ސަރުކާރުން ކުރިއަށްގެންދާ ސޯޝަލް ހައުސިންގް މަޝްރޫއުތަކުގެ ދަށުން ބޯހިޔާވަހިކަން ފޯރުކޮށްދިނުމުގައި، އެއްވެސް ސިޔާސީ ނުފޫޒެއް ނެތި، އިންސާފުވެރިކަމާއި ހަމަހަމަކަމާއެކު ކަންކަން ކުރިއަށް ގެންދަވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ.
"ނޭޝަން ޗެޓް" ޕްރޮގްރާމުގައި ވާހަކަފުޅު ދައްކަވަމުން ރައީސް ވިދާޅުވީ، މި ސަރުކާރުގެ ބޯހިޔާވަހިކަމުގެ ސިޔާސަތުތައް ތަންފީޒު ކުރުމުގައި އެއްވެސް މީހަކަށް ވަކި ގޮތެއް ނޯންނާނެ ކަމަށެވެ. އަދި ބޯހިޔާވަހިކަމަކީ އަސާސީ ހައްގަކަށް ވީހިނދު، ސަރުކާރުން ދޫކުރާ ފްލެޓްތަކާއި ގޯތިތައް ބަހާނީ ހަމަހަމަ އުސޫލެއްގެ ދަށުން ކަމަށް އެމަނިކުފާނު ވިދާޅުވިއެވެ.
ރައީސް އިތުރަށް ވިދާޅުވި ގޮތުގައި، ހައުސިންގް ސްކީމްތަކަށް ހުށަހަޅާފައިވާ ފޯމުތައް މުރާޖައާ ކުރުމުގެ މަސައްކަތް މިހާރު ކުރިއަށްދާއިރު، އެ މަސައްކަތުގައި ހަރަކާތްތެރިވާ އޮފިޝަލުންނަށް ފުރިހަމަ އިތުބާރު އެބައޮތް ކަމަށެވެ. އަދި އެއްވެސް މީހަކަށް ނުޙައްގުން މަންފާއެއް ލިބޭނެ ފުރުސަތެއް މި ސަރުކާރުން ނުދޭނެ ކަމަށްވެސް ރައީސް ތަކުރާރު ކުރެއްވިއެވެ.
Advertisement
މާލެ ސިޓީގެ ތަރައްގީއާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، މާލޭގެ މަގުތައް ހެދުމަކީ މިވަގުތު ކުރިމަތިވެފައިވާ އެންމެ ބޮޑު އެއް ގޮންޖެހުން ކަމަށެވެ. މަގުތަކުގެ ފެންވަރު ރަނގަޅު ކުރުމާއި، ފެންބޮޑުވުމުގެ މައްސަލަ ހައްލުކުރުމުގެ އިތުރުން، ޕާކިންގްގެ ދަތިކަމަށް ދާއިމީ ހައްލެއް ހޯދުމަށް ގިނަ މަސައްކަތްތަކެއް ކުރެވެމުންދާ ކަމަށް އެމަނިކުފާނު ފާހަގަކުރެއްވިއެވެ. ނަމަވެސް، މިކަންކަމަށް ދާއިމީ ހައްލެއް ލިބޭނީ ރައްޔިތުންގެ ފަރާތުންވެސް އެއްބާރުލުން ލިބިގެން ކަމަށް ރައީސް ވިދާޅުވިއެވެ.
ސަރުކާރުން ރައްޔިތުންނާ ގާތުން މަސައްކަތް ކުރުމަށް ގެންގުޅޭ ސިޔާސަތުގެ ދަށުން، ކޮންމެ އިންތިހާބީ ދާއިރާއެއްގެ ރައްޔިތުންނާ ސީދާ ބައްދަލުކޮށް މަޝްވަރާ ކުރުމަށްޓަކައި، ކައިރި މުސްތަގުބަލެއްގައި ހާއްސަ ޕްރޮގްރާމެއް ފަށްޓަވާނެ ކަމަށްވެސް ރައީސުލްޖުމްހޫރިއްޔާ ވަނީ އިއުލާން ކުރައްވާފައެވެ.
