ދިވެހިރާއްޖޭގެ ފަޅުރަށްރަށާއި ފަޅުގެ ސަރަޙައްދުތައް އެކިއެކި ބޭނުންތަކަށް އެކަށައެޅުމާއި، ކުއްޔަށްދިނުމާއި، ވަރުވާއަށް ލިޔެދިނުމުގެ އުސޫލުތައް ބަޔާންކުރާ "ފަޅުރަށާއި ފަޅު ކުއްޔަށްދިނުމާބެހޭ ބިލު" ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ތަޞްދީޤުކުރައްވައިފިއެވެ.

މި ބިލަކީ މި ހިނގާ 2026 އޯގަސްޓް 26 ވީ ބުދަދުވަހު އޮތް ރައްޔިތުންގެ މަޖިލީހުގެ ޖަލްސާއިން ފާސްކުރެއްވި ބިލެކެވެ.

މި ޤާނޫނުގެ ދަށުން ޓޫރިޒަމް ނޫން އެހެނިހެން ބޭނުންތަކަށް ދޫކުރެވޭ ފަޅުރަށްރަށް ކުއްޔަށް ދޫކުރުމުގެ އުސޫލުތަކާއި، އިޤްތިޞާދީ، ސިނާއީ، އިޖްތިމާޢީ އަދި ދަނޑުވެރިކަމުގެ ބޭނުންތަކަށް ފަޅުރަށްރަށާއި ފަޅު ކަނޑައެޅުމުގެ އިޖުރާތުތައް ބަޔާންކޮށްފައިވެއެވެ. މީގެއިތުރުން، ވަކި ޚާއްޞަ ބޭނުމަކަށް ކަނޑައެޅިފައިނުވާ ފަޅުރަށްރަށް ބެލެހެއްޓުމަށް ވަރުވާއަށް ލިޔެދިނުމުގެ އުސޫލުތައްވެސް ހިމެނެއެވެ.

ކުލީގެ ރޭޓުތަކަށް ގެނެވުނު ބަދަލުތައް:

* ސިނާއީ އަދި އިޤްތިޞާދީ ބޭނުމަށް: އަކަމީޓަރަކަށް 3 ރުފިޔާ

* މަސްވެރިކަމާއި ދަނޑުވެރިކަމަށް: އަކަމީޓަރަކަށް 2 ރުފިޔާ 50 ލާރި

* އިޖްތިމާއީ ބޭނުމަށް: އަކަމީޓަރަކަށް 2 ރުފިޔާ

* ވަރުވާއަށް ދޫކުރުމަށް: އަކަމީޓަރަކަށް އަހަރަކަށް 2 ރުފިޔާ

ކުރިން ފަޅުރަށްރަށުން ކުލީގެ ގޮތުގައި ނަގަމުން އައީ އަކަމީޓަރަކަށް އެންމެ 10 ލާރިއެވެ. ނަމަވެސް އިޤުތިޞާދު ފުޅާވަމުންދާތީ، އެކަށީގެންވާ ކުއްޔެއް ކަނޑައެޅުމުގެ ގޮތުން މި ރޭޓުތަކަށް ވަނީ އިޞްލާޙު ގެނެސްފައެވެ.

އައު ނިޒާމުގެ ދަށުން އެކި ބޭނުންތަކަށް ދޫކުރެވޭ ފަޅުރަށްރަށާއި ފަޅު އެކަށައަޅުއްވާނީ ރައީސުލްޖުމްހޫރިއްޔާއެވެ. ނަމަވެސް، ފަތުރުވެރިކަމާއި ސިނާއީ ބޭނުމާއި ދައުލަތުގެ ބޭނުންތައް ފިޔަވައި، ކައުންސިލުތަކުގެ އިޚްތިޞާޞްގައި ހިމެނޭ ފަޅުރަށްރަށް އެކި ބޭނުންތަކަށް އެކަށައެޅުމުގެ ބާރު ކައުންސިލުތަކަށް ލިބިގެންވެއެވެ.

މި ޤާނޫނަށް ޢަމަލުކުރަން ފަށާނީ ގެޒެޓުގައި ޝާއިޢުކުރާތާ 30 ދުވަސް ހަމަވާ ތާރީޚުން ފެށިގެންނެވެ. އަދި މި ޤާނޫނަށް ޢަމަލުކުރަން ފެށުމާއެކު، ކުރިން ޢަމަލުކުރަމުން އައި "ދިވެހިރާއްޖޭގެ ފަޅުރަށްރަށާބެހޭ ޤާނޫނު" (ޤާނޫނު ނަންބަރު 98/20) އުވޭނެއެވެ.