އައްޑޫ ސިޓީ ހުޅުދޫ މީދޫގައި އިންޖީނުގެއެއް އެޅުމަށް ނިމިދިޔަ ސަރުކާރުން 185 މިލިއަން ރުފިޔާއަށް ބަޔަކާ ހަވާލުކުރި ނަމަވެސް، އެ މަސައްކަތް ކުރިއަށް ގޮސްފައިނުވާ ކަމަށް ހުޅުދޫ މީދޫ ދާއިރާގެ މެންބަރު މުހައްމަދު ޝާހިދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ 17 ވަނަ ޖަލްސާގައި ބަހުސް ކުރައްވަމުން ޝާހިދު ވިދާޅުވީ، އިންޖީނުގެ އެޅުމަށް ބޮޑު އަދަދަކުން ފައިސާ ދޫކޮށްފައިވާއިރު، މިއަދު އެ ރަށުގައި އިންޖީނުގެއެއް ނުވަތަ އިންޖީނެއްވެސް ފެންނަން ނެތް ކަމަށެވެ. އޭނާ ވިދާޅުވީ އެ މަސައްކަތަށް ދޫކުރި ފައިސާގެ ތެރެއިން ހަމައެކަނި ފެންނަން ހުރީ ސައިލެންސަރެއް އެކަނި ކަމަށާއި، ބާކީ ހުރި ފައިސާ ވަނީ ނަގާފައި ކަމަށެވެ.
ޝާހިދު އިތުރަށް ވިދާޅުވީ ހުޅުދޫ މީދޫގެ ކަރަންޓުގެ މައްސަލަ ހައްލުނުވެ ދިގުލައިގެން ދަނީ މިފަދަ ކޮރަޕްޝަންގެ މައްސަލަތަކުގެ ސަބަބުން ކަމަށެވެ. ނިމިދިޔަ ސަރުކާރުން ވަކި ބަޔަކަށް މަންފާވާ ގޮތަށް، އެމީހުންގެ ޕާޓީގެ މީހުންނާ މަސައްކަތްތައް ހަވާލުކޮށްގެން ބޮޑެތި އަދަދުތަކުން ފައިސާ ނަގާފައިވާ ކަމަށް އޭނާ ތުހުމަތު ކުރެއްވިއެވެ.
Advertisement
ކަރަންޓުގެ މައްސަލައިގައި އިދިކޮޅު އެމްޑީޕީގެ މެންބަރުން ދައްކަވާ ވާހަކަތަކަށް ރައްދު ދެއްވަމުން ޝާހިދު ވިދާޅުވީ، އެ ވާހަކަ ދެއްކުމުގެ ބޭނުމެއް މިހާރު ނެތް ކަމަށެވެ. އަދި މި ސަރުކާރުން ކަރަންޓާއި، ފެނާއި، ކުނީގެ މައްސަލަ ހައްލުކޮށްދޭނެ ކަމުގެ ޔަގީންކަން އޭނާ ދެއްވިއެވެ.
"މިކަންކަމަށް ވަގުތުކޮޅެއް ނަގާނެ. މިއީ މި ދަތިވެގެން އުޅޭ ކަމަކީ. މިފަދަ ކަންކަމަށް ރައްޔިތުން ކެތްތެރިވެލައްވާ. މިފަދަ ކަންކަން ކުރެވޭނީ ހަގީގީ މާނައިގައި އަޅުގަނޑުމެންގެ މި މަޖިލީހުން ސަރުކާރުން ބޭނުންވާ އިސްލާހުތައް ނޫނީ ގާނޫނުތައް އުފަންކުރުވައިގެން، އެ ގާނޫނުތައް ތަންފީޒުކޮށްގެން މައްސަލަތައް ހައްލުކޮށްގެން،"
މުހައްމަދު ޝާހިދު (ހުޅުދޫ ދާއިރާ)
މީގެ އިތުރުން، ޝާހިދު ފާހަގަކުރެއްވި ގޮތުގައި ފާއިތުވި ފަސް އަހަރުގެ ތެރޭގައި ގެނައި ކޭބަލްތައް އަދިވެސް ހުރީ ކަސްޓަމްސްގައި ބަންދުވެފައެވެ. އެއީ އެ ތަކެއްޗަށް ފައިސާ ނުދެއްކިގެން ކަމަށާއި، ނަމަވެސް އެ ކޭބަލްތައް ރާއްޖެ އައުމުގެ ކުރިން އެއަށްވާ ފައިސާ ދޫކޮށްފައިވާ ކަމަށް އޭނާ ވިދާޅުވިއެވެ. މިކަން ހިނގާފައިވަނީ ނިމިދިޔަ ރިޔާސީ އިންތިހާބުގެ ދެ ބުރުގެ ދޭތެރޭގައި ކަމަށްވެސް އޭނާ ވިދާޅުވިއެވެ.
ޝާހިދު ވިދާޅުވީ މިހާރު ބޭނުންވަނީ އިލްމީ ބަހުސެއް ކުރުމަށްވުރެ ބޮޑަށް، މިފަދަ ކޮރަޕްޝަންގެ މައްސަލަތައް ބަލައި ހައްލުކުރުން ކަމަށެވެ. އަދި ކަމާގުޅުންހުރި ވުޒާރާތަކާއި ކުންފުނިތަކުން ރެއާދުވާލު ސަރުކާރާއެކު މި މައްސަލަތައް ހައްލުކުރުމަށް މަސައްކަތް ކުރަމުންދާ ކަމަށްވެސް އޭނާ ފާހަގަކުރެއްވިއެވެ.
