ތިލަމާލެ ބުރިޖުގެ މަސައްކަތުގެ ދުވެލި އަވަސްވެގެން ދިޔައީ، ވެރިކަމުގެ ކުރީކޮޅުގައި އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުވެ ކުރެވުނު މަޝްވަރާތަކަށްފަހު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

"ނެޝަނަލް ޗެޓް" ޕްރޮގްރާމުގައި ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ، ނިމިދިޔަ ސަރުކާރުގައި ތިލަމާލެ ބުރިޖުގެ މަސައްކަތް ދިޔައީ ވަރަށް އާދައިގެ ދުވެއްޔެއްގައި ކަމަށެވެ. އެގޮތުން އެ ދުވަސްވަރު ފެނިގެންދިޔައީ ކެރޭނެއް ވެއްޓިފައި އޮތް ތަން ނުވަތަ ފަރަށް ލައްގާފައި އޮތް މަންޒަރު ކަމަށާއި، ވެރިކަން ބަދަލުވިއިރު ފެންނަން ހުރީ ތަނބެއް ކަމަށް އެމަނިކުފާނު ފާހަގަކުރެއްވިއެވެ.

ނަމަވެސް، ވެރިކަމާ ހަވާލުވެވަޑައިގަތުމަށްފަހު ކުރީކޮޅުގައި އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވައި، ތިލަމާލެ ބުރިޖުގެ މަޝްރޫއު ކާމިޔާބުކަމާއެކު އަވަހަށް ތަންފީޒުކުރަން ބޭނުންފުޅުވާ ވާހަކަ އިސްވެ ދެންނެވި ކަމަށް ރައީސް ވިދާޅުވިއެވެ. އަދި މި މަޝްރޫއު އަވަސްކުރުމަށްޓަކައި ދެ ގައުމުގެ ދެމެދުގައި 'ހައި ލެވެލް ކޮމިޓީ' އެއް އުފެއްދެވުމަށް މޯދީގެ އަރިހުގައި އެދިވަޑައިގެންނެވި ކަމަށާއި، އޭގެ ނަތީޖާއެއްގެ ގޮތުން އުފެދުނު ކޮމިޓީގެ ސަބަބުން ގިނަގުނަ މަސައްކަތްތަކެއް ހަލުވިކަމާއެކު ފެށިގެން ދިޔަކަން ރައީސް ހާމަކުރެއްވިއެވެ. މީގެއިތުރުން، މި ސަރުކާރުގެ ފުރަތަމަ ދުވަހުން ފެށިގެން ވެސް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާއިން މި މަޝްރޫއަށް ވަރަށް ބޮޑު އިސްކަމެއް ދެއްވަމުން ގެންދަވާ ކަމަށް ވިދާޅުވިއެވެ.

ރައީސްގެ ވާހަކަފުޅުގައި، 2018 ވަނަ އަހަރު ނިމުނު ސަރުކާރުގައި އެމަނިކުފާނު ހައުސިންގ މިނިސްޓަރަކަށް ހުންނެވި ދުވަސްވަރު ސިނަމާލެ ބުރިޖުގެ މަސައްކަތް ކުރިއަށް ގެންދެވި ގޮތް ހަނދުމަފުޅު އާކުރެއްވިއެވެ. އެގޮތުން އެއީ އެމަނިކުފާނު އެންމެ އިސްކަން ދެއްވި މަޝްރޫއު ކަމަށާއި، ކޮންމެ ހަފުތާއަކު ސައިޓަށް ވަޑައިގެންނެވުމުގެ އިތުރުން އޮފީސް ތެރެއިން ވެސް މުޅި ޓީމު ގާތްގަނޑަކަށް 24 ގަޑިއިރު މަސައްކަތްކުރި ކަމަށް ވިދާޅުވިއެވެ. އަދި ތިލަމާލެ ބުރިޖުގެ މަސައްކަތް ވެސް ކުރިއަށް ގެންދަވަން ބޭނުންފުޅުވީ އެފަދަ ބޮޑު އިސްކަމެއް ދެއްވައިގެން ކަމަށް ރައީސް ވިދާޅުވިއެވެ.

މި ސަރުކާރާ ހަވާލުވިއިރު މި މަޝްރޫއު އޮތް ހިސާބުން ފެށިގެން ބަލާއިރު، ކުރިއަށް އޮތް އަހަރެއްހާ ދުވަހުގެ ތެރޭގައި މުޅި ބުރިޖުގެ މަސައްކަތް އެއްކޮށް ނިންމާލެވޭނެ ކަމަށް ގަބޫލުފުޅު ކުރައްވާ ކަމަށް ރައީސް ޑރ. މުއިއްޒު ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ތިލަމާލެ ބުރިޖު މަޝްރޫއު ނިމިގެން ދިއުމަކީ ދިވެހިރާއްޖޭގެ އިގްތިސާދަށް އޭގެ ސަބަބުން ނުހަނު ބޮޑެތި ފައިދާތަކާއި މަންފާތަކެއް ލިބިގެންދާނެ މުހިންމު މަޝްރޫއެއް ކަމަށެވެ.