ސަރުކާރުގެ ބޯހިޔާވަހިކަމުގެ މަޝްރޫއުތަކުން ފްލެޓް ނުވަތަ ގޯތި ލިބުމުން، ކުރިން އޮންނަ އުސޫލުގެ ދަށުން ދައުލަތަށް ދޫކޮށްލަންޖެހޭ އަމިއްލަ ބިންކޮޅު ދޫކޮށްލަން ނުޖެހޭގޮތަށް އުސޫލު ބަދަލުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިޢުލާނު ކުރައްވައިފިއެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، މިހާރު އޮންނަ އުސޫލުގެ ދަށުން 400 އަކަފޫޓަށްވުރެ ކުޑަ ބިންކޮޅެއް އޮތްނަމަ، ބޯހިޔާވަހިކަމުގެ މަޝްރޫއަކުން ޖާގަ ލިބުމުން އެ ބިންކޮޅު ދައުލަތަށް ދޫކޮށްލަން ޖެހޭ ކަމަށެވެ. ނަމަވެސް، އަލަށް ގެންނަ ބަދަލާއެކު އެ ބިންކޮޅު ސަރުކާރަށް ދޫކޮށްލުމުގެ ބަދަލުގައި، އެ މީހެއްގެ އަނބިމީހާ ނުވަތަ ފިރިމީހާ، ނޫނީ ދަރިން ނުވަތަ އެއްބަނޑު އެއްބަފާ މީހަކަށް ދޫކޮށްލެވޭނެ ކަމަށް އެމަނިކުފާނު ވިދާޅުވިއެވެ.
ރައީސް އިތުރަށް ވިދާޅުވި ގޮތުގައި، މި އާ އުސޫލުގެ ތަފްސީލުތައް މިއަދު ނުވަތަ މާދަމާގެ ވަގުތެއްގައި ސަރުކާރުގެ ގެޒެޓުގައި ޝާއިއުކުރެވޭނެއެވެ. އަދި މި ބަދަލަކީ މިދިޔަ ސަރުކާރުގެ "ބިންވެރިޔާ" ސްކީމްގެ ދަށުން ގޯތި ލިބުނު ފަރާތްތަކާއި، މިދިޔަ ސަރުކާރުން ފެށިގެން އައިސް މި ސަރުކާރުގައި ފްލެޓް ހަވާލުކުރެވުނު ފަރާތްތަކަށްވެސް ހިނގާނެ އުސޫލެއްކަން އެމަނިކުފާނު ފާހަގަކުރެއްވިއެވެ.
Advertisement
ނަމަވެސް، ސަރުކާރަށް ބިން ދޫކޮށްލަންޖެހޭ ބައެއް ހާއްސަ ހާލަތްތައް ރައީސް ބަޔާންކޮށްދެއްވިއެވެ. އެގޮތުން، ޖޮއިންޓް އެޕްލިކޭޝަންގެ ތެރެއިން މުޅި ގޯތި އެއްކޮށް ދޫކޮށްލާފައި ހުރިހާ ފަރާތްތަކުން އަލުން އެޕްލައިކޮށްގެން ގޯތި ލިބިފައިވާނަމަ، އެ ފަރާތްތަކުން އެ ބިން ދައުލަތަށް ދޫކޮށްލަން ޖެހޭނެއެވެ. އަދި ލާޖައްސާ އުސޫލުން ބިން ދޫކޮށްލާ ކެޓެގަރީން ދޫކޮށްލާ މުޅި ގޯތިވެސް ދައުލަތަށް ދޫކޮށްލަން ޖެހޭނެއެވެ. މީގެ އިތުރުން، ސަރުކާރުން ދޫކޮށްފައިވާ ސޯޝަލް ހައުސިން ފްލެޓެއް ދޫކޮށްލާފައި ދާންޖެހޭ ހާލަތެއްގައި އެ ފްލެޓެއްވެސް ސަރުކާރަށް ދޫކޮށްލަން ޖެހޭނެ ކަމަށް ރައީސް ވިދާޅުވިއެވެ.
ބޯހިޔާވަހިކަމުގެ ސްކީމަށް އެޕްލިކޭޝަން ހުށަހެޅުމުގެ ފުރުސަތު މިހާރު ހުޅުވާލާފައިވާކަން ފާހަގަކުރައްވަމުން، އެ ފުރުސަތު އަންނަ އޭޕްރިލް މަހުގެ ނިޔަލަށް ކުރިއަށްދާނެ ކަމަށްވެސް ރައީސް ވިދާޅުވިއެވެ.
