ޕެންޝަން ފައިސާ ބޭނުންކޮށްގެން ގޯތި ގެދޮރު އިމާރަތް ކުރުމާއި މަރާމާތު ކުރެވޭ ގޮތަށް ގާނޫނު އިސްލާހުކުރައްވާނެ ކަމަށް ރަައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ޕެންޝަން ފައިސާ ބޭނުންކޮށްގެން އިމާރަތް ކުރުމާއި، އިމާރާތުގެ މަރާމަތުގެ ކަންކަން ކުރެވޭނެ ގޮތް ހައްދަވައިދެއްވާނެ ކަމަށް ރައީސް ވިދާޅުވީ މިއަދު އިއްވެވި ރިޔާސީ ބަޔާނުގަ އެވެ. އެމަނިކުފާނު މިވާހަކަ ހިއްސާކުރެއްވީ ރައްޔިތުންނަށް ބޯހިޔާވަހިކަން ހޯދައި ދިނުމަށް ލުއި ފަސޭހަ ގޮތްތަކެއް ފޯރުކޮށްދިނުމަށް، ސަރުކާރުން ކުރަމުންގެންދާ މަސައްކަތްތަކާ ގުޅޭގޮތުން ވާހަކަފުޅުދައްކަވަމުންނެވެ.

"ރައްޔިތުންނަށް ދިމާވެފައިވާ ގޯތި ގެދޮރުގެ ދަތިކަމަށް ހަލެއް ހޯދައި ދިނުމަށް، ސަރުކާރުން ކުރަމުން އަންނަ މަސައްކަތްތަކުގެ ތެރެއިން ގޯތި ގެދޮރު ގަންނަންށާއި، އިމާރަތް ކުރުމަށް ނުވަތަ ގޯތި ގެދޮރު މަރާމާތު ކުރުމަށް ބޭނުންވާ ފަރާތްތަކަށް ލުއި ގޮތްތަކެއް ހޯދާ ދިނުމަށް ވަކި ހާލަތްތަކެއްގައި ޕެންޝަން ފައިސާ ކޮލަޓަރައިޒު ކުރެވޭނެ ގޮތް ހަމަޖައްސައި ދިނުމަށް، ދިވެހިރާއްޖޭގެ ޕެންޝަނާ ބެހޭ ގާނޫނަށް ސަރުކާރުން ވާނީ އިސްލާހުތަކެއް ހުށަހަޅައިފަ،" --- ރައީސް ޑރ. މުއިއްޒު ވިދާޅުވި އެވެ.

ރައީސް ވިދާޅުވީ މިހާރު ގާނޫނުގައި އޮންނަ ގޮތުން ޕެންޝަން ފައިސާ ހަމައެކަނި ބޭނުން ކުރެވޭނީ އިމާރަތްކޮށް ނިމިފައިވާ ތަންތަނަށް ޑައުންޕޭމެންޓް ދެއްކުމަށް އެކަނި ކަމަށެވެ. ނަމަވެސް މި އަހަރު ސަރުކާރުން ހުށާހަޅާފައިވާ އިސްލާހާއެކު، ވަކި ހާލަތްތަކެއްގެ ދަށުން ޕެންޝަން ފައިސާއިން ގޭގެ އިމާރަތް ކުރުމަށާއި މަރާމާތު ކުރުމަށް ރައްޔިތުންނަށް ބޭނުން ކުރެވޭނެ ކަމަށް އެ މަނިކުފާނު ވިދާޅުވި އެވެ.