އިންޑިއާގެ އިރުމަތީ ސްޓޭޓް ކަމަށްވާ ވެސްޓް ބެންގޯލްގައި ފެތުރެމުން އަންނަ ނިޕާ ވައިރަހުގެ ނުރައްކާ ރާއްޖެއަށް މިވަގުތު ކުޑަ ނަމަވެސް، ހާލަތު މޮނީޓާކުރަމުން އަންނަ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފި އެވެ.
އިންޑިއާގެ ވެސްޓް ބެންގޯލްގެ ޕްރައިވެޓް ހޮސްޕިޓަލެއްގައި މަސައްކަތްކުރާ ޑޮކްޓަރަކާއި ދެ ނަރުހެއް ނިޕާ ވައިރަަސް އަށް ވަނީ ޕޮޒިޓިވް ވެފަ އެވެ. އިންޑިއާގެ މަސްދަރުތަކުން ބުނާގޮތުން އެ ސަރަަހައްދުން މިހާތަނަށް ފަސް މީހަކު މި ވައިރަހަށް ވަނީ ޕޮޒިޓިވް ވެފަ އެވެ. އަދި ބަލި ޖެހުނު މީހުންނާއި ކޮންޓެކްޓްވި 180 އަށްވުރެ ގިނަ މީހުން ވަނީ ކަރަންޓީނު ކޮށްފަ އެވެ.
އެޗްޕީއޭ އިން މިއަދު ނެރުނު ބަޔާނެއްގައި ބުނީ މިވަގުު މިބަލީގެ ނުރައްކާ ރާއްޖެއަށް އޮތް މިންވަރު ކުޑަ ކަމަށެވެ. އަދި ހާލަތު މޮނިޓާ ކުރަމުންދާ ކަމަށާއި މި ބައްޔާ ގުޅޭ އެއްވެސް ކޭސް އެއް އަދި ކޮންޓެކްޓްވި މީހެއްވެސް އެޗްޕީއޭ އަށް ރިޕޯޓުކުރެވިފައި ނެތް ކަމަށެވެ.
ނަމަވެސް ބަލި ފެނިފައިވާ ވެސްޓް ބެންގޯލް ސަރަހައްދަށް ދަތުރުކުރާ ފަރާތްތަކުން މި ކަމަށް ސަމާލުކަން ދިނުން މުހިއްމު ކަމަށް އެޗްޕީއޭ އިން ބުންޏެވެ. އަދި އާއްމު ސިއްހަތު ރައްކާތެރިކުރުމަށް އަޅަންޖެހޭ ފިޔަވަޅުތައް ކަމާގުޅޭ އިދާރާތަކާއި ސިއްހީ ހިދުމަތްދޭ ތަންތަނާއި ގުޅިގެން ކުރަމުންދާ ކަމަށްވެސް ބުންޏެވެ.
ބޭސްފަރުވާއަށް ދިވެހިން އެންމެ ގިނައިން ގޮސް އުޅޭ ކެރެލާ ސްޓޭޓުން މީގެ ކުރިން ފަސް ފަހަރެއްގެ މަތިން ނިޕާ ވައިރަސް ވަނީ ފެނިފަ އެވެ.
ނިޕާ ވައިރަހަކީ ޖަނަވާރުންގެ ފަރާތުން، ވަކިން ހާއްސަކޮށް ވާލުގެ ޒަރީއާއިން އިންސާނުންގެ ގަޔަށް އަރާ ވައިރަހެކެވެ. މީގެ އިތުރުން ބަލި ޖެހިފައިވާ އިންސާނެއްގެ ފަރާތުންވެސް އެހެން މީހުންނަށް މި ބަލި ފެތުރެ އެވެ. މި ބަލީގެ އަލާމާތްތަކުގެ ތެރޭގައި ހުން އައުން، ބޮލުގައި ރިއްސުން، ކެއްސުން، ނޭވާލާން އުނދަގޫވުން އަދި ސިކުނޑި ދުޅަވުން ހިމެނެ އެވެ. މި ބައްޔަށް މިހާތަނަށް ވަކި ހާއްސަ ވެކްސިނެއް ނުވަތަ ފަރުވާއެއް ހޯދިފައެއް ނުވެ އެވެ.
މި ބަލީގެ ނުރައްކާތެރިކަން ބޮޑީ ބަލި ޖެހޭ މީހުންގެ ތެރެއިން 40 އިންސައްތައާއި 75 އިންސައްތައާ ދެމެދުގެ އަދަދެއްގެ މީހުން މަރުވުމުގެ ފުރުސަތު އޮންނާތީ އެވެ.
މި ބަލި ފެތުރުމުގެ ފުރުސަތު އޮތުމުން، އެހެން ގައުމުތަކުން ވެސް ދަނީ ރައްކާތެރިކަމުގެ ފިޔަވަޅުތައް އަޅަމުންނެވެ. މިގޮތުން ތައިލެންޑުން އިންޑިއާއިން އެއާޕޯޓްތަކަށް އަންނަ މީހުން ސްކްރީންކުރަން ފަށާފައިވާއިރު، ތައިވާނުން ނިޕާ ވައިރަސްއަކީ ކެޓަގަރީ 5ގެ ބައްޔެއްގެ ގޮތުގައި ކަނޑައެޅުމަށް ދަނީ މަޝްވަރާ ކުރަމުންނެވެ.
