އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވާފައިވާ ސުލްހައިގެ ބޯޑުގައި އިނގިރޭސިވިލާތުން އަދި ސޮއި ނުކުރާނެ ކަމަށާއި، ރަޝިޔާއިން އެ ބޯޑުގައި ބައިވެރިވެދާނެތި ކަންބޮޑުވާ ކަމަށް އިނގިރޭސި ފޮރިން ސެކްރެޓަރީ ޔްވެޓް ކޫޕަރު ބުނެފިއެވެ.
ވައިޓް ހައުސް އިން ބުނެފައި ވަނީ ސުލްހައިގެ ބޯޑަކީ ޣައްޒާގެ ކަންކަން ހިންގުމަށް އުފައްދާ ބޯޑެއް ކަމަށެވެ.
ނަމަވެސް ކޫޕަރު ވިދާޅުވީ އެ ބޯޑަކީ ޣައްޒާގެ ހަނގުރާމަ ހުއްޓުވުމަށް ފުރަތަމަ ފޯކަސް ކުރި ކަމުގައި ވިޔަސް، މިހާރު އެއީ އދ. ގެ ޗާޓަރާއި ފުށު އަރާ މައްސަލަތަކެއް ހިމެނޭ ބޯޑެއް ކަމަށް ބެލެވޭ ކަމަށެވެ.
"ޕޫޓިން އަކީ ސުލްހަވެރިއެއް ނޫން، އަދި އަޅުގަނޑަކަށް ހިއެއް ނުވޭ ސުލްހައަށް މަސައްކަތްކުރާ އެއްވެސް ތަނަކަށް އޭނާ ނިސްބަތްވާނެ ހެނެއް” ކޫޕަރު ވިދާޅުވިއެވެ.
ސުލްހައިގެ ބޯޑުގައި ބައިވެރިވުމަށް ޕޫޓިންއަށް ދައުވަތު ދެއްވިކަން ޓްރަމްޕް ވަނީ އަންގާރަ ދުވަހު ކަށަވަރުކޮށްދެއްވާފައެވެ.
އެ ދައުވަތު ގަބޫލުކުރި ގައުމުތަކުގެ ތެރޭގައި އަޒަރުބައިޖާން، އާޖެންޓީނާ، ސައުދީ އަރަބިއްޔާ، ޔުނައިޓެޑް އަރަބް އެމިރޭޓްސް، ބަހްރެއިން، ޖޯޑަން، ގަތަރު، އަދި މިސްރާއި އިތުރު ގައުމުތަކުގެ އިތުރުން ނޭޓޯގެ މެމްބަރު ތުރުކިޔޭ އާއި ހަންގޭރީ ވެސް ހިމެނެއެވެ.
މިއީ ދުނިޔޭގެ ބޮޑެތި ބާރުތަކުން ކަންބޮޑުވުން ފާޅުކުރަމުންދާ ކަމެއް ނަމަވެސް، ޓްރަމްޕް ވިދާޅުވީ މި ބޯޑުން މަސައްކަތް ކުރާނީ އދ.އާ ގުޅިގެން ކަމަށެވެ.
އެމެރިކާ ފިޔަވައި އދ.ގެ ސަލާމަތީ މަޖިލީހުގެ ދާއިމީ އެއްވެސް މެންބަރަކު މިހާތަނަށް މި ބޯޑުގައި ބައިވެރިވުމަށް ނިންމާފައެއް ނުވެއެވެ.
