ހއ. ދިއްދޫގެ ތަރައްގީއަށްޓަކައި ހިންގާ ބިޔަ މަޝްރޫއުގެ ދަށުން، އެ ރަށުން 112 ހެކްޓަރުގެ ބިން ހިއްކުމުގެ މަސައްކަތް އެންމެ 50 ދުވަހުގެ ތެރޭގައި ނިންމާލައިފި އެވެ.

ދިއްދޫގައި އެއާޕޯޓް ތަރައްގީ ކުރުމާއި، ބޯހިޔާވަހިކަމުގެ މަޝްރޫއުތަކުގެ އިތުރުން އެހެނިހެން އިޖުތިމާއީ ހިދުމަތްތަކަށް ބޭނުންވާ ބިން ހިއްކުމުގެ މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅުތަކުގެ ތެރޭގައި ހިމެނޭ މުހިންމު މަޝްރޫއެކެވެ. މި މަސައްކަތް ސަރުކާރުން ހަވާލުކޮށްފައިވަނީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއެވެ.

ހއ. ދިއްދޫ ބިން ހިއްކުމުގެ މަޝްރޫއާ ގުޅޭގޮތުން ރައީސުލްޖުމްހޫރިއްޔާ މިރޭ "އެކްސް" ގައި ކުރެއްވި ޕޯސްޓެއްގައި، އެ މަޝްރޫއުގެ މުހިންމު ތަފުސީލުތައް ވަނީ ހިއްސާކުރައްވާފައެވެ. އެގޮތުން، މިދިޔަ ޖެނުއަރީ މަހުގެ 4 ވަނަ ދުވަހު ފެށި މި މަޝްރޫއުގެ އަމަލީ މަސައްކަތް 50 ދުވަހުގެ ކުރު މުއްދަތެއްގެ ތެރޭގައި ނިންމާލާފައިވާކަން ރައީސް ފާހަގަކުރެއްވި އެވެ. މި މަޝްރޫއުގެ ދަށުން ޖުމްލަ 112 ހެކްޓަރުގެ ބިން ހިއްކާފައިވާއިރު، އެ ސަރަހައްދު ހިއްކުމަށް ޖުމްލަ 5،492,089.00 ކިއުބިކް މީޓަރުގެ ވެލި ބޭނުންކޮށްފައިވާކަން ވެސް ރައީސް ޕޯސްޓުގައި ބަޔާންކުރައްވާފައިވެ އެވެ.

މި މަޝްރޫއުގެ ދަށުން ބިން ހިއްކުމުގެ އަމަލީ މަސައްކަތް ފަށާފައިވަނީ މިއަހަރުގެ ޖެނުއަރީ މަހުގެ 4 ވަނަ ދުވަހުގެ ފަތިހުގެ ވަގުތެއްގަ އެވެ. މަސައްކަތް ފެށިތާ ކުރު މުއްދަތެއްގެ ތެރޭގައި މިހާ ބޮޑު ސަރަހައްދެއް ހިއްކައި ނިންމާލެވިފައިވަނީ ބިން ހިއްކުމަށް ދުނިޔޭގައި ބޭނުންކުރާ އެންމެ ބޮޑު އެއް ޑްރެޖަރު ކަމަށްވާ "ލެއިވް އެރިކްޝަން" ބޭނުންކޮށްގެންނެވެ. ޓްރެއިން ސަކްޝަން ހޮޕާ ޑްރެޖަރުގެ މި އުޅަނދަކީ 46,000 ކިއުބިކް މީޓަރުގެ ކެޕޭސިޓީ ހުރި، ބިން ހިއްކުމުގެ މަސައްކަތްތަކަށް ވަރަށް ހަލުވި އުޅަނދެކެވެ.

ދިއްދޫގައި އެއާޕޯޓެއް އެޅުމަކީ އެ ރަށުގެ ރައްޔިތުންގެ ވަރަށް ބޮޑު އުއްމީދަކާ ގުޅިފައިވާ ކަމެކެވެ. މި މަޝްރޫއު ނިމުމުން ދިއްދޫގެ ބިމުގެ ދަތިކަމަށް ބޮޑު ހައްލެއް ލިބި، އިގްސާދީ ގޮތުންނާއި އިޖުތިމާއީ ގޮތުން ބޮޑެތި ކުރިއެރުންތަކެއް ލިބިގެންދާނެ ކަމަށް ދިއްދޫ ރައްޔިތުން ގަބޫލުކުރެ އެވެ.