އިންޑިއާއަށް ދަތުރުކުރާ ދިވެހީން ހިމެނޭ ގޮތަށް، އެ ގައުމަށް އެތެރެވާ ހުރިހާ ދަތުރުވެރިން ސެލްފް ޑެކްލަރޭޝަން ފޯމު (އެސްޑީއެފް) ހުށަހަޅަން ޖެހޭ ގޮތަށް އިންޑިއާގެ ޑައިރެކްޓާ ޖެނެރަލް އޮފް ސިވިލް އޭވިއޭޝަން (ޑީޖީސީއޭ) އިން ނިންމައިފި އެވެ.

މި ފިޔަވަޅަކީ ދުނިޔޭގެ އެކި ހިސާބުތަކުގައި ފެތުރެމުންދާ އެބޯލާ ބައްޔާ ގުޅިގެން ރައްކާތެރިކަމުގެ ގޮތުން އެޅި ފިޔަވަޅެކެވެ. އިންޑިއާގެ ސިވިލް އޭވިއޭޝަނުން މިގޮތަށް ނިންމާފައިވަނީ އެބޯލާ ބައްޔަކީ ބައިނަލްއަގްވާމީ ފެންވަރެއްގައި އާންމު ސިއްހަތަށް އޮތް ކުއްލި ނުރައްކަލެއްގެ ގޮތުގައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަނޑައެޅުމާ ގުޅިގެންނެވެ.

މި އާ އުސޫލުގެ ދަށުން، އިންޑިއާއަށް ދަތުރުކުރާ ކޮންމެ މީހަކު ވެސް އެ މީހެއްގެ ސިއްހީ ހާލަތު ބަޔާންކޮށް ފޯމު ފުރިހަމަކުރަން ޖެހޭނެ އެވެ. ރާއްޖޭގެ ގައުމީ އެއާލައިން، މޯލްޑިވިއަން އިން ވަނީ އިންޑިއާ ސަރުކާރުގެ މި ނިންމުމާ އެއްގޮތަށް އަމަލުކުރުމަށް ދަތުރުވެރިންނަށް އިލްތިމާސްކޮށްފަ އެވެ. މޯލްޑިވިއަންއިން ބުނި ގޮތުގައި މި ފޯމު އެ އެއާލައިންގެ ވެބްސައިޓް މެދުވެރިކޮށް ލިބެން ހުންނާނެ އެވެ. އަދި ފުރިހަމަކޮށްފައިވާ ފޯމު އިންޑިއާއަށް ދިއުމަށްފަހު އެ ގައުމުގެ ހެލްތު އަދި އިމިގްރޭޝަން ކައުންޓަރުތަކަށް ހުށަހަޅަން ޖެހޭނެ ކަމަށްވެސް އެ އެއާލައިނުން ބުންޏެވެ.

އިންޑިއާގެ ކަމާބެހޭ ފަރާތްތަކުން މިހާރު ދަނީ އެ ގައުމަށް އެތެރެވާ މީހުންގެ ތެރެއިން އެބޯލާގެ އަލާމާތްތައް ހުރި ކަމަށް ޝައްކުކުރެވޭ ފަރާތްތައް ސްކްރީން ކުރަމުންނެވެ. މިހާތަނަށް ޓެސްޓު ކުރި އެންމެންގެ ނަތީޖާ ނެގެޓިވް ވި ނަމަވެސް، ރައްކާތެރިކަމުގެ ފިޔަވަޅެއްގެ ގޮތުން އެ ފަރާތްތައް ވަނީ ކަރަންޓީނުކޮށްފަ އެވެ. މީގެ އިތުރުން، ފްލައިޓްތަކުގެ ތެރޭގައި ވެސް ސިއްހީ ރައްކާތެރިކަމުގެ މައުލޫމާތު ދިނުމަށް އިންޑިއާގެ ކަމާބެހޭ އިދާރާތަކުން ވަނީ އެއާލައިންތަކަށް އަންގާފަ އެވެ.

މިކަމާ ގުޅިގެން އެޗްޕީއޭއިން ބުނެފައިވަނީ ރާއްޖެއަށް އެބޯލާ އައުމުގެ ފުރުސަތު ކުޑަ ކަމަށެވެ. އެހެންނަމަވެސް، ބަލި ފެތުރޭ ސަރަހައްދުތަކަށް ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށާއި، ސިއްހީ އިދާރާތަކުން ދޭ އިރުޝާދުތަކަށް ސަމާލުވުމަށް އެޗްޕީއޭ އިން ވަނީ އާމުންނަށް އިލްތިމާސްކޮށްފަ އެވެ.