ރިސޯޓުތަކާއި ގެސްޓްހައުސްތައް ހިމެނޭހެން ބޭރު ފައިސާއިން އާމްދަނީ ލިބޭ ވިޔަފާރިތަކުން ކޮންމެ މަހަކު ލިބޭ އާމްދަނީގެ 40 އިންސައްތަ ރާއްޖޭގެ ބޭންކުތަކަށް މާރުކުރަން ޖެހޭ ގޮތަށް ބޭރު ފައިސާއާ ބެހޭ ގާނޫނަށް އިސްލާހު ގެންނަން ނިންމައިފިއެވެ.
މިކަން ހާމަކުރެއްވީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހްމަދު މުނައްވަރު، ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.
ގަވަރުނަރު މުނައްވަރު ވިދާޅުވީ، ކުރިން އޮތް އުސޫލުގެ ދަށުން ކޮންމެ ޓޫރިސްޓެއްގެ ބޮލަކަށް 500 ޑޮލަރު ނުވަތަ އާމްދަނީގެ 20 ޕަސެންޓު މާރުކުރުމަށް އޮތް އިހުތިޔާރު އުވާލައި، އާމްދަނީގެ 40 ޕަސެންޓު ކޮންމެ މަހަކު ބޭންކުތަކަށް މާރުކުރުން ލާޒިމުކުރަން ގާނޫނަށް ގެންނަންޖެހޭ އިސްލާހު ވަރަށް އަވަހަށް ރައްޔިތުންގެ މަޖިލީހަށް ހުށަހަޅުއްވާނެ ކަމަށެވެ. މީގެއިތުރުން، ބޭންކަށް މާރުކުރުމަށްފަހު ބާކީ ހުންނަ ފައިސާ ހޭދަކުރާ ގޮތް ބެލުމަށް މޮނިޓަރިން ނިޒާމު ހަރުދަނާ ކުރުމުގެ މާއްދާތައް ވެސް މި އިސްލާހުގައި ހިމެނޭނެ ކަމަށް ވިދާޅުވިއެވެ.
Advertisement
ރާއްޖޭގެ ވިޔަފާރިތަކަށް އިމްޕޯޓަށް ބޭނުންވާ ޑޮލަރު ނުލިބޭ މައްސަލައަށް ދާއިމީ ހައްލެއް ގެނެވޭނީ ޑޮލަރުން އާމްދަނީ ލިބޭ ފަރާތްތަކުން ބޭންކިން ނިޒާމަށް ފައިސާ ޖަމާކޮށްގެން ކަމަށް ގަވަރުނަރު ފާހަގަކުރެއްވިއެވެ. އަދި މިދިޔަ މަހުގެ ނިޔަލަށް އެމްއެމްއޭއަށް މާރުކުރި ޑޮލަރުގެ 56 ޕަސެންޓު ހޭދަކޮށްފައިވަނީ ދައުލަތުގެ ދަރަނި ދެއްކުމަށް ކަމަށްވެސް ވިދާޅުވިއެވެ.
އެމްއެމްއޭގެ މައިގަނޑު އަމާޒަކީ ރާއްޖޭގައި ވިއްކާ ހުރިހާ މުދަލަކާއި ދޭ ހިދުމަތްތަކުގެ އަގު ދިވެހި ރުފިޔާއިން ކަނޑައެޅުން ކަމަށާއި، މިއީ ކުރީގެ ގަވަރުނަރުންވެސް ގެންގުޅުއްވި އަމާޒެއް ކަމަށް މުނައްވަރު ވިދާޅުވިއެވެ. މި ބަދަލުތައް ގެނައުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ދެއްވާ އެއްބާރުލުމަށް ގަވަރުނަރު ވަނީ ޝުކުރު އަދާކުރައްވާފައެވެ.
މި ނޫސްވެރިންގެ ބައްދަލުވުމުގައި ވާހަކަދައްކަވަމުން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވީ، ރާއްޖޭގެ ކަޅުބާޒާރުގައި ދައުރުވާ ޑޮލަރުގެ 90 ޕަސެންޓަކީ ޑޮލަރުން އާމްދަނީ ލިބޭ ވިޔަފާރިތަކުން، ހާއްސަކޮށް ރިސޯޓުތަކުން ނެރޭ ފައިސާ ކަމަށެވެ. އަދި ގަވާއިދާ ހިލާފަށް މަނީ ޗޭންޖަރުން މެދުވެރިކޮށް ހިންގާ މިފަދަ މުއާމަލާތްތައް ތަހުގީގުކޮށް، ގާނޫނު ތަންފީޒުކުރުމުގެ ފިޔަވަޅުތައް އަޅަމުންދާ ކަމަށްވެސް ހާމަކުރެއްވިއެވެ.
