ރައީސުލް ޖުމްހޫރިއްޔާ، ޑރ މުޙައްމަދު މުޢިއްޒު ޢިއުލާންކުރައްވާފައިވާ "ޖެނަރޭޭޝަނަލް ޓޯބާކޯ ބޭން" ހަރުދަނާ ކޮށް، އެކަން މުޅި ރާއްޖެއެއަށް ވިލަރެސްކުރެވޭނެ ޚާއްސަ ނިޒާމެއް ކަނޑައެޅުމަށް ވަޒީރުންގެ މަޖިލީހުން ނިންމަވައިފިއެވެ.
ދުންފަތާއި ނިކޮޓީންގެ ނުރައްކަލުން ކުރިއަށް އޮތް ޖީލު ސަލާމަތްކުރުމުގެ އަމާޒުގައި ތަޢާރަފް ކުރެއްވި "ޖެނަރޭޭޝަނަލް ޓޯބާކޯ ބޭން" ހަރުދަނާ ކޮށް މުޅި ރާއްޖެއަށް ވިލަސްކުރެވޭނެ ނިޒާމެއް ކަނޑައެޅުމަށް ނިންމެވީ 16 އޮގަސްޓު 2026 އާދިއްތަ ވީ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައެވެ. މި ބައްދަލުވުމުގައި، ދުންފަތާއި ނިކޮޓިންގެ ނުރައްކަލާމެދު ހޭލުންތެރި ކުރުމަށް ޤައުމީ ކެމްޕޭނުންތައް ކުރިޔަށް ގެންދިއުމަށާއި، ސިނގިރޭޓުގެ އިމްޕޯޓު ޑިއުޓީ ރޭޓުތައް މުރާޖާއުކުރުމާ ގުޅޭ ސަބް-ކޮމިޓީންވަނީ އެ ކޮމިޓީގެ މަސައްކަތްތަކާ ގުޅޭ އަދާހަމަ ހިއްސާކުރައްވާފައެވެ.
Advertisement
ވަޒީރުންގެ މަޖިލީހުގެ ބައްދަލުވުމުގެ ތެރެއިން / ފޮޓޯ: ރައީސް އޮފީސް.
އެ ކޮމިޓީއިން ހިއްސާކުރައްވާފައިވާ މަޢުލޫމާތައް ރިޢާޔަތްކުރައްވާ ވަޒީރުންގެ މަޖިލީހުން ވަނީ، ދުންފަތާއިި ނިކޮޓިންގެ ނުރައްކަލާމެދު ހޭލުންތެރިކުރުމުގެ ޤައުމީ ކެމްޕޭނުތަކުގައި ހިމަނުއްވައިގެން، ސްކޫލް ނިޒާމުގެ ތެރެއިން ޖެނެރޭޝަނަލް ބޭން ތަނފީޒުކުރުމާއި ގުޅޭ ކަންތައްތައް، ތައުލީމީ ވުޒާރާއާއި ސިއްހަތާ ބެހޭ ވުޒާރާ ގުޅިގެން ކެމްޕޭން ވިލަރެސް ކުރެވޭނެ ނިޒާމެއް ކަނޑައެޅުމަށްވެސް ނިންމާފައި ވާކަމަށް ރައީސް އޮފީހުން ބުނެއެވެ.
މި ކެމްޕޭނުގައި، ރާއްޖޭގެ ވިހާވެސް ގިނަ މަދަނީ ޖަމިއްޔާތައް ބައިވެރިކުރުމުގެ އަމާޒުގައި، ރާއްޖޭގެ މީހުން ދިރިއުޅޭ ކޮންމެ ރަށަކުން ބައިވެރިވެވޭނެ ފަރާތެއް ސިއްހަތާބެހޭ ވުޒާރާއިން އެކަށައެޅުއްވުމަށާއި، ކެމްޕޭނުގެ ފުރަތަމަ މަރުހަލާގައި ކޮންމެ އަތޮޅަކުން މަދުވެގެން އެއް ޖަމިއްޔާއާއި، މާލެ ސަރަހައްދުން ވިހާވެސް ގިނަ ޖަމިއްޔާތައް ބައިވެރިކުރުމަށް ވަނީ ނިންމަވާފައެވެ.
މީގެ އިތުރުން، ރަށްރަށުގައި ތިއްބަވާ ޔޫތް އެސޯސިއޭޓުންނާއި، ކުޅިވަރުތަކުގެ ހަރަކާތެރިވާ ފަރާތްތަކުގެ ބައިވެރިވުމާއެކު ދުންފަތާއި ނިކޮޓިންގެ ނުރައްކަލާ މެދު ހޭލުންތެރިކުރުމުގެ ޤައުމީ ކެމްޕެއިން ފުޅާކުރުމަށްވެސް ވަޒީރުންގެ މަޖިލީހުންވަނީ ނިންމަވާފައި ކަމުގައި ރައީސް އޮފީހުން ހާމަކުރެއެވެ. ހަމައެއާއެކު، ޤައުމީ ޓީމެއްގައި ބައިވެރިވެވޭނީ، ދުންފަތުގެ އިސްތިޢުމާލުކުރުމާއި ދުރުވެފައި ތިބި އެތުލީޓުނަށްކަމަށް ހެދުމުގެ ޓާގެޓު ހާސިލުކުރުމަށްޓަކައި، އެތުލީޓުންނަކީ ދުންފަތުގެ އިސްތިޢުމާލުކުރުމާ ދުރުވެފައި ތިބި ބަޔަކަށް ހެދުމަށް ޚާއްޞަ އަމާޒުތަކެއް ކަނޑައެޅުއްވުމަށްވެސް އެ ބައްދަލުވުމުގައި ނިންމަވާފައިވާކަމަށް ބުނެފިއެވެ.
މި "ޖެނަރޭޭޝަނަލް ޓޯބާކޯ ބޭން"ގެ ކުރިންވެސް ދުންފަތުގެ އިސްތިޢުމާލު ކުރާ މީހުންގެ އަދަދު މަދުކުރުމަށް ވަނީ އެތައް ފިޔަވަޅުތަކެއް އަޅާފައެވެ. އެގޮތުން އީ-ސިގަރޭޓާއި، ވޭޕުކުރުމަށް ބޭނުންކުރާ ސާމާނު ރާއްޖެ އެތެރެކުރުން 2024ވަނަ އަހަރު ވަނީ މަނާކޮށްފައެވެ. އަދި ދުންފަތުގެ އިސަތިޢުމާލު ކުރުމަާއި، އޭގެ ބާވާތުގެ ތަކެތި ގެނގުޅޭވޭ އެންމެ ހަގު އުމުރު، 18 އަހަރުން 21 އަހަރަށް ވަނީ އިތުރުކޮށްފައެވެ.
