ވެލާނާ އިންޓަނޭޝަނަލް އެއާޕޯޓުގެ (ވީއައިއޭ) ޑޮމެސްޓިކް ހިދުމަތްތައް ބޮޑު އަދި ޒަމާނީ ޓާމިނަލަކަށް ބަދަލުވެގެން ދިއުމަކީ އެ އެއާޕޯޓުން ދެމުންގެންދާ ހިދުމަތްތަކަށް ލިބިގެންދިޔަ ވަރަށް ބޮޑު ކުރިއެރުމެއް ކަމުގައި ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފް ވިދާޅުވެއްޖެ އެވެ.
ވީއައިއޭގެ ޑޮމެސްޓިކް ޓަރމިނަލްގެ އޮޕަރޭޝަންސް، ޓާމިނަލް 2 އަށް ބަދަލުކުރުމުގެ ގޮތުން ބޭއްވި ރަސްމިއްޔާތުގައި ވާހަކަފުޅުދައްކަވަމުން ނައިބު ރައީސް ވިދާޅުވީ ގިނަ ދުވަސްތަކެއް ވަންދެން އަޅާނުލެވި އޮތް ޑޮމެސްޓިކް ޓާމިނަލަކީ ދިވެހިންނާއި ފަތުރުވެރިންގެ މައި ދޮރާއްޓަށްވާއިރު، މީގެ ކުރިން އެ ތަން ތަރައްގީކުރަން އެކަށީގެންވާ މަސައްކަތެއް ކުރެވިފައި ނެތުމުން ބޭނުންކުރާ ފަރާތްތަކަށް ބޮޑެތި ތަކުލީފުތަކެއް ކުރިމަތިވެފައިވާ ކަމަށެވެ.
އަދި ޓާމިނަލް 2 އިފުތިތާހު ކުރެވިގެން ދިޔައީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު، ރައްޔިތުންނަށް ކުރިމަތިވެފައިވާ ތަކުލީފުތަކަށް އަވަސް ހައްލެއް ހޯއްދަވައިދެއްވުމަށް ދެއްވި އިސްކަމުގެ ސަބަބުން ކަމަށާއި އަލަށް ހުޅުވުނު ޓާމިނަލަކީ ކުރިއަށްވުރެ ޖާގައިގެ ގޮތުން ތަނަވަސް، ހިތްފަސޭހަ އަދި އިތުރު ހިދުމަތްތަކެއް އެކުލެވޭ ތަނެއްކަން އެމަނިކުފާނު ފާހަގަކުރެއްވި އެވެ.
މީގެއިތުރުން، މިއީ ރައީސުލްޖުމްހޫރިއްޔާ ގެންގުޅުއްވާ ދުރުވިސްނުންތެރި އިގުތިސާދީ ސިޔާސަތުގެ ނަތީޖާކަން ފާހަގަކުރައްވައި، ކުރު މުއްދަތެއްގެ ތެރޭގައި މި މަސައްކަތް ނިންމުމުގައި އެމްއޭސީއެލްގެ މެނޭޖްމަންޓާއި މުވައްޒަފުން ކުރި ބުރަ މަސައްކަތަށް ނައިބު ރައީސް ޝުކުރު އަދާކުރެއްވި އެވެ.
އަދި މި ބަދަލާއެކު އެއާޕޯޓުން ލިބޭ ހިދުމަތުގެ ފެންވަރު މަތިވެ، އިގުތިސާދީ ގޮތުން ލިބެންޖެހޭ ނަފާ އިތުރުވެގެންދާނެ ކަމަށް އުންމީދުކުރައްވާ ކަމަށްވެސް އެމަނިކުފާނު ވިދާޅުވި އެވެ.
