ސަރުކާރުން ފެނަކަ ކޯޕަރޭޝަނާ ހަވާލުކޮށްފައިވާ 217 މަޝްރޫއެއްގެ އަމަލީ މަސައްކަތް މިއަހަރުގެ ތެރޭގައި ފަށައި، ކުރިއަށް އޮތް ދެ އަހަރު ދުވަހުގެ ތެރޭގައި އެ ހުރިހާ މަސައްކަތްތަކެއް ބާރު ސްޕީޑުގައި ނިންމާލުމަށް އަމާޒު ހިފާފައިވާ ކަމަށް އެ ކުންފުނީގެ މެނޭޖިންގ ޑިރެކްޓަރ މުހައްމަދު އަފީފު ހުސައިން ވިދާޅުވެއްޖެއެވެ.

ދިވެހިރާއްޖޭގެ އަޑުގެ "އަހާށޭ ބުނާނަން" ޕްރޮގްރާމުގައި ވާހަކަ ދައްކަވަމުން އެމްޑީ އަފީފް ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން މަޝްރޫއުތައް ފެނަކަ ފަދަ ސަރުކާރު ހިއްސާވާ ކުންފުނިތަކާ ހަވާލުކުރަނީ އެ މަސައްކަތްތައް ވީހާވެސް އަވަހަށް އަދި ފެންވަރު ރަނގަޅުކޮށް ނިންމުމަށް ކަމަށެވެ.

ފެނަކައާ ހަވާލުކުރެވިފައިވާ 217 މަޝްރޫއުގެ ތެރެއިން ބައެއް މަސައްކަތްތައް ނުފެށި ހުރިކަން ފާހަގަކުރައްވަމުން އަފީފް ވިދާޅުވީ، މިހާރު އެންމެ ބޮޑު އިސްކަމެއް ދެނީ ސައިޓުތަކުގެ ތައްޔާރީތައް ނިންމައި އަމަލީ މަސައްކަތް އަވަހަށް ފެށުމަށް ކަމަށެވެ. އެގޮތުން އޭނާ ކުންފުންޏާ ހަވާލުވި ފަހުން ވީ ދެ މަސްދުވަހުގެ ތެރޭގައި 6 ސައިޓެއްގެ މަސައްކަތް ވަނީ އަލުން ފަށާފައެވެ.

މަސައްކަތްތައް ކުރިއަށް ގެންދިއުމުގައި ކޭޝްފްލޯގެ ދަތިތަކެއް ހުރި ނަމަވެސް، އެ ގޮންޖެހުންތަކާ އެކުވެސް މަސައްކަތް ހުއްޓާނުލައި ކުރިއަށް ގެންދިއުމަކީ ކުންފުނީގެ އަމާޒެވެ. އަދި މީގެ ކުރިން މަޝްރޫއުތައް ހިންގުމުގައި ދިމާވި އިދާރީ އަދި ލޮޖިސްޓިކް މައްސަލަތަކަށްވެސް އަފީފް އަލިއަޅުވާލެއްވިއެވެ. އެގޮތުން، ބައެއް ސައިޓުތަކަށް ބޭނުންވާ ތަކެތި ތަރުތީބެއް ނެތި ގެންދިއުމުގެ ސަބަބުން ތަކެތި ހަލާކުވެ، ގެއްލުންތަކެއް ވެފައިވާކަން އޭނާ ފާހަގަކުރެއްވިއެވެ.

އަފީފް އިތުރަށް ވިދާޅުވީ، މަޝްރޫއުތައް ލަސްވާނަމަ ރައްޔިތުންގެ އިތުބާރު ގެއްލޭނެ ކަމަށާއި، އެހެންކަމުން ރައީސުލްޖުމްހޫރިއްޔާގެ ވަޢުދުތަކުގެ ތެރޭގައި ހިމެނޭ މި މަސައްކަތްތައް 2028 ވަނަ އަހަރުގެ ނިޔަލަށް އެއްކޮށް ނިންމަވާނެ ކަމުގެ ޔަގީންކަން ދެއްވާ ކަމަށެވެ. މީގެ އިތުރުން ކުންފުނީގެ އެތެރޭގެ ހިންގުން ހަރުދަނާކޮށް، އަމިއްލަ މަސައްކަތްތައްވެސް އަވަސް ކުރުމަށް މިހާރު ދަނީ މަސައްކަތް ކުރަމުންނެވެ.