ާމރާއްޖޭގެ ބައެއް ރަށްތަކަށް ފޯރުކޮށްދެމުންދާ ކަރަންޓުގެ ހިދުމަތް އިތުރަށް ހަރުދަނާކޮށް، އަޕްގްރޭޑް ކުރުމަށްޓަކައި ބޭނުންވާ އާ ޖަނަރޭޓަރުތައް ރާއްޖެ ގެނެސް، އެ ރަށްތަކަށް ފޮނުވުމުގެ މަސައްކަތް ފެނަކަ ކޯޕަރޭޝަނުން ފަށައިފި އެވެ.
ފެނަކައިން މައުލޫމާތު ދީފައިވާ ގޮތުގައި، މި ފިޔަވަހީގައި ޖަނަރޭޓަރުތައް ފޮނުވުމަށް ހަމަޖެހިފައިވަނީ ޖުމްލަ ހަތަރު ރަށަކަށެވެ. އެއީ ލ. އިސްދޫ، ލ. ދަނބިދޫ، ބ. ކެންދޫ އަދި ހއ. ކެލާއެވެ. މި ރަށްތަކަށް ފޮނުވާ ޖަނަރޭޓަރުތަކުގެ ތަފްސީލަކީ:
ލ. އިސްދޫއަށް: 600 ކިލޯވޮޓްގެ ޖަނަރޭޓަރު ސެޓެއް
ލ. ދަނބިދޫއަށް: 400 ކިލޯވޮޓްގެ ޖަނަރޭޓަރު ސެޓެއް
ބ. ކެންދޫއަށް: 600 ކިލޯވޮޓްގެ ޖަނަރޭޓަރު ސެޓެއް
ހއ. ކެލާއަށް: 600 ކިލޯވޮޓްގެ ޖަނަރޭޓަރު ސެޓެއް
މީގެ ތެރެއިން ލ. ދަނބިދޫއަށާއި ލ. އިސްދޫއަށް ފޮނުވާ ޖެންސެޓްތައް މިހާރު ވަނީ ފޮނުވާލުމަށް ތައްޔާރުކުރެވިފައެވެ. ފެނަކައިން ބުނި ގޮތުގައި މާދަމާގެ ވަގުތެއްގައި މި ދެ ރަށަށް ޖަނަރޭޓަރުތައް ގެންދެވޭނެ އެވެ. އަދި ބ. ކެންދޫ އާއި ހއ. ކެލާއަށް ފޮނުވުމަށް ހަމަޖެހިފައިވާ ޖެންސެޓްތައް މިހާރު މާލެ ގެނެވިފައިވާ ކަމަށާއި، ބަނދަރުން މުދާ ކްލިއާ ކުރުމުގެ މަސައްކަތް ކުރިއަށްދާ ކަމަށް އެ ކުންފުނިން ބުނެ އެވެ.
މި ހަތަރު ރަށަކީވެސް މިހާރު ފޯރުކޮށްދެމުންދާ ކަރަންޓުގެ ހިދުމަތުގެ ފެންވަރު ދަށްވުމުގެ ސަބަބުން ރައްޔިތުންގެ ގިނަ ޝަކުވާތަކެއް ކުރިމަތިވެފައިވާ ރަށްތަކެކެވެ. ވަކިން ހާއްސަކޮށް، ރަމަޟާން މަހަކީ އާންމުކޮށް ކަރަންޓު ބޭނުންކުރާ މިންވަރު އިތުރުވާ މަހަކަށް ވުމާއެކު، ކަރަންޓު ކެނޑުމާއި ވޯލްޓޭޖް ދަށްވުމުގެ މައްސަލަތައް ކުރިމަތިވެ ރައްޔިތުންނަށް ދަނީ ބޮޑެތި ދަތިތަކަކާ ކުރިމަތިލާން ޖެހެމުންނެވެ.
ފެނަކަ ކޯޕަރޭޝަނުން ގަބޫލުކުރާ ގޮތުގައި، މި ޖަނަރޭޓަރު ސެޓްތައް އެ ރަށްތަކުގައި އިންސްޓޯލްކޮށް ހިދުމަތް ދޭން ފެށުމާއެކު، އެ ރަށްތަކަށް ދިމާވެފައިވާ ކަރަންޓުގެ މައްސަލައަށް ދާއިމީ ހައްލެއް ލިބި، ރައްޔިތުންނަށް އިތުބާރު ހުރި ހިދުމަތެއް ފޯރުކޮށްދެވޭނެ އެވެ.
ރަމަޟާން މަހަކީ ގޭބިސީތަކުގައި ކަރަންޓުގެ ހަރަދު ބޮޑު މައްސަރެއް ކަމުގައިވާތީ ރޯދަ މަހުގެ ކަރަންޓު ބިލު 400 ރުފިޔާ އަށް ވުރެ މަތިނުވާނެ ކަމަށް ރައީސް ވަނީ ވިދާޅުވެފަ އެވެ. މާނައަކީ 400 ރުފިޔާއަށް ވުރެ މަތިން ކަރަންޓު ބިލަށް އަރާ ބިލުތަކަށް އެ މަތިވާ އަދަދަކީ ސަރުކާރުން ދޭ ޑިސްކައުންޓެވެ.
