އައްޑޫ ސިޓީ ހުޅުމީދޫއާއި ހިތަދޫ ގުޅުވައިދޭ ބުރިޖު އެޅުމަށް ސަރުކާރުން ބޭނުންވި ރޫޓަށް ބަދަލުނުގެނައުމަށް އައްޑޫ ސިޓީ ކައުންސިލުން ނިންމި ނިންމުމަކީ، ރައްޔިތުންގެ މަޖިލީހަށް ހުށަހަޅާފައިވާ ލާމަރުކަޒީ ގާނޫނުގެ އިސްލާހަށް ތާއީދުކުރަންޖެހޭ ސަބަބެއް ކަމަށް ކުޅިވަރާއި ޒުވާނުން ބާރުވެރިކުރުވުމާ ބެހޭ ވަޒީރުގެ މުޝީރު އަހްމަދު ނަރީޝް ވިދާޅުވެއްޖެއެވެ.
އެމްއެމްޓީވީގެ ޕްރޮގުރާމެއްގައި ވާހަކަދައްކަވަމުން ނަރީޝް ވިދާޅުވީ، ސަރުކާރުގެ ފަރާތުން ބިނާރާއި ގެދޮރާއި އިމާރާތްކުރުމާ ބެހޭ ވުޒާރާއިން އެދުނު ގޮތަށް ބުރިޖުގެ ރޫޓު ބަދަލުކޮށްނުދޭން ކައުންސިލުން ފާސްކުރި ކަމަށެވެ. އަދި އެ ނިންމުމަށްފަހު، ބުރިޖު އެޅުމަކީ ހުޅުދޫމީދޫގެ 60 އިންސައްތަ ރައްޔިތުން ބޭނުންނުވާ ކަމެއްގެ ގޮތުގައި އައްޑޫގެ މޭޔަރު އަލީ ނިޒާރު ސިފަކުރެއްވިކަން ފާހަގަކުރައްވައި، ނަރީޝް ވިދާޅުވީ ރައްޔިތުން އެންމެ އެދިއެދި ތިބި ކަންތައް ބޭކާރު ކަމެއްގެ ގޮތުގައި ސިފަކުރީ އެތަނުގައި އެމްޑީޕީގެ އަޣުލަބިއްޔަތު އޮތް ކައުންސިލެއް އޮތުމުން ސިޔާސީ ބޭނުމެއްގައި ކަމަށެވެ.
ނަރީޝް އިތުރަށް ވިދާޅުވީ، ގައުމީ ފެންވަރުގެ މުހިއްމު ތަރައްގީގެ މަޝްރޫއުތައް ހިންގުމަށް ބޭނުންވާ ބިން ކައުންސިލުތަކުގެ އިހުތިސާސުން ވަކިކުރުމުގެ ބާރު ވަޒީރުންގެ މަޖިލީހަށް ލިބިދޭ ގޮތަށް މަޖިލީހަށް ހުށަހަޅާފައިވާ ބިލަކީ މިފަދަ ހުރަސްތަކާ ހުރެ ކޮންމެހެން ބޭނުންތެރި ބިލެއް ކަމަށެވެ. މީގެ އިތުރު މިސާލެއްގެ ގޮތުން އޭނާ ފާހަގަކުރެއްވީ، ގއ. ކޮލަމާފުށީގައި ފުލުސް ސްޓޭޝަނެއް އަޅަން ބޭނުންވާ ބިން ކައުންސިލުން އަދިވެސް ހަމަޖައްސައިނުދީ އޮތް އޮތުމެވެ. ގާނޫނު ބުނާގޮތުން ކައުންސިލްތަކުން ބިން ބޭނުންކުރާ ގޮތުގެ ޕްލޭން އެކުލަވައިލަންޖެހެނީ ގައުމީ ތަރައްގީގެ ޕްލޭނާ އެއްގޮތަށް ކަމުގައިވީ ނަމަވެސް، އިދިކޮޅު އެމްޑީޕީގެ އަޣުލަބިއްޔަތު އޮންނަ ކައުންސިލުތަކުން އެ ޕްލޭނަށް ބަލައިލުމެއް ނެތި، ސަރުކާރުގެ މަޝްރޫއުތަކަށް ޖެއްސުންކޮށް ހުއްޓުވަމުންދާ ކަމަށް އޭނާ ތުހުމަތުކުރެއްވިއެވެ.
Advertisement
މި ސަގާފަތާ މުޅިން ޚިލާފަށް، ރައީސް ޑރ. މުހައްމަދު މުއިއްޒު މާލެ ސިޓީގެ މޭޔަރުކަމުގައި ހުންނެވިއިރު، އިދިކޮޅު ޕީޕީއެމްގެ އަޣުލަބިއްޔަތު އޮތް ނަމަވެސް އޭރުގެ އެމްޑީޕީ ސަރުކާރުން އެދުނު އެއްވެސް ކަމަކަށް ހުރަސްއަޅާފައި ނުވާނެކަން، އޭރު މާލޭގެ ޑެޕިއުޓީ މޭޔަރުކަން ކުރެއްވި ނަރީޝް ފާހަގަކުރެއްވިއެވެ.
ސަރުކާރުން ރައްޔިތުންނަށް ފޯރުކޮށްދޭ ޚިދުމަތްތަކާއި މަޝްރޫއުތަކަށް އިދިކޮޅު ކައުންސިލްތަކުން ހުރަސްއެޅުމުން އޭގެ ހުރިހާ ތަކުލީފެއް އުފުލަންޖެހެނީ ސީދާ ރައްޔިތުން ކަމަށް އޭނާ ވިދާޅުވިއެވެ. އެހެންކަމުން، މިހާރު މަޖިލީހުގައި އޮތް އިސްލާހަކީ ސިޔާސީ ހުރަސްތައް ނައްތާލައި، ރައްޔިތުންނަށް ހަލުއިކަމާއެކު ތަރައްގީ ގެނެސްދިނުމަށްޓަކައި ކޮންމެހެން ގެންނަންޖެހޭ މުހިއްމު ބަދަލެއް ކަމަށް ވިދާޅުވެ ނަރީޝް ވަނީ އެ ބިލަށް ފުރިހަމައަށް ތާއީދުކުރައްވާފައެވެ.
