ކޮރަޕްޝަނުގެ މައްސަލައިގައި މަޤާމުން ވަކިކޮށްފައިވާ ޔުކްރޭންގެ ކުރީގެ އެނާޖީ މިނިސްޓަރު ޖާމަން ގަލޫޝްޗެންކޯ އެ ޤައުމު ދޫކޮށް ފިލަން ވެގެން އުޅެނިކޮށް އޭނާ ހައްޔަރުކޮށްފިއެވެ. އޭނާ ފިލަން އުޅުނީ ރޭލެއްގައެވެ. ނަމަވެސް ދާން އުޅުނީ ކޮން ޤައުމަކަށް ކަމެއް ޔުކްރޭނު ސަރުކާރުން ނެރުނު ބަޔާނުގައި ބުނެފައެއް ނެތެވެ.
ނޮވެމްބަރު މަހު 100 މިލިއަން ޑޮލަރުގެ ޚިޔާނާތުގެ މައްސަލައިގައި އޭނާގެ އިތުރުން ޒެލެންސްކީގެ ސަރުކާރުގެ އެހެން އިސް ވެރިން ވެސް ހިމެނެއެވެ. އޭގެތެރޭގައި ޒެލެންސްކީގެ ޗީފް އޮފް ސްޓާފް އެންޑްރީ ޔަރްމަކް ވެސް ހިމެނެއެވެ. އޭނާ ވެސް މިހާރު ހުރީ ވަޒީފާއިން ވަކި ކޮށްފައެވެ.
އިއްޔެ ހައްޔަރުކުރި ގަލޫޝްޗެންކޯ އަކީ ކުރު މުއްދަތަކަށް ޖަސްޓިސް މިނިސްޓަރުކަން ވެސް ކުރެއްވި މީހެކެވެ.
އޭނާ އަށް ތުހުމަތު ކުރަނީ ޔޫކްރޭންގެ ހަކަތައިގެ މަޝްރޫޢުތަކަށް ލިބުނު ފައިސާގެ ބޮޑު ބައެއް އިތުރު ބަޔަކާއި ގުޅިގެން ޚިޔާނާތްތެރިވި ކަމަށެވެ. އޭގެތެރޭގައި މަޤާމުގެ ނާޖާއިޒް ފައިދާ ނެގި ކަމަށާއި، ނުފޫޒުގެ ބޭނުން ކުރި ކަމަށާއި، މަނީ ލޯންޑާކުރި ކަމަށް ވެސް ތުހުމަތު ކުރެއެވެ. އަދި އޭގެތެރެއިން ބައެއް ފައިސާ ދަބަސްދަބަހުގައި ރަޝިޔާ އަށް ވެސް ފޮނުވާފައިވާ ކަމަށް ތުހުމަތު ކުރެއެވެ.
