މި ދުވަސްވަރު ރާއްޖޭގެ އަތޮޅުތަކަށް، ހާއްސަކޮށް އުތުރާއި މެދުރާއްޖެތެރޭގެ އަތޮޅުތަކަށް ކުރިއަށް އޮތް ތިން ދުވަހު ދުންފުހުގެ އަސަރު ބޮޑުވާނެ ކަމަށް މޫސުމާ ބެހޭ އިދާރާއިން ލަފާކުރުމާ ގުޅިގެން، ސިއްހީ ގޮތުން ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.
މިއަސް (21 ނޮވެމްބަރު 2026) ގައި އެޗްޕީއޭއިން އާންމުކުރި ތަފާސްހިސާބުތަކުން ދައްކާ ގޮތުގައި، ކުޅުދުއްފުށި ސިޓީ، ކ. ވިލިނގިލި، ށ. ފުނަދޫ އަދި މާލޭގައި ވައި ނުސާފު މިންވަރު ވަނީ ސިއްހަތަށް ނުރައްކާވާ މިންވަރަށް (ރަތް ސަމާލު ލެވެލްއަށް) ދަށްވެފައެވެ. މީގެ އިތުރުން އައްޑޫ ސިޓީ، ފުވައްމުލައް، ލ. ގަން އަދި ދ. ކުޑަހުވަދޫ ފަދަ ދެކުނުގެ ސަރަހައްދުތަކުގައި ވައިގެ ކޮލިޓީ ހުރީ މެދުމިނުގައެވެ.
މި ހާލަތުގައި ރައްކާތެރިވުމުގެ ގޮތުން، ވައި ނުސާފު ސަރަހައްދުތަކުގައި ބޭރުގައި ކުޅިވަރު ކުޅުމާއި ކަސްރަތުކުރުން ފަދަ ހަރަކާތްތައް މަޑުޖައްސާލުމަށް އެޗްޕީއޭއިން އިރުޝާދު ދެއެވެ. އަދި ބޭރަށް ނުކުންނަ ނަމަ އެން95 ނުވަތަ އެފަދަ ފެންވަރު ރަނގަޅު މާސްކެއް އެޅުމަށާއި، ބޭރުގެ ނުސާފު ވައި ނުވަންނާނެހެން ގޭގެ ދޮރުތަކާއި ކުޑަދޮރުތައް ލައްޕާފައި ބެހެއްޓުމުގެ އިތުރުން، ލިބެން ހުރި ނަމަ އެއާ ޕިއުރިފަޔާ ބޭނުންކުރުމަށްވެސް ވަނީ އަންގާފައެވެ.
ވައި ސާފު މިންވަރު ވަގުތުން ވަގުތަށް ބެލުމަށްޓަކައި މިނިސްޓްރީ އޮފް ޓޫރިޒަމް އެންޑް އެންވަޔަރަމެންޓްގެ ވެބްސައިޓްގައިވާ 'އައިކިއުއެއާ' ލިންކު މެދުވެރިކޮށް ނުވަތަ 'އައިކިއުއެއާ ވިޝުއަލް' އެޕް ބޭނުންކުރުމަށް އެޗްޕީއޭއިން އެދެއެވެ.




