެއްވެސް ވަނީ ވަގަށް ނަގައިފައެވެ.
އޭނާގެ މައްޗަށް ކުރެވޭ ތުހުމަތުތަކަށް ބާރުލިބޭ ގިނަ ހެކިތަކެއް ފުލުހުން ވަނީ ކޯޓަށް ހުށަހަޅާފައެވެ. އޭގެ ތެރޭގައި ތުހުމަތުކުރެވޭ މީހާ ފިހާރައިގެ ތެރޭގައި އުޅޭ މަންޒަރު ފެންނަ ސީސީޓީވީ ފުޓޭޖްތަކުގެ ސްނެޕްޝޮޓްތަކާއި، ހާދިސާގެ ރިޕޯޓުގެ އިތުރުން އޭނާ ރާއްޖެއިން ފުރުމަށް ތައްޔާރުކޮށްފައިވާ ފްލައިޓް ޓިކެޓް ހިމެނެއެވެ. އަދި ވީޑިއޯ ފުޓޭޖުން ފެންނަނީ އޭނާކަން އެ ފިހާރައިގައި މަސައްކަތްކުރާ އެހެން މުވައްޒަފުން ކަށަވަރުކޮށްދީފައިވާ ކަމަށްވެސް ކޯޓު އަމުރުގައި ބަޔާންކޮށްފައިވެއެވެ.
Advertisement
ނަމަވެސް، ކޯޓުގެ ޝަރީއަތުގެ މަޖިލީހުގައި އޭނާ ވަނީ މި ތުހުމަތުތަކަށް އިންކާރުކޮށް، ވައްކަމުގެ ހާދިސާ ހިނގުމުގެ 10 ދުވަސް ކުރިން އެ ފިހާރައިގެ ވަޒީފާއިން އޭނާ ވަކިވެފައިވާ ކަމަށާއި، ވައްކަން ކުރި ވަގުތު އޭނާ ހުރީ އެހެން ތަނެއްގައި ކަމަށް ބުނެފައިއެވެ.
ދިވެހި ފުލުހުންގެ ހިދުމަތުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
