ބާޒާރުމަތީ އެއްގަމު ތޮށި ތަރައްގީކުރުމުގެ އިތުރުން މަގު ފުޅާކުރުމުގެ މަސައްކަތަށް އެ ސަރަހައްދު ބަނދަރުގައި އަޅާފައިވާ އުޅަނދުތައް ވަގުތީ ގޮތުން އެމްއެމްއޭ ސަރަހައްދަށް ބަދަލުކުރުމަށް މޯލްޑިވްސް ޕޯޓްސް ލިމިޓެޑު (އެމްޕީއެލް) އިން އަންގައިފި އެވެ.
މި މަހުގެ 20 ވަނަ ދުވަހު އެ ސަރަހައްދުގެ އެއްގަމު ތޮށި ތަރައްގީކުރުމުގެ މަސައްކަތާއި، މަގު ފުޅާކުރުމުގެ މަސައްކަތް ކުރިއަށް ގެންދަން ހަމަޖެހިފައިވާތީ އެ ސަރަހައްދުގައި އަޅާފައިވާ އުޅަނދުތައް މި މަހުގެ 19 ވަނަ ދުވަހުގެ ކުރިން ނެގުމަށް އެމްޕީއެލްއިން ވަނީ އެދިފަ އެވެ. މި ފަޅުތެރެ ހުސްކުރާނީ ތިން ބަޔަކަށް ބަހާލައިގެންނެވެ. ފުރަތަމަ ހުސްކުރުމަށް ހަމަޖެހިފައިވަނީ ވަނީ މަސް މާރުކޭޓުން ފެށިގެން، 100 މީޓަރުގެ ސަރަހައްދެކެވެ. އެއީ މަސް މާރުކޭޓު ކުރިމަތިން މަސް ދޯނިތައް އެޅުމަށް ބޭނުންކުރާ ސަރަހައްދެވެ.
މި ބަދަލާއެކު އެ ސަރަހއްދުން ނަގާ އުޅަނދުތައް އެމްއެމްއޭ ކުރިމަތިން އޮންނަ ސަރަހައްދުގައި އަޅާފައި ބޭއްވޭނެ އިންތިޒާމު ވަނީ ހަމަޖެހިފަ އެވެ. މީގެ އިތުރުން މަސައްކަތް ކުރާ ސަރަހައްދުގައި ހުންނަ އުޅަނދުތައް ނަގަންޖެހޭ ސަރަހައްދު އަންގައި ދިނުމުގެ ގޮތުން، ވާޓާރުގައި މާކު ޖަހާފައިވާނެ ކަމަށް އެމްޕީއެލްއިން ވަނީ ބުނެފަ އެވެ.
ސަރުކާރުގެ އަމާޒަކީ ބޮޑުތަކުރުފާނު މަގު ބާޒާރު މަތި ހިމެނޭ ސަރަހައްދުގެ މަސައްކަތް އަންނަ އަހަރުގެ ރޯދަމަހުގެ ކުރިން ނިންމާލުމެވެ.
ހަތަރު ލޭނަށް ފުޅާކޮށް، ޒަމާނީ ފެންވަރަށް ބޮޑުތަކުރުފާނު މަގު ތަރައްގީކުރުމުގެ މަސައްކަތް އެމްޓީސީސީއާ ހަވާލުކޮށްގެން ފަށާފައިވަނީ މިދިޔަ އޮގަސްޓު މަހުގެ ތެރޭގަ އެވެ. އެގޮތުން މިހާތަނަށް ބޮޑުތަކުރުފާނު މަގުގެ ސެގެމަންޓް އެކެއްގެ މަސައްކަތް އެއްކޮށް ވަނީ ނިންމާލައިފަ އެވެ. ބޮޑުތަކުރުފާނު މަގު ތަރައްގީކުރުމުގެ މަސައްކަތުގެ ދެވަނަ ފިޔަވަހީގެ ދަށުން، ލޯކަލް މާރުކޭޓުން ފެށިގެން ނޯތް ހާބަރާ ހަމައަށް، ޖުމްލަ 250 މީޓަރުގެ ސަރަހައްދެއް މަގު ފުޅާކޮށް ތާރުއަޅައި ޒަމާނީ ފެންވަރަށް ތަރައްގީ ކުރުމަށް ވަނީ ހަމަޖެހިފަ އެވެ.
