ރާއްޖޭގެ ކަޅުބާޒާރުގައި ޑޮލަރުގެ އަގު އިންތިހާއަށް އުފުލެމުންދާ މައްސަލަ މި ސަރުކާރުގެ ބޮލަށް ޖެހޭކަށް ނެތް ކަމަށާއި، މިއީ ގައުމުގެ ގާނޫނުތަކާއި އުސޫލުތައް ކުރިއްސުރެ ބައްޓަންވެފައިވާ ގޮތުން ދިމާވާ ބޮޑު އިގްތިސާދީ މައްސަލައެއް ކަމަށް ފާހަގަކުރައްވައި، ފަތުރުވެރިކަމުގެ ދާއިރާގެ ތަޖުރިބާކާރު ޝާޒް ވަލީދު ބޮޑެތި ކަންބޮޑުވުންތަކެއް ފާޅުކުރައްވައިފިއެވެ.

ރާއްޖޭގެ މީޑިއާ އަކަށް ދެއްވި ބަސްދީގަތުމެއްގައި ޝާޒް ވިދާޅުވީ ބޭރުގެ އޮންލައިން ޓްރަވެލް އެޖެންސީ (އޯޓީއޭ) ތަކުން ރާއްޖޭގައި އަހަރަކު 600 މިލިއަނާއި 1 ބިލިއަން ޑޮލަރާ ދޭތެރޭގެ ވިޔަފާރިކުރާއިރު، މިއީ މުޅި ޓޫރިޒަމް އިގްތިސާދުގެ 25 އިންސައްތައެވެ. ނަމަވެސް، ގާނޫނީ ހުސްކަމެއްގެ ސަބަބުން މި ފަރާތްތަކުން އަހަރަކު 40 އާއި 60 މިލިއަން ޑޮލަރުގެ ސާފު ފައިދާ ރާއްޖޭގެ ބޭންކުތަކަށް ނުވައްދައި ސީދާ ޑޮލަރުން ބޭރުކުރެއެވެ. މީގެ ސަބަބުން ފަސް އަހަރު ތެރޭގައި 200 މިލިއަނަށްވުރެ ގިނަ ޑޮލަރު އިގްތިސާދުން ގެއްލިގެންދާ ކަމަށެވެ.

ޝާޒް ވިދާޅުވީ، ބޭރުގެ އޯޓީއޭތަކަށް ފައިސާ ފޮނުވުން ތުރުކީވިލާތުގައި ވެސް އޮންނަނީ މަނާކޮށްފައެވެ. އެ މިސާލު ދައްކަވަމުން ޝާޒް ވިދާޅުވީ، ރާއްޖޭގައި މިފަދަ ފިޔަވަޅެއް އަޅިޔަސް ޓޫރިޒަމް ހުއްޓިދާނެ ކަމަށް ބުނާ ވާހަކައަކީ ދޮގެއް ކަމަށާއި ރާއްޖެއަކީ ދުނިޔޭގެ ފެންވަރުގެ ވަރުގަދަ ބްރޭންޑަކަށް ވުމުން ފަތުރުވެރިން ކޮންމެ ގޮތަކުންވެސް ރާއްޖެ އަންނާނެ ކަމަށެވެ.

އޯޓީއޭތަކުގެ އިތުރުން، ކަޅުބާޒާރުގައި ޑޮލަރުގެ ރޭޓު އުފުލެން ދިމާވާ އަނެއް ސަބަބަކީ ބޭރުގެ ކުންފުނިތަކުން ރާއްޖޭގައި ހިންގާ ރިއަލް އެސްޓޭޓް މަޝްރޫއުތަކުން ލިބޭ ބޮޑު ފައިދާ ކަޅުބާޒާރުން ބޮޑުއަގުގައި ޑޮލަރު ގަނެގެން ބޭރުކުރުން ކަމަށް ޝާޒް ފާހަގަކުރެއްވިއެވެ. ބޭރުގެ އިންވެސްޓަރުން ރާއްޖޭގައި 100 މިލިއަން ރުފިޔާގެ އެޕާޓްމަންޓްތައް އަޅާއިރު، ބިންގާ އެޅުމުގެ ކުރިން ބުކިން ފީގެ ގޮތުގައާއި ޝީޓްތައް އެޅުމާ އެކު ދިވެހިންގެ އަތުން ފައިސާ ނަގަމުންދާ ކަމަށާއި، ނަމަވެސް މަޝްރޫއަށް ބޭނުންވާ ހިލައާއި ހިލަވެލި ފަދަ ހުރިހާ މުދަލެއް އެތެރެކުރަނީ އެމީހުންގެ އަމިއްލަ ގައުމުގެ ފައިސާއިން ގަނެގެން ކަމަށް އޭނާ ވިދާޅުވިއެވެ.

ފާހަގަ ކޮށްލަން ޖެހޭ ކަމަކީ ރާއްޖޭގައި އިންޑިއާގެ ޓާޓާ ކުންފުންޏަށް އެތައް މިލިއަން ޑޮލަރެއްގެ ފައިދާ ލިބޭ ގޮތަށް އިމާރާތްތައް އަޅަން ދިނީ އެމްޑީޕީ ސަރުކާރުންނެވެ.

ބޭރުގެ ކުންފުނިތަކުން 8 މިލިއަން ރުފިޔާއަށް އެޕާޓްމަންޓެއްގެ މަގުން 50 އެޕާޓްމަންޓް ވިއްކާލައިގެން 25 އިންސައްތައާއި 35 އިންސައްތައާ ދެމެދުގެ ބޮޑު ސާފު ފައިދާއެއް ހޯދާއިރު ރާއްޖޭގެ އިގްތިސާދަށް ކުރާ އެއްވެސް ފައިދާއެއް ނެތެވެ. އަދި މި މަޝްރޫއުތަކުން ލިބޭ ގާތްގަނޑަކަށް 5 މިލިއަން ޑޮލަރުގެ ސާފު ފައިދާ ބޭރުކުރުމަށްޓަކައި، ކަޅުބާޒާރުގައި ޑޮލަރެއްގެ ރޭޓު 21 ރުފިޔާއަށް ހުރިނަމަވެސް ބޮޑުއަގުގައި ޑޮލަރު ގަނެގެންވެސް އެމީހުންގެ އަމިއްލަ ގައުމަށް ފައިސާ ބޭރުކުރަން ޖެހިލުން ނުވަނީ އެމީހުންގެ ގައުމުގައި މިފަދަ ޕްރޮޖެކްޓަކުން ނުލިބޭ މިންވަރަށް ފައިދާވާތީ ކަމަށާއި، މިއީ ޑޮލަރުގެ ބްލެކްމާކެޓް އުފެދި ފުޅާވާންޖެހޭ މައިގަނޑު ސަބަބެއް ކަމަށް ވިދާޅުވެ ޝާޒް ވަނީ މިކަންކަމަށް ގާނޫނީ ހައްލުތަކެއް ހޯދުމަށް ގޮވާލައްވާފައެވެ.