އަމިއްލަ ފަސްގަނޑުގައި ތިބެގެން ޑޮކްޓޯރަލް ޑިގްރީއާ ހަމައަށް ތައުލީމު އުނގެނުމުގެ ފުރުސަތު އައްޑޫ ރައްޔިތުންނަށް ފަހިވިކަމީ ލިބުނު ރަނުގެ ފުރުސަތެއް ކަމަށް އިސްލާމިކް ޔުނިވާސިޓީގެ ވައިސް ޗާންސެލާ ޑރ. އަލީ ޒާހިރު ވިދާޅުވެއްޖެއެވެ. ގައުމީ ޔުނިވާސިޓީގެ ޗާންސެލަރު މިހެން ވިދާޅުވީ މަރަދޫފޭދޫގައި އިއްޔެ ދިވެހިރާއްޖޭގެ އިސްލާމީ ޔުނިވަރސިޓީގެ އާ ކެމްޕަސް ހުޅުވުމަށް ބޭއްވި ހާއްސަ ރަސްމިއްޔާތު ޝަރަފްވެރިކޮށްދެވައި ވާހަކަފުޅު ދައްކަވަމުންނެވެ.
އިއްޔެގެ ރަސްމިއްޔާތުގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ފޭދޫ އުތުރު ދާއިރާގެ މެންބަރު އިސްމާއީލް ނިޒާރު ވިދާޅުވީ ޒަމާނީ ވަސީލަތްތަކާއެކު ސަރުކާރުގެ ޕަބްލިކް ސެކްޓާ އިންވެސްޓްމަންޓް ޕްރޮގްރާމުގެ މަޝްރޫއުއެއްގެ ގޮތުގައި އެ ކެމްޕަސް ހިމަނައިދެއްވުމަކީ ރައީސުލްޖުމްހޫރިއްޔާ ތައުލީމަށް ދެއްވާ އިސްކަމާއި އަހައްމިއްޔަތުކަން ރަމްޒުކޮށްދޭ އަލިގަދަ ހެއްކެއް ކަމަށެވެ.
މަރަދޫފޭދޫގައި އައިޔޫއެމް ގެ ކެމްޕަހެއް ދަރިވަރުންގެ ދަނާލަކާއި އެކު ގާއިމުކުރުމަށް ކޮންޓްރެކްޓަރަކާއި އެކު ސޮއި ކޮށްފައި ވަނީ މިދިޔަ ނޮވެންބަރު މަހު، އައްޑޫ ހައި ސްކޫލްގައި ރައީސުލްޖުމްހޫރިއްޔާ އެ ސިޓީގެ ރައްޔިތުންނާއި އެކު ބޭއްވެވި ބައްދަލުވުމުގައެވެ.
އެ ކެމްޕަހުގައި ދަރިވަރުންގެ ދަނާލާއި، ކްލާސްރޫމްތަކާއި ލައިބްރަރީ އަކާއި މީޓިން ރޫމާއި ސްޓާފް ރޫމާއި އިދާރީ އޮފީސް، ސެމިނާ ހޯލް، ކެންޓީން، ރެކްރިއޭޝަނަލް ފެސިލިޓީސް، އަދި ސްޓާފް އެކޮމޮޑޭޝަން ހިމެނެ އެވެ.
އައިޔޫއެމްގެ މަރަދޫފޭދޫ ކެމްޕަސް ހުޅުވީ މާސްޓާސް ޑިގްރީގެ ކޯހެއް ހިމެނޭހެން، ޖުމްލަ 4 ކޯހެއްގެ ކިޔެވުން ފެށުމާއި އެކުގައެވެ. ކުރިއަށް އޮތް ހަފުތާ އާއި ހަމައަށް ލޭޓް އެޕްލިކޭޝަން ހުޅުވާލާފައިވާތީ އަދިވެސް އިތުރު ކޯސްތައް އެ ކެމްޕަސްގައި މި ސެމެސްޓާގައި ފެށުމުގެ އުންމީދު ބޮޑުކަމަށް އެޔުނިވާސިޓިން ވަނީ ބުނެފައެވެ.
