ހއ. އުލިގަމުގައި ޔޮޓް މެރީނާއެއް ތަރައްޤީކުރުމުގެ މަޝްރޫޢު ކުރިއަށް ގެންދިއުމަށްޓަކައި، އެ ރަށުން ބިން ކުއްޔަށް ދިނުމުގެ ރަސްމީ އެއްބަސްވުމުގައި މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި އުލިގަމު ކައުންސިލާ ދެމެދު ސޮއިކޮށްފިއެވެ.
މި އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވާފައިވަނީ 23 އޯގަސްޓް 2026 ގައެވެ. އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ އެ ކުންފުނީގެ ޗީފް އެގްޒެކެޓިވް އޮފިސަރ ކެޕްޓަން ޙުސައިން ޝަފީގެވެ. އަދި އުލިގަމު ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އަސަދުﷲ މުހައްމަދެވެ.
މާލެއާ ގާތްގަނޑަކަށް 328 ކިލޯމީޓަރު އުތުރުގައި އޮންނަ އުލިގަމަކީ ދެކުނު އިރުމަތީ އޭޝިއާ، އިންޑިއަން ސަބްކޮންޓިނެންޓް، މެދުއިރުމަތި އަދި ޔޫރަޕްގެ މެދުގައި ދަތުރުކުރާ ބައިނަލްއަގްވާމީ ޔޮޓްތަކުގެ މެދުގައި ވަރަށް މަހްބޫލު މަންޒިލެކެވެ. ކޮންމެ އަހަރަކުވެސް، ހާއްސަކޮށް ޖެނުއަރީން އޭޕްރީލް މަހުގެ ނިޔަލަށް ހިމެނޭ ދުވަސްވަރު، 100 އާއި 150 އާ ދެމެދުގެ އަދަދަކަށް ޔޮޓް އެ ރަށުގެ ފަޅުގައި ބަނދަރުކުރެއެވެ. ނަމަވެސް، އެކަށީގެންވާ ހިދުމަތްތަކާއި ވަސީލަތްތައް ނެތުމުގެ ސަބަބުން ގާތްގަނޑަކަށް 400 މީހުންގެ އާބާދީއެއް އޮންނަ އެ ރަށުގެ ރައްޔިތުންނަށް މިކަމުން ލިބެންޖެހޭ އިގްތިސާދީ ފައިދާ މީގެ ކުރިން އޮތީ ހަނިވެފައެވެ.
Advertisement
މި މަޝްރޫއުގެ ދަށުން އުލިގަމަށް ޒިޔާރަތްކުރާ ޔޮޓްތަކުން ލިބޭ ފައިދާ އިތުރުކުރުމަށްޓަކައި، މީގެ ކުރިން އޯގަސްޓް 2024 ގައި އެމްޕީއެލް އާއި ކައުންސިލާ ދެމެދު ފަހުމުނާމާއެއްގައި ސޮއިކޮށްފައިވެއެވެ. އަދި މިއަހަރުގެ މާޗު މަހުގައި މި މަޝްރޫއުގެ ފުރަތަމަ ފިޔަވަހީގެ އަމަލީ މަސައްކަތް ސާސް ކޮންސްޓްރަކްޝަން ޕްރައިވެޓް ލިމިޓެޑާ ވަނީ ހަވާލުކޮށްފައެވެ. މި ފިޔަވަހީގެ ދަށުން 12 މީޓަރާއި 15 މީޓަރާ ދެމެދުގެ 18 ޔޮޓަށް އެއްފަހަރާ ބަނދަރުކުރެވޭނެ ފްލޯޓިންގ ޕްލެޓްފޯމަކާއި މުހިންމު ހިދުމަތްތައް ގާއިމުކުރެވޭނެއެވެ. މީގެ އިތުރުން ރާއްޖެއިން ބޭރުން އަންނަ އުޅަނދުފަހަރަށް ފަސޭހައިން ޚިދުމަތް ދިނުމަށްޓަކައި އިމިގްރޭޝަނާއި ކަސްޓަމްސްގެ ކްލިއަރެންސް ހިދުމަތްތައް ވެސް މި މެރީނާގައި ގާއިމުކުރުމަށް ވަނީ ހަމަޖެހިފައެވެ.
މި މެރީނާގެ އޮޕަރޭޝަންތައް ހިންގުމަށާއި އިތުރަށް ތަރައްގީކުރުމަށް ޕާޓްނަރުން ހޯދުމުގެ މަސައްކަތް އެމްޕީއެލްއިން ކުރަމުންދާއިރު، މި މަޝްރޫއުގެ ތެރޭގައި ތަކެތި ފޯރުކޮށްދިނުމާއި (ޕްރޮވިޝަނިންގ)، މަރާމާތު ކުރުމުގެ ހިދުމަތް އަދި މެހެމާންދާރީގެ ދާއިރާއާ ގުޅޭ ވަސީލަތްތައް ޤާއިމުކުރުން ހިމެނެއެވެ. މިއީ ސަގާފީ ރިސޯޓް ފަތުރުވެރިކަމުގެ އިތުރުން، މެރިޓައިމް ދާއިރާ ފުޅާކޮށް އިޤްތިޞާދު ސިންދަފާތު ކުރުމަށް ސަރުކާރުން ގެންގުޅޭ ސިޔާސަތާ އެއްގޮތްވާ ގޮތުގެ މަތިން ކުރިއަށް ގެންދާ މަޝްރޫއެކެވެ.
އުލިގަމު ރައްޔިތުން ގިނަ ދުވަސްތަކެއް ވަންދެން ދެކެމުން އައި މި އުންމީދު ޙަޤީޤަތަކަށް ވުމުން، މެރިން ސަރވިސްތަކާއި ވިޔަފާރީގެ އެހެނިހެން ދާއިރާތަކުން ރަށަށާއި މުޅި އަތޮޅަށް ވަޒީފާގެ އައު ފުރުސަތުތައް ފަހިވެ، އިގްތިސާދީ ބޮޑު ކުރިއެރުމެއް ލިބިގެންދާނެއެވެ.
މި މަޝްރޫއަކީ އިހަވަންދިއްޕޮޅުގައި ބަންކަރިންގ ހިދުމަތް ފެށުމަށް ކުރެވޭ މަސައްކަތްތަކާ އެކު، ރާއްޖޭގެ އުތުރުގެ މެރިޓައިމް ވިއުގަ ވަރުގަދަކުރުމަށް އެޅޭ މުހިންމު ފިޔަވަޅެކެވެ. މަޝްރޫއުގެ ތާވަލާއި އިންވެސްޓްމަންޓް ޕާޓްނަރުން އަދި ޢަމަލީ މަސައްކަތްތަކާ ގުޅޭ އިތުރު މައުލޫމާތު ކުރިއަށް އޮތް މަސްތަކުގައި އެމްޕީއެލްއިން ހާމަކުރާނެ ކަމަށް ވަނީ ބުނެފައެވެ.
