މާލެ ސަރަހައްދުން ވޭތުވެދިޔަ ހަފްތާގައި އިތުރު ބަޔަކު ހިމަބިއްސަށް ފައްސިވުމާ ގުޅިގެން، މި އަހަރުގެ މިހާތަނަށް ރާއްޖޭގައި މި ބަލި ޖެހުނު މީހުންގެ ޖުމްލަ އަދަދު 144 އަށް އަރައިފި އެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، ނިމިދިޔަ ހަފްތާގައި އެކަނިވެސް މާލެ ސަރަހައްދުން ހިމަބިހީގެ 23 ވޭދަނަ ވަނީ ފެނިފަ އެވެ. ބަލި ފެތުރުން ހުއްޓުވުމަށް ކުރެވެމުންދާ މަސައްކަތުގެ ދަށުން، މިހާތަނަށް 7,100 މީހުންނަށް ހިމަބިހީގެ ވެކްސިން ދީފައިވާ ކަމަށް އެޗްޕީއޭއިން ބުންޏެވެ.
ބަލިން ރައްކާތެރިވުމުގެ ގޮތުން، ހިމަބިހީގެ ދެ ޑޯޒް ފުރިހަމަކޮށްފައިވާކަން ޔަގީންނުވާ ފަރާތްތަކުން ލަސްނުކޮށް ވެކްސިން ފުރިހަމަކުރުމަށް އެޗްޕީއޭއިން ވަނީ އިލްތިމާސްކޮށްފައި އެވެ. އަދި ބަލިޖެހިފައިވާ މީހަކާއި ގާތުން އެއްތާވި (ކޮންޓެކްޓްވި) ފަރާތްތަކަށް ހުޅުމާލޭ ހޮސްޕިޓަލް ނުވަތަ އާބަން ޕްރައިމަރީ ހެލްތް ކެއާ ސެންޓަރުން ކަނޑައެޅިފައިވާ ގަޑިތަކުގައި ވެކްސިން ޖެހޭނެ އިންތިޒާމު ވަނީ ހަމަޖައްސާފަ އެވެ.
Advertisement
މާލެ ސަރަހައްދުގެ ހޮސްޕިޓަލްތަކުގެ އިތުރުން، އަތޮޅުތަކުގެ ހޮސްޕިޓަލްތަކާއި ރަށްރަށުގެ ސިއްހީ މަރުކަޒުތަކުން ވެސް ކަނޑައެޅިފައިވާ ގަޑިތަކުގައި ވެކްސިންގެ ހިދުމަތް ލިބޭނެ އެވެ.
މާލެ ސަރަހައްދުގައި ހިމަބިހި ވެކްސިން ދޭ ތަންތަނާއި ގަޑިތައް:
- އާބަން ޕްރައިމަރީ ހެލްތް ކެއާ ސެންޓަރު (ޔޫޕީއެޗްސީސީ): އާދިއްތަ - ބުރާސްފަތި (08:30 އިން 12:00 އަށް)
- ހުޅުމާލޭ ހޮސްޕިޓަލް: އާދިއްތަ، ހޯމަ، އަންގާރަ (09:00 އިން 11:00 އަށް). ބުދަ، ބުރާސްފަތި، ހޮނިހިރު (13:00 އިން 15:00 އަށް)
- ސެނެހިޔާ ހޮސްޕިޓަލް: އާދިއްތަ - ބުރާސްފަތި (10:00 އިން 16:00 އަށް)
- ވިލިމާލެ ހޮސްޕިޓަލް: އާދިއްތަ - ބުރާސްފަތި (13:30 އިން 15:30 އަށް)
- ބަލިމީހުންނާ އެއްތާވި ފަރާތްތަކަށް ވެކްސިން ދޭ ގަޑިތައް:
- ޔޫޕީއެޗްސީސީ: އާދިއްތަ - ބުރާސްފަތި (14:00 އިން 15:30 އަށް)
- ހުޅުމާލޭ ހޮސްޕިޓަލް: ހުކުރު ދުވަސް ފިޔަވައި ކޮންމެ ދުވަހަކު (09:00 އިން 11:00 އަށް)
އެގޮތުން، ބަލީގެ އެއްވެސް އަލާމާތެއް ފެނިއްޖެނަމަ ލަސްނުކޮށް ސިއްހީ އެހީތެރިކަން ހޯދުމަށާއި، ވެކްސިން ފުރިހަމަކުރުމަށް ސަމާލުކަން ދިނުމަށް ސިއްހީ މާހިރުންދަނީ އިރުޝާދު ދެއްވަމުންނެވެ.
