މާލޭގެ އުތުރު ފަރާތު ބޮޑުތަކުރުފާނު މަގު ތަރައްގީކުރުމަށް އެމް.ޓީ.ސީ.ސީ އާ ހަވާލުކޮށްގެން ކުރިއަށްގެންދާ މަޝްރޫއުގެ ފުރަތަމަ ފިޔަވަހީގެ މަސައްކަތްތައް ނިމުމަކާ ގާތްވެފައިވާކަން އެ ކުންފުނިން ހާމަކޮށްފިއެވެ.

މި މަޝްރޫއުގެ ތެރެއިން މިހާރު އެންމެ ބޮޑު ކުރިއެރުމެއް ލިބިފައިވަނީ މަގުގައި ކުރަހަންޖެހޭ ޓްރެފިކް ނިޝާންތަކުގެ މަސައްކަތަށެވެ. އެމް.ޓީ.ސީ.ސީ އިން މައުލޫމާތު ދޭ ގޮތުގައި، މަގު މާކް ކުރުމުގެ ހުރިހާ މަސައްކަތެއް މިހާރު ވަނީ 100 އިންސައްތަ ފުރިހަމަކޮށްފައެވެ.

މީގެ އިތުރުން، މި މަޝްރޫއުގެ ދެވަނަ އަދި ތިންވަނަ ސެގްމަންޓްގެ ޕާކިންގ ޒޯންތަކާއި ދުވާރު ހެދުމުގެ މަސައްކަތްވެސް ވަނީ ކާމިޔާބުކަމާއެކު ނިންމާލާފައެވެ. އަދި އެ ސަރަހައްދުތަކުގައި ކުރަންޖެހޭ އެންމެ ފަހުގެ ފިނިޝިންގ މަސައްކަތްތައް މިއަދުގެ ނިޔަލަށް އެއްކޮށް ނިންމާލެވޭނެ ކަމަށް އެ ކުންފުނިން ލަފާކުރެއެވެ.

މިހާރު ކުރިއަށްދާ މަސައްކަތްތަކަށް ބަލާއިރު، ޕާކިންގ ޒޯންތަކުގައި ރޮނގު ދެމުމާއި، މަގުބައްތި ހަރުކުރުމުގެ މަސައްކަތްތައް ހަލުވިކަމާއެކު ކުރިއަށްދެއެވެ. އެމް.ޓީ.ސީ.ސީ އިން ހާމަކުރި ގޮތުގައި މި މަސައްކަތްތައް މި ހަފުތާގެ ތެރޭގައި އެއްކޮށް ނިންމާލެވޭނެއެވެ.

މިއީ މާލޭގެ އުތުރު ފަރާތުގެ ދަތުރުފަތުރުގެ ނިޒާމު ހަރުދަނާކޮށް، މަގުތަކުގެ ތޮއްޖެހުން ކުޑަކުރުމަށް ރައީސް ޑރ. މުހައްމަދު މުއިއްޒުގެ ސަރުކާރުން އިސްކަންދީގެން ކުރިއަށްގެންދާ މުހިންމު މަޝްރޫއެކެވެ. މި މަޝްރޫއު ނިމުމުން ބޮޑުތަކުރުފާނު މަގުގެ އުތުރު ފަރާތް ބޭނުންކުރާ ފަރާތްތަކަށް ބޮޑެތި ލުއިފަސޭހަތަކެއް ލިބިގެންދާނެއެވެ.