ފެނަކަ ކޯޕަރޭޝަން ލިމިޓެޑްގެ ހިންގުމުގެ ހަރަދުތައް ކުޑަކޮށް، ކުންފުނީގެ މާލީ ހާލަތު ރަނގަޅު ކުރުމަށްޓަކައި ކުރިއަށްގެންދާ "ރައިޓްސައިޒް" ކުރުމުގެ މަސައްކަތުގެ ދަށުން، އަމިއްލައަށް ވަޒީފާއިން ވަކިވާން 97 މުވައްޒަފަކު ހުށަހަޅާފައިވާ ކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު އަފީފް ހުސެއިން ވިދާޅުވެއްޖެއެވެ.
އަފީފް ވިދާޅުވީ، ކުންފުނި ހަމަމަގަށް އެޅުވުމަށްޓަކައި މުވައްޒަފުންގެ އަދަދު މަދުކުރުމަކީ ކޮންމެހެން ކުރަންޖެހޭ ކަމެއް ކަމަށެވެ. މިގޮތުން، އަމިއްލައަށް ވަޒީފާއިން ވަކިވާން ބޭނުންވާ މުވައްޒަފުންނަށް 10 ދުވަހުގެ މުއްދަތެއް ދީ، އެ މުއްދަތުގެ ތެރޭގައި ވަކިވާ މީހުންނަށް ހަތަރު މަސް ދުވަހުގެ މުސާރަ އެއްފަހަރާ އިނާޔަތެއްގެ ގޮތުގައި ދިނުމަށް ވަނީ ނިންމާފައެވެ.
"އެޑްވާންސް މުސާރަ ދިނުމުން އަމިއްލައަށް ވަޒީފާއިން ވަކިވެވޭ ގޮތަށް ހުޅުވާލުމުން މާލެއާއި އަތޮޅުތެރޭގެ ސައިޓުތައް ހިމަނައިގެން ޖުމްލަ 97 މުވައްޒަފުން މިހާރު ވަނީ ވަކިވާން ހުށަހަޅާފަ،" އަފީފް ވިދާޅުވިއެވެ.
Advertisement
ފެނަކައިގެ މެނޭޖިން ޑިރެކްޓަރު ފާހަގަކުރެއްވި ގޮތުގައި، އޭނާ މަގާމާ ހަވާލުވެވަޑައިގަތްއިރު ކުންފުނީގެ ޕޭރޯލްގައި 8,000 އެއްހާ މުވައްޒަފުން ތިއްބެވެ. އެ މުވައްޒަފުންނަށް މުސާރަ ދިނުމަށް އެކަނިވެސް މަހަކު ގާތްގަނޑަކަށް 90 މިލިއަން ރުފިޔާ ހަރަދުވާކަން އޭނާ ހާމަކުރެއްވިއެވެ. އޭނާ ވިދާޅުވީ، ކުރީ ސަރުކާރުތަކުން ސިޔާސީ ބޭނުމަށް ގިނަ އަދަދެއްގެ މުވައްޒަފުން ކުންފުންޏަށް ވައްދާފައިވާ ކަމަށާއި، އޭގެ ތެރޭގައި ލިޔަންކިޔަން ނޭނގޭ މީހުންނާއި ޑިއުޓީ ގަޑީގައި މަސައްކަތަށް ނުގޮސް ގޭގައި ތިބޭ މީހުންވެސް ހިމެނޭ ކަމަށެވެ.
ކުންފުނިން އިތުރަށް ހާމަކުރި ގޮތުގައި، ބައެއް ޕްރޮޖެކްޓްތަކަށް ބޭނުންވާ މުދަލާއި ތަކެތި ނެތުމުގެ ސަބަބުން މަސައްކަތް ކުރިއަށް ނުގެންދެވި، އެކި ރަށްރަށުގައި ކުރާނެ މަސައްކަތެއް ނެތި ގިނަ އަދަދެއްގެ މުވައްޒަފުން އެބަ ތިއްބެވެ. މިފަދަ އިސްރާފުތަކުގެ ސަބަބުން ކުންފުނީގެ މުހިންމު މަޝްރޫއުތަކަށް ބޭނުންވާ ފައިސާ ހޯދުމަށް ދަތިތަކާ ކުރިމަތިލާން ޖެހިފައިވެއެވެ.
ފެނަކައިން އުންމީދު ކުރަނީ މިހާރު ފަށާފައިވާ އިސްލާހީ މަސައްކަތްތަކުގެ ސަބަބުން ކުންފުނީގެ އުފެއްދުންތެރިކަން އިތުރުވެ، ރައްޔިތުންނަށް ދޭ ހިދުމަތުގެ ފެންވަރު ރަނގަޅުވެގެން ދާނެ ކަމަށެވެ. މިއީ ކުންފުނި އިސްލާހުކުރުމަށް އެކުލަވާލާފައިވާ ހާއްސަ ސިޔާސަތުގެ ދަށުން އެޅުނު ފުރަތަމަ ފިޔަވަޅު ކަމަށްވެސް އެ ކުންފުނިން ބުނެއެވެ.
