ދިވެހިރާއްޖޭގެ ގައުމީ ބޭންކް، ބޭންކް އޮފް މޯލްޑިވްސް (ބީއެމްއެލް) އިން ކާޑުތަކަށް ކަނޑައަޅާފައިވާ ޑޮލަރު ލިމިޓަށް މި މަހުގެ ފަހުކޮޅު ބޮޑު ލުޔެއް ދޭނެ ކަމުގެ އިޝާރާތެއް ލިބިފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ބީއެމްއެލް އިން މިހާރު ޑޮލަރު ލިމިޓްތަކެއް ހިފަހައްޓާފައިވަނީ ބޭންކަށް ދިމާވެފައިވާ ބޭރު ފައިސާގެ ދަތިތަކާ ގުޅިގެން ކަމަށެވެ. ނަމަވެސް، ރައީސް އޮފީހުން އެކަމާ ގުޅޭ މައުލޫމާތު ބޭންކުން ހޯދިއިރު، މި މަސް ނިމޭ ހިސާބުން "ވަރަށް ބޮޑުތަނުން" އެ ލިމިޓަށް ލުޔެއް ދޭނެ ކަމުގެ އިޝާރާތެއް ބޭންކުން ދީފައިވާ ކަމަށް އެމަނިކުފާނު ވިދާޅުވިއެވެ.

ބޭރުގެ އީކޮމާސް ސައިޓުތަކުން މުދާ ގަތުމަށް ދިވެހިން އާންމުކޮށް ބޭނުންކުރާ ބީއެމްއެލް ޑެބިޓް ކާޑުތަކުގެ ލިމިޓް މީގެ ކުރިން އޮތީ 250 ޑޮލަރުގައެވެ. މިދިޔަ އަހަރު އެ އަދަދު 500 ޑޮލަރަށް ބޮޑުކުރި ނަމަވެސް، ބޭންކަށް ޑޮލަރު ލިބުމުގައި ހުރި ދަތިތަކާ ހުރެ ފަހުން ވަނީ ހުރިހާ ޑެބިޓް ކާޑުތަކަކަށް ވަކި ލިމިޓެއް ކަނޑައަޅާފައެވެ. މީގެ އިތުރުން، ބޭރުގެ ބައެއް ސައިޓުތަކުން ކުރާ ކޮންމެ މުއާމަލާތަކުން 30 އިންސައްތައިގެ ފީއެއް ނަގަން ވެސް ބޭންކުން ވަނީ ނިންމާފައެވެ.

ބޭންކުން މީގެ ކުރިން ބުނެފައިވާ ގޮތުގައި، ރުފިޔާ ކާޑުތަކުން އޮންލައިންކޮށް ވިޔަފާރިކުރާ މިންވަރު އިންތިހާއަށް އިތުރުވުމުގެ ސަބަބުން، މަދު ބަޔަކަށް ގިނަ އަދަދެއްގެ ޑޮލަރު ވިއްކަން ޖެހުމަކީ އެހެން ކަސްޓަމަރުންނަށް ޑޮލަރު ލިބުމަށް އޮތް ހުރަހެކެވެ. އެހެންކަމުން، ލިމިޓްތައް ކަނޑައެޅީ ހުރިހާ ރައްޔިތުންނަށް ވެސް ހަމަހަމަކަމާއެކު ޑޮލަރު ފޯރުކޮށްދިނުމުގެ ބޭނުމުގައެވެ.