އެމެރިކާއިން އީރާނުގެ ހަކަތައާއި ކަރަންޓު އިންފްރާސްޓްރަކްޗާއަށް އަމާޒުކޮށް ދޭން ރޭވި ވަރުގަދަ އަސްކަރީ ހަމަލާތައް ކެންސަލްކޮށް، މަޝްވަރާގެ މޭޒަށް އެނބުރި ވަޑައިގަތުމަށް ރައީސް ޑޮނަލްޑް ޓްރަމްޕަށް މަޖުބޫރުވީ ސައޫދީ އަރަބިއްޔާގެ ސީދާ ނުފޫޒާއި ދެންނެވުންތަކާ ގުޅިގެންނެވެ.
އެމެރިކާގެ އަސްކަރިއްޔާއިން ދެވަނަ ބޮޑުހަނގުރާމައަށްފަހު ދެވޭ އެންމެ ބޮޑު ހަމަލާ އީރާނަށް ދިނުމަށް "ލޮކްޑް އެންޑް ލޯޑެޑް" ހާލަތުގައި އޮއްވައި، ސައޫދީގެ ވަލީއަހުދު މުހައްމަދު ބިން ސަލްމާން ވަނީ ޓްރަމްޕަށް ސީދާ ފޯނުން ގުޅުއްވައި ހަމަލާތައް ހުއްޓާލުމަށް އިލްތިމާސް ކުރައްވާފައެވެ. މީގެ އިތުރުން ސައޫދީގެ ޑިފެންސް މިނިސްޓަރު ހާލިދު ބިން ސަލްމާން ވޮޝިންގްޓަނަށް ވަޑައިގެން، ޓްރަމްޕް އަދި ވައިސް ޕްރެޒިޑެންޓް ޖޭޑީ ވެންސްއާ ބައްދަލުކުރައްވައި ހަނގުރާމައިގެ ބަދަލުގައި ޑިޕްލޮމެޓިކް ހައްލަކަށް ދިޔުމަށް ބާރުއަޅުއްވާފައެވެ.
ސައޫދީ އަރަބިއްޔާއިން މިފަދަ ހަރުދަނާ ފިޔަވަޅެއް އެޅީ، އެމެރިކާގެ ބޮޑު ހަމަލާއެއް އީރާނަށް އަމާޒުވެއްޖެނަމަ، އީރާނުން ރައްދުގައި ސައޫދީއަށާއި ގަލްފުގެ އެހެން ގައުމުތަކުގެ ތެޔޮ ވަސީލަތްތަކަށް ހަމަލާދީ މުޅި ސަރަހައްދުގެ އިގްތިސާދު ސުންނާފަތިކޮށްލާނެ ކަމުގެ ބިރު ވެސް އޮތް ދަނޑިވަޅެއްގައެވެ.
Advertisement
އެމެރިކާއާއި އިސްރާއީލުން އީރާނާ ދެކޮޅަށް ފެށި މި ހަނގުރާމައަށް 5 މަސް ވެފައިވާއިރު، ސައޫދީން ކުރިން އެމެރިކާއާއެކު ބައިވެރިވެ އީރާނުގެ މަދަދުލިބޭ މިލިޝިއާތަކަށް ހަމަލާދިން ނަމަވެސް، ހަނގުރާމަ ދިގުލައިގެން ގޮސް މުޅި ސަރަހައްދުގެ ހަމަޖެހުން ގެއްލޭތީ ސައޫދީގެ ސިޔާސަތު ވަނީ ސުލްހައަށް ބަދަލުކޮށްފައެވެ. ސައޫދީގެ އިތުރުން ގަތަރާއި ޔޫއޭއީ ފަދަ ގަލްފުގެ ބައިވެރިންވެސް ވަނީ ހަނގުރާމަ ފުޅާވިޔަނުދީ ހުއްޓުވުމަށް އެމެރިކާއަށް ވަރަށް ބޮޑަށް ބާރުއަޅާފައެވެ.
މި ފިއްތުންތަކާ ގުޅިގެން ޓްރަމްޕް މިހާރު ވަނީ އީރާނާއެކު އާ މަޝްވަރާތަކެއް ފެށުމަށް ހަމަޖެހިފައިވާކަން އިއުލާން ކުރައްވައި، މެދުއިރުމަތީގެ ބައިވެރިންނާ އެކު އީރާނު ހަނގުރާމަ ނިންމާލާނެ އެއްބަސްވުމެއްގެ އޮނިގަނޑެއް އެކުލަވާލެވިފައިވާކަން ހާމަކުރައްވާފައެވެ. މި އާ އޮނިގަނޑުގެ ދަށުން ހުރްމޫޒް ކަނޑުއޮޅި އެއްކޮށް ހުޅުވާލުމަށާއި، އީރާނުގެ ނިއުކްލިއާ ބިރުވެރިކަން ނައްތާލުމަށް މަޝްވަރާ ކުރާނެއެވެ. މިއީ ސަރަހައްދީ ބާރުތަކުގެ އެދުމަށް ބޯލަނބައި، ބޮޑު ހަނގުރާމައަކުން ސަލާމަތްވުމަށް އެމެރިކާއިން ސިޔާސަތު ބަދަލުކުރަން މަޖުބޫރުވި ތާރީހީ ދަނޑިވަޅެކެވެ.
