ބޭރު ފައިސާ މާރުކުރުމުގެ ލައިސަންސް ނެތި އެކަން ކުރަމުންދިޔަ ހަތް ތަނެއް ބެލިބެލުމުން، ފާއިތުވި ނުވަ މަސްދުވަހުގެ ތެރޭގައި އެ ތަންތަނުން ކަޅުބާޒާރުގައި 77 މިލިއަން ޑޮލަރު މާރުކޮށްފައިވާކަން ހާމަވެއްޖެއެވެ.
މިކަން ހާމަކުރައްވާފައިވަނީ ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ހޯމް މިނިސްޓަރު އަލީ އިހްސާނެވެ.
އިހްސާން ވިދާޅުވީ، ރާއްޖޭގައި ރަސްމީކޮށް ރަޖިސްޓަރީކޮށްގެން ބޭރު ފައިސާ މާރުކުރުމުގެ ހިދުމަތް ދެނީ 63 ތަނަކުން ކަމަށެވެ. ނަމަވެސް އެއްވެސް ހުއްދައެއް ނެތި ގަވާއިދާ ހިލާފަށް އެކަން ކުރާ ގިނަ ފަރާތްތަކެއް އުޅޭކަން ފާހަގަކުރައްވަމުން ވަޒީރު ވިދާޅުވީ، އޭގެ ތެރެއިން ބެލި ހަތް ތަނަކުން އެކަނިވެސް މިދިޔަ ނުވަ މަސްދުވަހުގެ ތެރޭގައި 77 މިލިއަން ޑޮލަރު ކަޅުބާޒާރުގައި ދައުރުކޮށްފައިވާ ކަމަށެވެ.
Advertisement
ކަޅުބާޒާރަށް ޑޮލަރު ވަންނަ މަގުތަކާ ގުޅޭގޮތުން ވާހަކަދައްކަވަމުން ވަޒީރު ވިދާޅުވީ، ހުއްދަ ނެތި ހިންގާ މިފަދަ ތަންތަނަކީ އަމިއްލައަށް ރާއްޖެއަށް ޑޮލަރު އެތެރެކުރާ ނުވަތަ ޑޮލަރުން އާމްދަނީ ލިބޭ ތަންތަން ނޫން ކަމަށެވެ. އަދި މި ފަރާތްތަކަށް ޑޮލަރު ފޯރުކޮށްދެނީ ރާއްޖޭގައި ޑޮލަރުން ބޮޑެތި އާމްދަނީ ހޯދާ ފަރާތްތަކުން ކަމަށާއި، އޭގެ ތެރޭގައި ނަން މަޝްހޫރު ރިސޯޓުތަކާއި ކޮންސްޓްރަކްޝަން ކުންފުނިތަކުގެ އިތުރުން ސިޔާސީ ބައެއް ފަރާތްތައް ވެސް ހިމެނޭ ކަމަށް ވިދާޅުވިއެވެ.
"އަންފޯޗުނޭޓްލީ މީގެ ތެރޭގައި އަޅުގަނޑުމެންނަށް ފާހަގަކުރެވިފައި އެބަހުރި ރާއްޖޭގެ ނަން މަޝްހޫރު ރިސޯޓުތައް. އޭގެ ތެރެއިން އެއް ފަރާތުން މިދިޔަ ނުވަ މަސްދުވަހުގެ ތެރޭގައި، މި ދެންނެވި ރިސޯޓު ޗެއިނަކުން ހަތަރު މިލިއަން ޑޮލަރު ކަޅު ބާޒާރުގައި މާރުކޮށްފައި،"
ހޯމް މިނިސްޓަރު އަލީ އިހްސާން
މިނިސްޓަރު އިތުރަށް ފާހަގަކުރެއްވި ގޮތުގައި، ބައެއް ރިސޯޓުތަކުން ކަޅުބާޒާރަށް ނެރޭ ޑޮލަރަކީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އުސޫލުތަކުގެ ދަށުން ބޭންކުތަކަށް މާރުކުރަން ޖެހޭ 20 ޕަސެންޓަށް ވުރެ ވެސް ބޮޑު އަދަދެކެވެ. ނަމަވެސް ބޭންކުތަކަށް މާރުކުރަން ޖެހޭ ވަގުތު އެ އަދަދު ބޮޑުވެގެން ޝަކުވާ ކުރާއިރު، ކަޅުބާޒާރަށް އެ ޑޮލަރު ނެރެމުންދާކަން މިނިސްޓަރު ފާހަގަކުރެއްވިއެވެ.
ހުއްދަ ނުނަގައި ބޭރު ފައިސާ މާރުކުރުމަކީ ޖިނާއީ ކުށެއް ކަމަށާއި، އެއީ މަނީ ލޯންޑަރިންގެ އަމަލެއްގެ ގޮތުގައި ގާނޫނުގައި ބަޔާންކޮށްފައިވާ ކަމެއް ކަމަށް ވަޒީރު ވިދާޅުވިއެވެ. އަދި އެނގިގެން ވިޔަސް ނުވަތަ ނޭނގި ވިޔަސް މިފަދަ ޣައިރުގާނޫނީ އަމަލުތަކުގައި ބައިވެރިނުވުމަށް އިލްތިމާސްކުރައްވަމުން، މިފަދަ ކަންކަން ބަލައި ގާނޫނީ ގޮތުން އަޅަންޖެހޭ ހަރުކަށި ފިޔަވަޅުތައް އެޅުމުގައި ސަރުކާރު ފަސްނުޖެހޭނެ ކަމުގެ ޔަގީންކަން މިނިސްޓަރު އިހްސާން ދެއްވިއެވެ. ގާނޫނާ ހިލާފަށް ބޭރު ފައިސާ މާރުކުރާ ފަރާތްތައް 5،000 ރުފިޔާއާއި 1 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.
