މާލޭގެ މަގުތައް ތަރައްގީ ކުރުމަށް އެމަނިކުފާނު މާލޭ ސިޓީގެ މޭޔަރުކަމުގައި ހުންނެވި ދުވަސްވަރު ގިނަ މަސައްކަތްތަކެއް ކުރެއްވި ނަމަވެސް، އޭރު އޮތް އެމްޑީޕީގެ ސަރުކާރުން އެކަމަށް ހުރަސްއަޅާފައިވާ ކަމަށް ރއީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ސަރުކާރުން ކުރިއަށްގެންދާ "ނޭޝަން ޗެޓް" ޕްރޮގްރާމްގައި ވާހަކަފުޅު ދައްކަވަމުން ރައީސް ފާހަގަކުރެއްވި ގޮތުގައި މާލޭގެ ރިންގް ރޯޑްގެ ފުރަތަމަ މަރުހަލާ ކުރިއަށް ގެންދިޔައީ ރައީސް ޔާމީނުގެ ސަރުކާރުގައި އެމަނިކުފާނު ހައުސިންގ މިނިސްޓަރަކަށް ހުންނެވި އިރުގައެވެ. ނަމަވެސް، ޖެހިގެން އައި އެމްޑީޕީ ސަރުކާރުން އެ މަޝްރޫއު ކުރިއަށް ނުގެންގޮސް ބާއްވާފައިވާ ކަމަށް އެމަނިކުފާނު ވިދާޅުވިއެވެ.
މޭޔަރުކަމުގައި ހުންނަވައިގެން ކުރެއްވި މަސައްކަތްތަކާ ގުޅޭގޮތުން ރައީސް ވިދާޅުވީ، މާލޭ ސިޓީ ކައުންސިލާއެކު އާރުޑީސީން މަގުތައް ހެދުމަށް އެގްރީމަންޓެއްގައި ސޮއި ކުރެވުނު ކަމަށެވެ. އެހެންނަމަވެސް، ސިޓީ ކައުންސިލަށް އެންގުމަކާ ނުލާ އެ މަސައްކަތް ކުރިއަށް ނުގެންދެވޭ ގޮތަށް އޭރުގެ ސަރުކާރުން ހުއްޓާލީ ކަމަށާއި، އެ މަޝްރޫއު ސިޓީ ކައުންސިލަށް ކުރިއަށް ގެންދެވޭނެ އެއްވެސް މަގެއް އޭރުގެ ސަރުކާރުން ދައްކާފައިނުވާ ކަމަށް ރައީސް ވިދާޅުވިއެވެ. އަދި ނިމިގެންދިޔަ ސަރުކާރުން އަމީނީ މަގު ހެދުމުގެ މަސައްކަތް ކޮންމެވެސް ވަރަކަށް ކުރިއަށް ގެންދިޔަ ނަމަވެސް، މަޝްރޫއު ނުނިމެނީސް ސަރުކާރު ބަދަލުވެގެންދިޔައީ ކަމަށް އެމަނިކުފާނު ފާހަގަކުރެއްވިއެވެ.
Advertisement
މި ސަރުކާރުން މަގުތައް ތަރައްގީ ކުރުމަށް ކުރަމުންދާ މަސައްކަތްތަކަށް އަލިއަޅުވާލައްވަމުން ރައީސް ވިދާޅުވީ، ނިމިދިޔަ ރޯދަ މަހާ ދިމާކޮށް މާރުކޭޓް ސަރަހައްދުގެ ބޭރު މަގު ހެދުމާއެކު އެ ސަރަހައްދު ބޭނުންކުރާ ފަރާތްތަކަށް ބޮޑެތި ފަސޭހަތަކެއް ލިބިފައިވާ ކަމަށެވެ. އަދި ދާދި ފަހުން ނަސަންދުރާ ހަމައިން ގޮސް އިއްޒުއްދީން ފާލަމާ ހިސާބަށް އޮތް ބައި ނިމުމާއެކު، އެ ސަރަހައްދުގައި ހުރި އޮފީސްތަކާއި ބޭންކުތަކަށް ދާ ފަރާތްތަކަށްވެސް ބޮޑެތި ލުއިފަސޭހަތަކެއް ލިބިގެން ގޮސްފައިވާ ކަމަށް ރައީސް ވިދާޅުވިއެވެ.
"މި ތަރައްގީ ކުރެވުނު ބަޔާއެކު މާލޭގެ އެތެރޭގެ މަގުތަކަށް ބާރު ކުޑަވެ ލުއި ވެގެންދާނެ. ބޭރު މަގު ވަށައިގެން ފަސޭހަކަމާއެކު ދަތުރުކުރެވެންޏާ އެތެރޭގެ މަގުތައް ބޭނުން ކުރާ މިންވަރު މަދުވެގެންދާނެ. އެ ފަސޭހަ ރައްޔިތުން މިހާރު އިހުސާސް ކުރައްވަމުން އެބަގެންދަވާ،"
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރައީސްގެ ވާހަކަފުޅުގައި އިތުރަށް ވިދާޅުވީ، މި ސަރުކާރުގެ އަމާޒަކީ މާލޭގެ މަގުތަކަކީ ހިނގާބިނގާވެ އުޅުމަށާއި ދަތުރުފަތުރު ކުރުމަށް އަމާން އަދި ފަސޭހަ މަގުތަކަކަށް ހެދުން ކަމަށެވެ.
