މާތް ނަބިއްޔާ މުހައްމަދު ﷺ ދެކެ ލޯބިވުމުގެ އެންމެ މުހިންމު ޢަލާމާތަކީ އެކަލޭގެފާނަށް ފުރިހަމައަށް ތަބާވުން ކަމަށް މިއަދުގެ ހުކުރު ހުތުބާގައި ބުނެފިއެވެ.

މިއަދު ރާއްޖޭގެ އެކި ކަންކޮޅުތަކުގައި އިއްވި ހުކުރު ހުތުބާ ހާއްސަކޮށްފައިވަނީ "މާތް ނަބިއްޔާ ﷺ ދެކެ ލޯބިވުން" މި މައުޟޫއަށެވެ.

ހުތުބާގައި ފާހަގަކުރައްވާފައިވާ ގޮތުގައި، ކީރިތި ރަސޫލާ ﷺ ދުނިޔެއަށް ފޮނުއްވުމުގެ ކުރިން މީސްތަކުން ތިބީ ޖަހާލަތުގެ އަނދިރިކަމުގައެވެ. ބުދަށާއި، ގަސްގަހާގެއްސަށާއި އަލިފާނަށް އަޅުކަންކުރުމާއި، އިންސާނުން އަޅުވެތިކޮށް ވިއްކުމާއި، އަންހެން ދަރިން ދިރިތިއްބައި ވަޅުލުން ފަދަ ލާއިންސާނީ އެތައް ކަމެއް އޭރު އޮތީ އާންމުވެފައެވެ. ނަމަވެސް، މުޅި އިންސާނިއްޔަތު އެ އަނދިރިކަމުން ސަލާމަތްކުރައްވައި، އާލަމްތަކަށް ރަހްމަތެއްގެ ގޮތުގައި އަދި ހިދާޔަތުގެ އަލިގަދަ ދަންމަރެއްގެ ގޮތުގައި މާތް ﷲ އެކަލޭގެފާނު ފޮނުއްވި ކަމަށް ހުތުބާގައި ބުންޏެވެ.

މީގެއިތުރުން، ކައުއިތުރު މާތް ނަބިއްޔާ ﷺ އަށް އީމާންވުމުގެ މާނައަކީ، އެކަލޭގެފާނަށް ކިޔަމަންގަތުމާއި، އެކަލޭގެފާނުގެ ސުންނަތަށާއި މަގާމަށް ގަދަރުކޮށް އިހުތިރާމު ކުރުމެވެ. އަދި އެ މީހެއްގެ އަމިއްލަ ނަފުސާއި، މައިންބަފައިންނާއި، އަނބިދަރީންނާއި މުދަލަށް ވުރެ ބޮޑަށް އެކަލޭގެފާނު ދެކެ ލޯބިވެގެން މެނުވީ އެއްވެސް މުސްލިމެއްގެ އީމާންކަން ފުރިހަމަ ނުވާނެކަން ކީރިތި ރަސޫލާގެ ހަދީޘްފުޅުތަކުން ދަލީލު ދައްކަވައި ހުތުބާގައި ހަނދާންކޮށްދެއްވިއެވެ. އެކަލޭގެފާނަށް ނަފުރަތުކުރުމާއި ފުރައްސާރަކުރުމަކީ އިސްލާމްދީނުން ބޭރުވާނޭ ކަމެއް ކަމަށާއި، އެ ފަދަ މީހުންނަށް އާހިރަތުގައި ގަދަފަދަ އަޒާބު ހުރިކަން ވެސް ބަޔާންކުރެއްވިއެވެ.

ހުތުބާ ނިންމަވާލައްވަމުން ގޮވާލައްވާފައިވަނީ، އިސްލާމީ އުންމަތަށް ކީރިތި ރަސޫލާ ﷺ ދޫކުރެއްވި އެންމެ އަގުބޮޑު ތަރިކަ ކަމުގައިވާ ކީރިތި ގުރްއާނާއި އެކަލޭގެފާނުގެ މާތް ސުންނަތުގައި ވަރުގަދައަށް ހިފެހެއްޓުމަށެވެ. އަދި އަޅުކަމާއި، މުއާމަލާތާއި، އަހުލާގީ އެންމެހައި ކަންކަމުގައި އެކަލޭގެފާނު ދެއްކެވި ރިވެތި ނަމޫނާއާ އެއްގޮތަށް އަމަލުތައް ބެހެއްޓުމަށް ހުރިހާ މުސްލިމުންނަށް ނަސޭހަތްތެރިވެވަޑައިގަތެވެ.