ޙަމާސްގެ ހުރިހާ ހަތިޔާރެއް ހަވާލުކުރުމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ދިން 60 ދުވަހުގެ މުއްދަތުގައި އެކަން ނުކުރާނެ ކަމަށް ޙަމާސް އިން ބުނެފި ކަމަށް އިސްރާއީލުގެ މީޑިއާތަކުން ބުނަން ފަށައިފިއެވެ.
ހަމާސްގެ އިސް އޮފިޝަލް މަހްމޫދު މަރްދާވީ ވިދާޅުވީ އެފަދަ އެއްވެސް ނިންމުމެއް އެ ޖަމާޢަތަށް ރަސްމީކޮށް އަންގާފައި ނުވާ ކަމަށާއި، ހުޅަނގު އައްސޭރިއާއި ޤުދުސްގައި އިސްރާއީލުން ހިފާފައިވާ ތަންތަން އަނބުރާ ހޯދުމުގައި ޙަމާސް އިން ދޫނުދޭނެ ކަމަށެވެ.
އޭނާ ވިދާޅުވީ ފަލަސްތީނުގެ ތަންތަނަށް ވަދެ ޔަހޫދީން މުސްލިމުންނަށް ބިރުދައްކަމުންދާދިޔުމުގެ ބޭނުމަކީ ފަލަސްތީނުގެ ރައްޔިތުން އެމީހުންގެ ބިން ދޫކޮށްލުމަށް ބާރުއެޅުމަށް ކަމަށާއި ނަމަވެސް އެކަން ކާމިޔާބު ނުވާނެ ކަމަށެވެ. މަރްދާވީ ވިދާޅުވި ގޮތުގައި ޣައްޒާ އާއި ހުޅަނގު އައްސޭރީގައި ޔަހޫދީން ކިތަންމެ އަނިޔާވެރިކަމެއް ހިނގަމުން ދިޔަ ނަމަވެސް ފަލަސްތީނުގެ ރައްޔިތުން ސާބިތުކަމާއެކު ދެމިތިބޭނެއެވެ.
އޭނާ އިތުރަށް ވިދާޅުވީ ފަލަސްތީނުގެ ރައްޔިތުން “ހުދު ދިދަ ނުއުފުލާނެ” ކަމަށެވެ. މާނަ އަކީ އާމާނެއް ނުދޭނެ ކަމަށެވެ.
މަރްދާވީ ވިދާޅުވީ ޔަހޫދީ ބާރުތަކުގެ މަޤްޞަދަކީ ފަލަސްތީނު މީހުން އުރުދުން ފަދަ އަވަށްޓެރި ގައުމުތަކަށް ފޮނުވާލުން ކަމަށާއި ނަމަވެސް އެކަން ކާމިޔާބު ނުވާނެ ކަމަށާއި އެއީ ފަލަސްތީނުގެ މީހުން އެމީހުންގެ ބިމާއި އަވަށްތަކާއި ރަށްތަކުގައި ސާބިތުވެ ތިބޭތީއެވެ.
