މާލޭގެ ބޮޑުތަކުރުފާނުމަގު ފުޅާކޮށް ރަނގަޅު ފެންވަރަކަށް ހެދުމުގެ މަސައްކަތް ކުރުމަށްޓަކައި، ހެންވޭރު ފެރީ ޓާމިނަލުން ފެށިގެން އިއްޒުއްދީން ފާލަމާ ހިސާބަށް ބަންދުކުރަން މާލޭ ސިޓީ ކައުންސިލުން ނިންމައިފިއެވެ. މި މަސައްކަތް ފެށުމަށް ހަމަޖެހިފައިވަނީ މި މަހުގެ 21 ވަނަ ދުވަހުއެވެ.

މާލޭ ސިޓީ ކައުންސިލުން މިއަދު ކުރި އިއުލާނެއްގައި ބުނެފައިވަނީ، ބޮޑުތަކުރުފާނުމަގުގެ މަސައްކަތް ކުރިއަށްދާއިރު އެ ސަރަހައްދު ބަންދުކުރަން ނިންމާފައިވަނީ ތިން ބަޔަކަށް ބަހާލައިގެން ކަމަށެވެ. އެގޮތުން ފުރަތަމަ ބަންދުކުރާނީ ހެންވޭރު ޓާމިނަލުން ފެށިގެން މަސްވެރިންގެ ޕާކާ ހަމައަށް ހިމެނޭ ސަރަހައްދެވެ. މި ސަރަހައްދު މާޗު 21 އިން ފެށިގެން މަސައްކަތް ނިމެންދެން ބަންދުވާނެއެވެ.

ދެވަނަ ފިޔަވަހީގެ ދަށުން މަސްވެރިންގެ ޕާކުން ފެށިގެން 05 ނަމްބަރު ފާލަމާ ހަމައަށް ހިމެނޭ ސަރަހައްދު މާޗު 30 އިން ފެށިގެން ބަންދުކުރާއިރު، ތިންވަނަ ފިޔަވަހީގައި 05 ނަމްބަރު ފާލަމުން ފެށިގެން އިއްޒުއްދީން ފާލަމާ ހަމައަށް ހިމެނޭ ސަރަހައްދު ބަންދުކުރާނީ އޭޕްރީލް 17 އިން ފެށިގެންނެވެ. މި ހުރިހާ ސަރަހައްދެއްވެސް ހުޅުވާލެވޭނީ މަސައްކަތް އެއްކޮށް ނިމުމުންނެވެ.

ސިޓީ ކައުންސިލުން އިތުރަށް ބުނީ، މިއަދުން ފެށިގެން މަގު ފުޅާކުރުމުގެ މަސައްކަތް ނިމި އާންމުކޮށް ހުޅުވާލެވެންދެން، އެ ސަރަހައްދުގެ އެއްގަމު ތޮއްޓާއި ހުރަސްތޮށީގައި އެއްވެސް އުޅަނދެއް މަޑުކޮށްގެން އޮތުމާއި، ދާއިމީކޮށް އަޅާފައި ބޭއްވުމަކީ މަނާކަމެއް ކަމަށެވެ.

ބޮޑުތަކުރުފާނުމަގު ޒަމާނީ ފެންވަރަށް ތަރައްގީކުރުމުގެ މި މަޝްރޫއަކީ ސަރުކާރުން އެމްޓީސީސީއާ ހަވާލުކޮށްގެން ކުރިއަށްގެންދާ މަޝްރޫއެކެވެ. ޖުމްލަ 144.5 މިލިއަން ރުފިޔާ ހަރަދުކޮށްގެން ކުރިއަށްގެންދާ މި މަޝްރޫއު ނިންމުމަށް ހަމަޖެހިފައިވަނީ 455 ދުވަހުގެ ތެރޭގައެވެ.

މި މަޝްރޫއުގެ ފުރަތަމަ ސެގްމަންޓުގެ ދަށުން މީގެކުރިން ވަނީ މަސްމާރުކޭޓާ ހިސާބުން ފެށިގެން ޖުމްހޫރީ މައިދާނާ ހަމައަށް އެއްގަމުތޮށި ބޭރަށް ޖައްސައި، މަގު ހަތަރު ލޭނަށް ފުޅާކޮށް ތާރު އަޅާފައެވެ. އަދި ޗާންދަނީ މަގުން ފެށިގެން ފާލަންދޮށު ހިނގުމާ ހަމައަށްވެސް މިހާރު ވަނީ ތަރައްގީކޮށް ނިންމާފައެވެ.