ރާއްޖޭގެ ފިނިހޫނުމިން އާންމު މިންވަރަށްވުރެ މައްޗަށް ދާތީ، ހޫނުގެ ސަބަބުން ކުރިމަތިވެދާނެ ސިއްހީ މައްސަލަތަކުން ރައްކާތެރިވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފި އެވެ.

އެޗްޕީއޭއިން ބުނި ގޮތުގައި، މި ދުވަސްވަރު ހޫނު ގަދަވުމުގެ ސަބަބުން "ހީޓް އެކްޒޯސްޝަން" ނުވަތަ ހޫނު ގަދަވެގެން ވަރުބަލިވުމާއި، ފުރާނައަށް ނުރައްކާވެދާނެ ފަދަ ސީރިއަސް ހާލަތެއް ކަމަށްވާ "ހީޓް ސްޓްރޯކް" ޖެހުމުގެ ފުރުސަތު ބޮޑުވެގެންދެ އެވެ. އެހެންކަމުން މިފަދަ ހާލަތްތަކުގައި ފެންނާނެ އަލާމާތްތަކަށް ހުރިހާ ފަރާތްތަކުންވެސް ސަމާލުވެ، ކުއްލި ނުރައްކަލުގެ ހާލަތްތަކުގައި އަވަސް ފިޔަވަޅު އެޅުމަށް އެ އޭޖެންސީން ވަނީ އެދިފަ އެވެ.

ހީޓް ސްޓްރޯކް ޖެހުމުން ފެނިދާނެ މައިގަނޑު އަލާމާތްތަކުގެ ތެރޭގައި:

1. ބޮލަށް އެނބުރުން އެރުން، މޫނުމައްޗަށް އަނދިރިވުން ނުވަތަ ހޭނެތުން
2. ހަށިގަނޑުގެ ހޫނުމިން އާދަޔާ ޚިލާފަށް މައްޗަށް ދިއުން (40 ޑިގްރީ ސެލްސިއަސް ނުވަތަ އެއަށްވުރެ މަތިވުން)
3. ހަންގަނޑު ރަތްވެ، އާދަޔާ ޚިލާފަށް ހޫނުވުން
4. ވިންދު ޖަހާ މިންވަރު އަވަސްވެ، ނޭވާލާން އުނދަގޫވުން

ހޫނުގެ އަސަރުކޮށްގެން ހީޓް ސްޓްރޯކްގެ އަލާމާތެއް ފެނިއްޖެނަމަ އަޅަންޖެހޭ އަވަސް ފިޔަވަޅުތަކުގެ ތެރޭގައި، ލަސްނުކޮށް އެމަޖެންސީ ހިދުމަތުގެ ނަންބަރު 100 އަށް ގުޅައި ސިއްހީ އެހީތެރިކަން ހޯދުމާއި، ހިޔާވާ ސަރަހައްދަކަށް ނުވަތަ އޭސީ ކޮށްފައިވާ ފިނި ތަނަކަށް ބަދަލުވުން ހިމެނެ އެވެ. އަދި ބާރު އަންނައުނެއް ލައިގެން ހުރިނަމަ ދޫ އަންނައުނަކަށް ބަދަލުކުރުމާއި، ތެތް ފޮތިކޮޅަކުން ހަށިގަނޑުގައި ފިނިފެން އުނގުޅައިގެން ހަށިގަނޑު ފިނިކުރުން ހިމެނެ އެވެ. މީގެއިތުރުން ހޭވެރިކަން ނެތްނަމަ އަނގަޔަށް އެއްވެސް އެއްޗެއް (ފެންވެސް) ނުދިނުމަށާއި، ހޭވެރިކަން ހުރިނަމަ ފެންފޮދެއް ދިނުމަށް އެޗްޕީއޭއިން ވަނީ އިރުޝާދު ދީފަ އެވެ.

ރާއްޖޭގެ ހޫނުމިނަށް ބަލާއިރު، މިއަދު އިހްސާސް ކުރެވޭ ފިނިހޫނުމިން އެންމެ މަތިވާނެ ކަމަށް ލަފާކޮށްފައިވަނީ ގދ. ކާޑެއްދޫއަށެވެ. އެއީ 37.3 ޑިގްރީ ސެލްސިއަސްގަ އެވެ. އަދި މާލެ ސަރަހައްދުގައި މިއަދު އިހުސާސްކުރެވޭ ހޫނުމިން ހުރީ 34 ޑިގްރީ ސެލްސިއަސްގަ އެވެ.

މޫސުމާ ބެހޭ ގައުމީ އިދާރާއިން ހާމަކުރި ގޮތުގައި، ޕެސިފިކް ކަނޑުގައި އެލްނީނޯގެ ބާރު ގަދަވަމުންދާތީ، މި މަހުން ފެށިގެން ނޮވެންބަރު މަހުގެ ނިޔަލަށް ރާއްޖޭގެ ފިނިހޫނުމިން އާންމުކޮށް ހުންނަ ވަރަށްވުރެ މަތިވާނެ ކަމަށް ލަފާކުރެވެ އެވެ. އަދި މި މުއްދަތުގައި މެދުރާއްޖެތެރެއަށް އާންމު މިންވަރަށްވުރެ އިތުރަށް ވާރޭ ވެހޭނެ ކަމަށް ބެލެވުނު ނަމަވެސް، ދެކުނުގެ އަތޮޅުތަކަށް ވާރޭވެހޭ މިންވަރު މަދުވާނެ ކަމަށް ވަނީ ލަފާކޮށްފަ އެވެ.

އެހެންކަމުން، ދުވާލުގެ ހޫނުގަދަ ވަގުތުތަކުގައި ބޭރުގައި އުޅުން މަދުކުރުމަށާއި، ގިނަގިނައިން ފެން ބުއިމަށް އެޗްޕީއޭއިން ވަނީ އިލްތިމާސްކޮށްފަ އެވެ. ހާއްސަކޮށް ކުޑަކުދިންނާއި، އުމުރުން ދުވަސްވީ މީހުން އަދި ދާއިމީ ބަލިތަކަށް ފަރުވާ ހޯދާ ފަރާތްތަކުން މި ދުވަސްވަރު ސިއްހަތަށް ޚާއްސަ ސަމާލުކަމެއް ދިނުމަށް އެޗްޕީއޭއިން ވަނީ އެދިފަ އެވެ.