އިސްރާއީލުގެ ރައްޔިތުންގެ މެދުގައި އޮތް މަގުބޫލުކަމާ ބެހޭގޮތުން ވާހަކަދައްކަވަމުން އެމެރިކާގެ ކުރީގެ ރައީސް ޑޮނަލްޑް ޓްރަމްޕް ވިދާޅުވީ، އެ ގައުމުގައި އެންމެ ބޮޑު ތާއީދެއް އޮތް ބޭފުޅަކީ އެކަލޭގެފާނު ކަމަށެވެ. ޓްރަމްޕް ފާހަގަކުރެއްވި ގޮތުގައި އިސްރާއީލުގެ އާބާދީގެ %99 މީހުންގެ ތާއީދު އެކަލޭގެފާނަށް އެބައޮތެވެ. މީގެ އިތުރުން، މިހާރު ހިނގަމުންދާ ކަންކަން ނިމުމަކަށް އައުމުން، އިސްރާއީލަށް ވަޑައިގެން އެ ގައުމުގެ ބޮޑުވަޒީރުކަމުގެ މަގާމާ ހަވާލުވުމުގެ ފުރުސަތު އެބައޮތް ކަމަށްވެސް ޓްރަމްޕް ވަނީ ބުނެފައެވެ.
މިފަދަ މޭރުމަކުން ޓްރަމްޕް ވާހަކަދައްކާފައިވާއިރު، އެމެރިކާގެ ރައީސް ޑޮނަލްޑް ޓްރަމްޕާއި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ދެމެދު އީރާނާ މެދު ގެންގުޅޭނެ ސިޔާސަތުތަކާ ގުޅޭގޮތުން ވަރުގަދަ ހިޔާލުތަފާތުވުންތަކެއް އުފެދިފައިވާ ކަމަށް އިސްރާއީލުގެ މީޑިއާތަކުން ވަނީ ރިޕޯޓްކޮށްފައެވެ. މިގޮތުން ދެ ބޭފުޅުން ފޯނުން ވާހަކަދައްކަވަމުން ހޫނު ބަހުސެއް ކުރައްވާފައިވާ ކަމަށް "ޔެނެޓް" އަދި "ޔެދިއޯތު އަހްރޮނޯތު" ނޫހުން ބުނެފައިވެއެވެ. ނަމަވެސް ނަތަންޔާހޫގެ އޮފީހުން ވަނީ މި ވާހަކަތައް ދޮގުކޮށްފައެވެ.
Advertisement
ރިޕޯޓްތައް ބުނާ ގޮތުގައި މި ނުތަނަވަސްކަން އުފެދުނީ އީރާނާ ދެކޮޅަށް އަސްކަރީ ފިޔަވަޅު އެޅުމާ މެދު ގެންގުޅޭ ތަފާތު ވިސްނުންތަކެއްގެ ސަބަބުންނެވެ. ނަތަންޔާހޫ އީރާނުގެ ވެރިކަން ވައްޓާލުމަށް ސީދާ އަސްކަރީ ހަމަލާތަކަކަށް ބާރުއަޅުއްވާއިރު، ޓްރަމްޕް އިސްކަންދެއްވަނީ އިގްތިސާދީ ގޮތުން ދަތިކުރުމުގެ ފިޔަވަޅުތައް އަޅައިގެން ޑިޕްލޮމެޓިކް ހައްލެއް ހޯދުމަށެވެ.
