ހިޔާ ފުލެޓަށް ވަނުމަށް ކުރި ހޭދައިގެ އެވަރެޖް އަދަދެއްގެ ގޮތުގައި ސަރުކާރުން ކަނޑައެޅި ދެ ލައްކަ ރުފިޔާގެ އަގު ވީހާވެސް އަވަހަށް އެގްރީމަންޓުން އުނިކުރުމުގެ މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޢިއްޒު ވިދާޅުވެއްޖެ އެވެ.
ފޭސް 2ގެ ސަލާހުއްދީން ސްކޫލުގައި އެ ސަރަހައްދުގައި ދިރިއުޅުއްވާ ރައްޔިތުންނާ ބައްދަލުކުރެއްވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ހިޔާ ފުލެޓުގެ ޖުމްލަ އަގުން ދެ ލައްކަ ރުފިޔާގެ ޑިސްކައުންޓެއް ދެއްވާނެ ކަމަށް އެމަނިކުފާނު ވިދާޅުވެފައި އޮންނާނެ ކަމަށާއި، އެކަން ކުރުމަށް އެޗްޑީސީގައި އެމަނިކުފާނު ދަންނަވާފައި އޮންނާނެ ކަމަށެވެ.
ރައީސް ވިދާޅުވީ ހިޔާ ފުލެޓް ލިބުނު ފަރާތްތަކުގެ އެގްރީމަންޓު ބަދަލުވެގެންދާއިރު ޖުމްލަ އަގުން ދެ ލައްކަ ރުފިޔާ، އެމަނިކުފާނު ދެންނެވި ގޮތަށް އުނިވެގެންދާނެ ކަމަށެވެ.
ހިޔާ ފުލެޓަށް ނިމިދިޔަ ސަރުކާރުން މީހުން ވެއްދީ އެތަނުގެ ފިނިޝިން ނުނިންމާ ހަމައެކަނި ހަތަރު ފާރު ނިންމާލުމަށްފަހުގަ އެވެ. އެހެން ކަމުން އެ ރައްޔިތުންގެ އަތުން ބޮޑު އަދަދެއް އެ ފުލެޓުތަކުގެ ފިނިޝިން އަށް ވަނީ ހަރަދުވެފަ އެވެ.
2023 ވަނަ އަހަރުގެ ރިޔާސީ އިންތިހާބުގެ ކެމްޕެއިނުގައި ރައީސް ވިދާޅުވީ ހިޔާ ފުލެޓަށް ވަނުމަށް އެ ފަރާތްތަކުގެ އަތުން ބޮޑު ހަރަދެއް ހިނގާފައިވާ ކަމަށާއި އެހެން ކަމުން އެމަނިކުފާނުގެ ސަރުކާރެއްގައި އެވަރެޖް އަގެއް ޑިސްކައުންޓުގެ ގޮތުގައި ދެއްވާނެ ކަމަށެވެ.
ވެރިކަމަށް ވަޑައިގަތުމަށްފަހު ނިމިދިޔަ އަހަރުގައި ރައީސް ވިދާޅުވި ގޮތަށް ސަރުކާރުން ވަނީ 200،000 ރުފިޔާގެ ޑިސްކައުންޓެއް ދޭން ނިންމާފަ އެވެ. މި ސަރުކާރުން ވަނީ ހިޔާ ފުލެޓުގެ ކުލި ވެސް ކުޑަކޮށްފަ އެވެ. އެގޮތުން މި ސަރުކާރާ ހަވާލުވި އިރު ކުލީގެ ގޮތުގައި ދައްކަމުން އައި އަދަދު 5،300 ރުފިޔާއިން 4،984 އަށް ވަނީ ކުޑަކޮށްފަ އެވެ. ނިމިދިޔަ ސަރުކާރުން ކުލީގެ ގޮތުގައި އެންމެ ފުރަތަމަ ނަގަމުން އައީ 7،500 ރުފިޔާ އެވެ. ނަމަވެސް 5،300 ރުފިޔާ އަށް ހެދީ ރިޔާސީ އިންތިހާބާ ދިމާކޮށެވެ.
