ފަޅުރަށާއި ފަޅު ކުއްޔަށްދިނުމާބެހޭ ޤާނޫނަށް ގެނައި އިޞްލާޙާއެކު، ވަރުވާއަށް ދޫކުރާ ރަށްރަށުގެ ކުލީގެ ރޭޓުތައް ބޮޑުކޮށްފިއެވެ. 

ރައީސުލްޖުމްހޫރިއްޔާ ޑރ.މުޢިއްޒު މިއަދު ތަޞްދީޤުކުރެއްވި "ފަޅުރަށާއި ފަޅު ކުއްޔަށްދިނުމާބެހޭ ގާނޫނު"ގެ ދަށުން، ވަރުވާއަށް ރަށްރަށް ދޫކުރުމުގެ އުސޫލުތަކަށާއި ވަރުވާގެ ވާރު ނަގާ މިންވަރަށް ބޮޑެތި ބަދަލުތަކެއް ވަނީ ގެނެސްފައެވެ. އެގޮތުން، މީގެ ކުރިން 1980 ވަނަ އަހަރުން ފެށިގެން އަމަލުކުރަމުން އައި ގާނޫނުގެ ދަށުން ވަރުވާއަށް ދޫކުރާ ރަށްރަށުން އަކަމީޓަރަކަށް ނަގަމުން އައީ 10 ލާރީގެ ބަދަލުގައި، އާ ގާނޫނާއެކު މި އަދަދު ވަނީ އަކަމީޓަރަކަށް އަހަރަކަށް 2 ރުފިޔާގެ ރޭޓަށް ބަދަލުކޮށްފައެވެ.

މީގެ އިތުރުން، ގާނޫނުގެ ދަށުން ވަރުވާއަށް ރަށްރަށް ދޫކުރަން ހަމަޖެހިފައިވަނީ ގިނަވެގެން 10 އަހަރުގެ މުއްދަތަކަށެވެ. ހަމައެއާއެކު، އައު ގާނޫނުގެ ދަށުން ސިނާއީ އަދި އިޤްތިޞާދީ ބޭނުމަށް އަކަމީޓަރަކަށް 3 ރުފިޔާ، މަސްވެރިކަމާއި ދަނޑުވެރިކަމުގެ ބޭނުމަށް އަކަމީޓަރަކަށް 2 ރުފިޔާ 50 ލާރި އަދި އިޖްތިމާއީ ބޭނުންތަކަށް އަކަމީޓަރަކަށް 2 ރުފިޔާ ދައްކަންޖެހޭ ގޮތަށް ވަނީ ނިންމާފައެވެ. މި ގާނޫނުގެ ދަށުން ދައްކަންޖެހޭ ވަރުވާގެ ވާރު ނުވަތަ ކުލި ބަލައިގަންނާނީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިންނެވެ.

މި ގެނެވުނު އިޞްލާޙުތަކުގެ ސަބަބުން، ވަކި މީހަކަށް ވީތީ ނުވަތަ ވަކި ސަރަޙައްދެއްގެ މީހަކަށް ވީތީ ނާޖާއިޒު ގޮތުގައި ރަށްރަށް ދޫކުރުމުގެ ފުރުޞަތު ބަންދުވެގެންދާނެއެވެ. އޭގެ ބަދަލުގައި، ދެފުށް ފެންނަ ހާމަކަން ބޮޑު އުސޫލަކުން، ދައުލަތަށް އެންމެ ފައިދާހުރި އަދި އިޤްތިޞާދީ ގޮތުން ނަފާލިބޭނެ ގޮތަކަށް ފަޅުރަށްރަށް ބޭނުންކުރުމުގެ މަގު ފަހިވެގެންދާނެއެވެ.