ކުރިއަށް އޮތް ލޯކަލް ކައުންސިލް އިންތިހާބުގައި އައްޑޫ ސިޓީގެ މޭޔަރުކަމަށް ވާދަކުރާ ކެންޑިޑޭޓުންގެ ރޭހުގައި ސ. ހިތަދޫ / ތުނިޔަ މުޝްރިފް އަލީއަށް އާދަޔާ ހިލާފު ބޮޑު ތަރުހީބެއް ދަނީ ލިބެމުންނެވެ.
އައްޑޫ ސިޓީގެ މޭޔަރުކަމަށް މުޝްރިފް ވާދަކުރައްވަން ނުކުންނެވީ ވެރިކަން ކުރާ ޕީއެންސީ ކެންޑިޑޭޓެއް ގޮތުގައި ޕާޓީގެ ގިނަ ރައްޔިތުންގެ ތާއީދާ އެކުއެވެ. މި ގޮނޑިއަށް ދެން ވާދަކުރައްވަނީ އިދިކޮޅު އެމްޑީޕީން އަލީ ނިޒާރު އެވެ. ނިޒާރު އަކީ މިހާރުގެ މޭޔަރެވެ.
ނަމަވެސް ސޯޝަލްމީޑިއާގެ ޓްރެންޑުތަކަށް ބަލާއިރު މުޝްރިފް މިހާރުވެސް އުޅެނީ އެ ރޭހުގެ ވަރަށް ކުރީގައެެވެ. މޭޔަރު ނިޒާރު ދެވަނަ ދައުރަކަށް ވާދަކުރަށްވާއިރު މިހާރުވެސް މުޝްރިފް އަންނަނީ އެކި އުމުރުފުރައިގެ ގިނަ ބައެއްގެ ބޮޑު ތާއީދެއް ހޯއްދަވަމުންނެވެ.
ސޯޝަލް މީޑިއާގެ ކެމްޕެއިންތަކުގެ ނަތީޖާތައް ދައްކާގޮތުން އައްޑޫގެ މޭޔަރުކަމުގެ ގޮނޑި ކާމިޔާބު ކުރައްވާނީވެސް މުޝްރިފް އެވެ.
މުޝްރިފް އަކީ ތައުލީމީ ބޭފުޅެކެވެ. ރައްޔިތުންގެ އިހުސާސުތައް ދަންނަ އަދި ރައްޔިތުންނާއި ގާތުން މަސައްކަތްކުރަން ދަންނަ ފިސާރި ކެންޑިޑޭޓެކެވެ.
މުޝްރިފްގެ ތައުލީމީ ބެކްގްރައުންޑަށް ބަލާއިރު އޭނާ ހުންނެވީ ކޮމްޕިއުޓަރު ސައިންސުގެ ދާއިރާއިން ބެޗެލާސް އަދި މާސްޓާސް ހާސިލުކުރައްވައިގެންނެވެ.
މުޝްރިފް ވަނީ ކަސްޓަމްސްގެ އޮފިސަރެއްގެ މަގާމުން ފެށިގެން ގޮސް އެކި އިދާރާތަކުގެ މެނޭޖަރުކަމުގެ މަގާމާއި ޑިރެކްޓަރު މަގާމުވެސް ފުރުއްވާފައެވެ.
އެގޮތުން އޭނާ ވަނީ އައްޑޫ ހައި ސްކޫލުގެ ޓީޗަރެއްގެ މަގާމާއި އެމްއެންޔޫ ހިތަދޫ ކެމްޕަހުގެ ޕާޓް ޓައިމް ލެކްޗަރާއެއްްގެ މަގާމު ފުރުއްވާފައެވެ. އެއަށްފަހު އައްޑޫ ސިޓީ ކައުންސިލުގެ އެސިސްޓެންޓް ޑިރެކްޓަރުގެ މަގާމާއި އަމިއްލަ ކުންފުންޏެއްގެ އޮފީސް މެނޭޖަރުކަންވެސް ކުރެއްވިއެވެ. އަދި ފެނަކަ ހިތަދޫ ބްރާންޗުގެ އެސިސްޓެންޓް މެނޭޖަރު ކަމާއި އިކޮނޮމިކް މިނިސްޓްރީގެ ދަށުން ހިތަދޫގައި ހިންގާ ބިޒްނަސް ޑިވޮލޮޕްމަންޓް ސާވިސް ސެންޓަރުގެ މެނޭޖަރު ކަމާއި ލިތިއަމް ކެޕިޓަލް ކުންފުނީގެ ޑިރެކްޓަރު ކަމާއި ގދ. ފިޔޯރީ ކައުންސިލުގެ ކައުންސިލް އެގްޒެކެޓިވްގެ މަގާމުވެސް އޭނާ ވަނީ ފުރުއްވާފައެވެ.
މި ތައުލީމާއި ތަޖުރިބާއަށް ބަލާއިރު އައްޑޫ ސިޓީގެ މޭޔަރުކަމަށް ވާދަކުރާ ކެންޑިޑޭޓުންގެ ތެރެއިން އެ ގޮނޑިއަށް އެންމެ ގާބިލު ކެންޑިޑޭޓަކީ މުޝްރިފް އަލީކަމަށް އައްޑޫގެ ގިނަ ރައްޔިތުންތަކެއް ދަނީ ބުނަމުންނެވެ.
