މާލޭ އުތުރުފަރާތުން ބޮޑުތަކުރުފާނުމަގު ތަރައްގީކުރުމުގެ މަޝްރޫއުގެ ތެރެއިން ފޭސް 1ގެ ބާކީ ހުރި 4 ސެގްމަންޓްގެ އަމަލީ މަސައްކަތް ފެށުމަށް އެމްޓީސީސީން ތައްޔާރުވެއްޖެއެވެ.
މި މަސައްކަތުގެ ދަށުން ތަރައްގީކުރުމަށް ހަމަޖެހިފައިވަނީ އިއްޒުއްދީން ފާލަމުން ފެށިގެން ހެންވޭރު ފެރީ ޓާމިނަލާ ހަމައަށެވެ.
ބޮޑުތަކުރުފާނުމަގު ތަރައްގީކުރުމުގެ ފޭސް 1ގައި ހިމެނެނީ ލޯކަލް މާރުކޭޓު ސަރަހައްދުން ފެށިގެން ހެންވޭރު ފެރީ ޓާމިނަލާ ހަމައަށެވެ. މީގެތެރެއިން ލޯކަލް މާރުކޭޓުން ފެށިގެން އިއްޒުއްދީން ފާލަމާ ހަމައަށް ހިމެނޭ މަގު ޒަމާނީ ފެންވަރަށް ތަރައްގީކޮށް، މިދިޔަ ޑިސެންބަރު މަހުގެ 8 ވަނަ ދުވަހު ވަނީ އާންމުންނަށް ހުޅުވާލާފައެވެ.
Advertisement
އެމްޓީސީސީން ބުނީ، މި ހަފްތާގެ ތެރޭގައި ފޭސް 1ގެ ބާކީ ހުރި 4 ސެގްމަންޓްގެ މަސައްކަތް ފެށުމަށް ހަމަޖެހިފައިވާ ކަމަށެވެ. މި މަޝްރޫއުގެ ދަށުން 700 މީޓަރުގެ ސަރަހައްދެއްގައި ތާރު އަޅައިގެން ތަރައްގީކުރުމުގެ އިތުރުން، 610 މީޓަރުގެ އެއްގަމު ތޮށި ތަރައްގީކޮށް މަގު އިތުރަށް ފުޅާކުރުމަށް ވަނީ ނިންމާފައެވެ. މި މަސައްކަތް ކުރިއަށްދާނީ ކުރިން ނިމުނު ދެ ސެގްމަންޓްވެސް ކުރިއަށް ގެންދިޔަ ފަރުމާއަށެވެ.
މަގު ހެދުމުގެ މަސައްކަތް ފެށުމަށް ތައްޔާރުވުމުގެ ގޮތުން، އަންނަ ހޯމަ ދުވަހުން ފެށިގެން ހެންވޭރު ފެރީ ޓާމިނަލުން ލަފާފުރާ އަތޮޅު ފެރީތައް މާފަންނު ފެރީ ޓާމިނަލާއި ހުޅުމާލެ ފެރީ ޓާމިނަލަށް ބަދަލުކުރުމަށް އެމްޓީސީސީން ވަނީ ނިންމާފައެވެ. މިއީ މަސައްކަތް ކުރިއަށްދާ ވަގުތު އާންމުންނަށް ދިމާވެދާނެ ދަތިތައް ކުޑަކުރުމަށް އެޅި ފިޔަވަޅެކެވެ.
މި މަޝްރޫއުގެ ދަށުން މަގުގައި ތާރު އެޅުމުގެ އިތުރުން، ފެން ހިންދާ ނިޒާމު ގާއިމުކުރުމާއި، ޕޭމަންޓު ހެދުމުގެ އިތުރުން މަގުބައްތި ޖެހުމުގެ މަސައްކަތްވެސް ކުރިއަށްދާނެއެވެ. އެމްޓީސީސީން ފާހަގަކުރި ގޮތުގައި، މަގުގެ މަސައްކަތް ކުރިއަށްދިޔަ ނަމަވެސް މަސްވެރިންގެ ޕާކު ހިމެނޭ ސަރަހައްދަށް އެއްވެސް ބަދަލެއް ގެނައުމަށް ހަމަޖެހިފައެއް ނުވެއެވެ.
