ގައުމަށް ބޭނުންވާ ދެމެހެއްޓެނިވި އަދި މާނަވީ އިސްލާހީ ބަދަލުތައް ގެނެވޭނީ ތެދުވެރިކަމާއެކު، ގައުމުގެ ހަގީގީ ހާލަތު ދެނެގަނެ މައްސަލަތަކާ ކުރިމަތިލައިގެން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ޕަބްލިކް ސާވިސް މީޑިއާ (ޕީއެސްއެމް) ގެ "ނޭޝަންޗެޓް" ޕޮޑްކާސްޓުގައި ވާހަކަފުޅު ދައްކަވަމުން ރައީސް މުއިއްޒު ފާހަގަކުރެއްވީ، ގައުމުގެ އިގުތިސާދު ވަރުގަދަކުރުމަށްޓަކައި ޑޮލަރާ ގުޅޭ ސިޔާސަތުތައް ބައްޓަންކުރުމާއި، ކުރިން ފާސްކޮށްފައި ހުރި ނަމަވެސް ތަންފީޒުނުކުރެވި ހުރި ގާނޫނުތަކަށް އަމަލުކުރަން ސަރުކާރުން މިހާރު ފަށާފައިވާ ކަމަށެވެ. އަދި ސަރުކާރުން އަޅާ ކޮންމެ ފިޔަވަޅަކީ ފަންނީ ދިރާސާތަކާއި މާހިރުންގެ ލަފާގެ މައްޗަށް ބިނާކޮށް ނިންމާ ނިންމުންތަކެއް ކަމަށްވާތީ، ރާއްޖޭގެ އިގުތިސާދީ ކުރިއެރުމަށް ހުރަސްއެޅޭފަދަ އެއްވެސް ކަމެއް ސަރުކާރުން ނުކުރާނެކަމުގެ ފުރިހަމަ ޔަގީންކަން އެމަނިކުފާނު ދެއްވިއެވެ.
މީގެއިތުރުން، ތިލަމާލެ ބްރިޖު މަޝްރޫއުގެ ފެންވަރާމެދު ދެކެވޭ ވާހަކަތަކަށް އަލިއަޅުއްވާލައްވަމުން ރައީސް ވިދާޅުވީ، އެ މަޝްރޫއުގެ ކޮލިޓީ ކަށަވަރުކުރުމުގެ މަސައްކަތް ކުރަމުންދަނީ ސިނަމާލެ ބްރިޖުގެ މަސައްކަތްވެސް ބެލެހެއްޓި ދުނިޔޭގެ މަޝްހޫރު 'އޭއީކޮމް' ކުންފުނިން ކަމަށެވެ. އެހެންކަމުން މަޝްރޫއުގެ ފެންވަރާމެދު ސުވާލު އުފައްދާނެ ޖާގައެއް ނެތްކަން ފާހަގަކުރައްވަމުން ރައީސް ވިދާޅުވީ، މާލެއާއި ވިލިމާލެ މިހާރު ގުޅާލެވިފައިވާއިރު، ކުރިއަށް އޮތް އަހަރެއްހާ ދުވަހުގެ ތެރޭގައި ތިލަފުއްޓާ ހަމައަށް މުޅި ބްރިޖުގެ މަސައްކަތް އެއްކޮށް ނިންމައި އާންމުންނަށް ހުޅުވާލެވޭނެ ކަމަށެވެ.
Advertisement
ހަމައެއާއެކު، ގައުމުގެ އުމްރާނީ ތަރައްގީއާއި އިގުތިސާދީ ދުވެލި ދެމެހެއްޓުމަށްޓަކައި އިންޖިނިއަރިން އަދި ސައިންސްގެ ދާއިރާއިން ދިވެހިން ތަމްރީނުކުރުމުގެ މުހިންމުކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ. ހާއްސަކޮށް ސިވިލް، އިލެކްޓްރޯނިކް އަދި މެކޭނިކަލް އިންޖިނިއަރުން ގައުމަށް ނުހަނު ބޭނުންތެރިކަން ފާހަގަކުރައްވައި އެމަނިކުފާނު ވިދާޅުވީ، އިގުތިސާދީ އިސްލާހީ ފިޔަވަޅުތަކާއެކު މިފަދަ ފަންނީ ދާއިރާތަކުން ދިވެހި ޒުވާނުން ބިނާކުރުމަކީ ގައުމުގެ މުސްތަގުބަލު ވަރުގަދަ ބިންގަލެއްގެ މައްޗަށް ބިނާކުރުމަށް މި ސަރުކާރުން ގެންގުޅޭ ދުރުވިސްނުން ރަމްޒުކޮށްދޭ ކަމެއް ކަމަށެވެ.
