ފަހި ދިރިއުޅުން ފުލެޓުތަކުގެ ކުއްޔާއި ސެކިއުރިޓީ ޑިޕޮސިޓްގެ ގޮތުގައި ދައްކަންޖެހޭ އަދަދު ކުޑަކޮށް މިހާރު ދައްކަންޖެހޭ އަދަދު ހައުސިން މިނިސްޓަރު އަބްދުﷲ މުއްތަލިބު އާންމުކުރައްވައިފި އެވެ.

ފަހި ދިރިއުޅުންގެ 4،000 ހައުސިން ޔުނިޓުގެ ކުލި ކުޑަ ކޮށްދެއްވުމަށް ރައީސުލްޖުމްހޫރިއްޔާގެ އަރިހުގައި ރައްޔިތުން ވަނީ ރޭގެ ބައްދަލުވުމުގައި އެދިވަޑައިގެންފަ އެވެ. ފޭސް 2 ސަލާހުއްދީން ސްކޫލުގައި ބޭއްވި ބައްދަލުވުމުގައި އެ ޝަކުވާތައް އަޑުއައްސަވައި ރައީސް ވިދާޅުވީ ކުއްޔާއި ބެހޭގޮތުން ރައްޔިތުން ހުށަހަޅުއްވާފައިވަނީ ވަރަށް ސީރިއަސް ޝަކުވާތަކެއް ކަމަށެވެ.

ރައީސް ވިދާޅުވީ ފަހި ދިރިއުޅުން ފުލެޓުތައް ލިބުނު ފަރާތްތަކަށް ކުއްޔާއި ސެކިއުރިޓީ ޑިޕޮސިޓް ކުޑަކުރުމަށް ނިންމާފައިވާ ކަމަށެވެ. އެގޮތުން ތިން ކޮޓަރީގެ ފުލެޓުތަކަށް މެއިންޓަނަންސް ފީއާ އެއްކޮށް ދައްކަންޖެހޭ ކުލި 10،500 ރުފިޔާ އިން 10،000 ރުފިޔާ އަށް ކުޑަކޮށްދެއްވާނެ ކަމަށް ރައީސް ވިދާޅުވި އެވެ. އަދި ސެކުއިރިޓީ ޑިޕޮސިޓްގެ ގޮތުގައި ދައްކަން ޖެހޭ އަދަދު 25،000 ރުފިޔާ އިން 8،000 ރުފިޔާ އަށް ކުޑަކޮށްދެއްވާނެ ކަމަށް ރައީސް ވިދާޅުވި އެވެ.

ދެ ކޮޓަރީގެ ފުލެޓުތަކަށް ކުއްޔާއެކު ދައްކަންޖެހޭ އަދަދު 8،000 ރުފިޔާ އިން 7،000 ރުފިޔާއަށް ކުޑަކޮށް ސެކިއުރިޓީ ޑިޕޮސިޓްގެ ގޮތުގައި ދައްކަންޖެހޭ އަދަދު 15،000 ރުފިޔާ އިން 6،000 ރުފިޔާ އަށް ކުޑަކޮށްދެއްވާނެ ކަމަށްްވެސް ރައީސް ވިދާޅުވި އެވެ.

ރައީސްގެ މި ނިންމެވުން ހައުސިން މިނިސްޓަރު އަބްދުﷲ މުއްތަލިބު ވަނީ އެކްސްގައި ޕޯސްޓު ކުރައްވާފަ އެވެ.

ފަހި ދިރިއުޅުން ފުލެޓުތަކަށް ބައެއް ފަރާތްތަކުން މިހާރުވަނީ ސެކިއުރިޓީ ޑިޕޮސިޓް ދައްކައި އެ ފުލެޓުތަކަށް ދިރިއުޅުން ބަދަލުކޮށްފަ އެވެ. އެހެންކަމުން އެ ފަރާތްތަކުން ކުރިން އޮތް އަދަދަށް ސެކިއުރިޓީ ޑިޕޮސިޓް ދައްކާފައިވާތީ އެ ފަރާތްތަކާމެދު އަމަލުކުރާނެ ގޮތެއް ސަރުކާރުން އަދި ހާމަކޮށްފައި ނުވެ އެވެ. ބެލެވޭ ގޮތުގައި ސެކުއިރިޓީ ޑިޕޮސިޓުން ގިނަވާ ބައި ކުލިން މައާފް ކުރާނީ އެވެ.

ފުލެޓުތަކާ ގުޅޭގޮތުން މި ގެނައި ބަދަލާއެކު އެގްރީމަންޓުތަކަށް ބަދަލު ގެނެވޭނެ ކަމަށް ރައީސް ވިދާޅުވި އެވެ.