ފެނަކަ ކޯޕަރޭޝަނާ ހަވާލުކޮށްގެން ރާއްޖޭގެ އެކި ކަންކޮޅުތަކުގައި ކުރިއަށްގެންދާ ތަރައްގީގެ ގިނަ މަޝްރޫތަކެއް މިއަހަރުގެ ނިޔަލަށް އެއްކޮށް ނިންމާލުމަށް ބާރުސްޕީޑުގައި މަސައްކަތް ކުރަމުންދާކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު އަފީފް ހުސައިން ވިދާޅުވެއްޖެ އެވެ.
ދައުލަތުގެ މީޑިއާއަށް ދެއްވި ހާއްސަ އިންޓަވިއުއެއްގައި އަފީފް ވިދާޅުވީ، މަގާމާ ހަވާލުވިއިރު ކުންފުނީގެ މާލީ ނިޒާމާއި ހިންގުން އޮތީ ވަރަށް ދަށު ދަރަޖައެއްގައި ކަމަށެވެ. މީގެ ސަބަބުން މަޝްރޫތައް ކުރިއަށްގެންދިއުމުގައި ބޮޑެތި ގޮންޖެހުންތަކަކާ ކުރިމަތިވި ނަމަވެސް، މިހާރު ކުންފުނީގެ އޮނިގަނޑު އިސްލާހުކޮށް، ހިންގުން ހަރުދަނާކުރުމަށް ގިނަ ބަދަލުތަކެއް ގެންނަމުންދާކަން އަފީފް ފާހަގަކުރެއްވި އެވެ.
ފެނަކައިން ރަށްރަށުގައި ފޯރުކޮށްދޭ ކަރަންޓާއި، ފެނާއި، ނަރުދަމާގެ އަސާސީ ހިދުމަތްތަކުގެ އިތުރުން، ސަރުކާރުގެ ޕީއެސްއައިޕީ ބަޖެޓުގެ ދަށުން ހިންގާ ގިނަ މަޝްރޫތަކެއް އެ ކުންފުންޏާ ވަނީ ހަވާލުކޮށްފަ އެވެ. އެގޮތުން ރާއްޖޭގެ 35 ރަށެއްގައި ޖުމްލަ 48 މަޝްރޫއެއްގެ މަސައްކަތް މިހާރުވެސް ހިނގަމުންދާކަމަށް އަފީފް ވިދާޅުވި އެވެ. މީގެ ތެރެއިން 6 ރަށެއްގެ މަޝްރޫތައް މިހާރު އެއްކޮށް ނިމިފައިވާއިރު، އިތުރު 6 ރަށެއްގެ މަސައްކަތްތައް ހަލުވި ދުވެއްޔެއްގައި ކުރިއަށްދާކަން އަފީފް ފާހަގަކުރެއްވި އެވެ.
Advertisement
މި މަޝްރޫތަކުގެ ތެރޭގައި ހަމައެކަނި އަސާސީ ހިދުމަތްތަކެއް ނޫނެވެ. ބައެއް ރަށްރަށުގެ ޕޮލިސް ޕޯސްޓުތަކާއި، ސްކޫލްތަކުގެ އިމާރާތްތަކާއި އަދި ހޮސްޕިޓަލްތަކުގެ ބިނާކުރުމުގެ މަސައްކަތްތައްވެސް ފެނަކައިން ދަނީ ކުރަމުންނެވެ.
މަޝްރޫތައް ނިންމުމަށް ރާވާފައިވާ ތާވަލާ ގުޅޭގޮތުން ތަފްސީލު ދެއްވަމުން އަފީފް ވިދާޅުވީ، ބައެއް މަޝްރޫތަކުގެ މަސައްކަތްތައް ކުރިއަށް އޮތް 3 ނުވަތަ 4 މަސްދުވަހުގެ ތެރޭގައި ނިންމާލެވޭނެ ކަމަށެވެ. އަދި ބޮޑުބައި މިއަހަރުގެ ނިޔަލަށް ނުވަތަ އެންމެ ލަސްވެގެން އަންނަ 2027 ވަނަ އަހަރުގެ ޖެނުއަރީގެ ނިޔަލަށް ނިންމުމަށް އަމާޒުހިފާފައިވާކަމަށް އަފީފް ވިދާޅުވި އެވެ.
ރަށްރަށުގައި މަޝްރޫތައް ކުރިއަށްގެންދާއިރު، މަސައްކަތަށް ބޭނުންވާ މާއްދީ ތަކެއްޗާއި ސާމާނު ލޮޖިސްޓިކްސްގެ ތެރެއިން ފޯރުކޮށްދިނުމުގައްޔާއި، މަސައްކަތްތައް ހިންގާނެ ފަންނީ އަދި ގާބިލު މުވައްޒަފުން ހޯދުމުގައި ދަތިތަކަކާ ކުރިމަތިވަމުންދާކަން ފެނަކައިން ފާހަގަކުރި އެވެ.
