ދެމެހެއްޓެނިވި ގޮތެއްގައި ރަށްރަށުގެ ކަރަންޓުގެ ހިދުމަތް ފޯރުކޮށްދިނުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، ހދ. ނައިވާދޫ އާއި ށ. ގޮއިދޫއަށް ފޮނުވި އައު ޖެންސެޓުތައް އެ ރަށްރަށަށް ބާލައިފި އެވެ.
ފެނަކަ ކޯޕަރޭޝަނުން މައުލޫމާތު ދޭ ގޮތުގައި، ނައިވާދޫ އަދި ގޮއިދޫގެ ކަރަންޓުގެ ހާލަތު ރަނގަޅުކުރުމަށްޓަކައި އެ ދެ ރަށަށް ފޮނުވާފައިވަނީ 400 ކިލޯވޯޓުގެ ޖެންސެޓުތަކެކެވެ. މި ޖެންސެޓުތައް މިހާރު ވަނީ އެ ރަށްރަށަށް ގެންގޮސް، އިންޖީނުގެއަށް ބޭލުމުގެ މަސައްކަތް ނިންމާލާފަ އެވެ.
މި ހަފްތާގެ ތެރޭގައި މި ދެ ރަށުގެ އިތުރުން ރ. ރަސްގެތީމާއި، ރ. އިންނަމާދޫ އަދި ފ. މަގޫދޫއަށް ވެސް ވަނީ 400 ކިލޯވޯޓުގެ އައު ޖެންސެޓުތައް ފޮނުވާފައެވެ. މިއީ އެ ރަށްރަށުގައި ކަރަންޓު ބޭނުންކުރާ މިންވަރު އިތުރުވަމުންދިއުމާ ގުޅިގެން، ހިދުމަތް މެދުނުކެނޑި ފޯރުކޮށްދިނުމަށް އެޅި މުހިންމު ފިޔަވަޅެކެވެ.
ފެނަކަ ކޯޕަރޭޝަނުގެ މާލީ އަދި ހިންގުމުގެ ޙާލަތު ރަނގަޅުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ބޮޑު އިސްކަމެއް ދެއްވާ ކަމެކެވެ. ރާއްޖޭގެ ރަށްތަކުގައި ދިމާވެފައިވާ ކަރަންޓު ކެނޑުމުގެ މައްސަލައަށް ދާއިމީ އަދި އިތުބާރު ހުރި ހައްލެއް ހޯއްދަވައިދެއްވާނެ ކަމަށް ރައީސުލްޖުމްހޫރިއްޔާ ވަނީ ވެވަޑައިގެންފަ އެވެ.
އަލަށް ފޮނުވުނު މި ޖެންސެޓުތައް އިންސްޓޯލްކޮށް ބޭނުންކުރަން ފެށުމުން، އެ ރަށްރަށުގެ ކަރަންޓުގެ ވިއުގައަށް ދިމާވެފައިވާ ދަތިތަކަށް ބޮޑު ލުޔެއް ލިބިގެންދާނެ އެވެ.
