އައްޑޫ ހައި ސްކޫލްގައި ކިޔަވައިދޭ ދަރިވަރެއްގެ ގައިގައި ބިދޭސީ ޓީޗަރަކު އިއްޔެ ޖަހައި މާރާމާރީ ހިންގި ކަމަށް ބުނާ ވާހަކަ ތަކާއި ގުޅޭ ތަފާތު މަޢުލޫމާތުތަކެއް ޚުލާސާ އަށް އެނގިއްޖެއެވެ.
ޓީޗަރު ޖެހި ކަމަށް ބުނާ ދަރިވަރު އަޚްލާގީ ޕްރޮގުރާމެއް ފުރިހަމަ ކުރަންދެން މިހާރު ސަސްޕެންޑް ކޮށްފައި ވާއިރު، ޚުލާޞާ އަށް އެނގިފައިވާ ގޮތުގައި ޓީޗަރުގެ ގައިގައި ފުރަތަމަ ޖެހީ ވެސް އެ ދަރިވަރެވެ. އަދި ޓީޗަރު އެ ދަރިވަރުގެ ގައިގައި ޖެހީ "ސެލްފް ޑިފެންސް" އަށް ކަމަށާއި، އެ ކުލާހުގެ ޙާލަތު "ވަރަށް ގޯސް" ކަމަށް ވެއެވެ.
އެނގިފައިވާ ގޮތުގައި އެތައް ދުވަހަކު އަޚްލާޤީ ގޮތުން ވަރަށް ދަށު ފެންވަރުގެ ކަންކަން އެ ކުލާހުން ފެނެއެވެ. ކުލާހަށް ވަތްއިރު ކުލާހުގެ ޕްރޮޖެކްޓަރުން ކޭބަލް ނައްޓައި ދަރިވަރުގެ ފޯނާއި ކަނެކްޓު ކޮށްގެން ބަރަހަނާ ވީޑިއޯ ބަލަން ހުރި ކަމަށާއި، ދެޖިންސުގެ ކުދިން އުޅޭ އެ ކުލާހުގެ ދަރިވަރުގެ އަތުން ފޯނު އަތުލައި ޓީޗަރުގެ ޖީބަށް ފޯނު ލުމުން ދަރިވަރު ޓީޗަރާއި ދިމާކޮށް ޓީޗަރުގެ ޖީބަށް އަތްކޮށްޕައި ހެދި ކަމަށް ވެއެވެ.
އައްޑޫ ހައި ސްކޫލްގެ ގްރޭޑް 12 އިގެ ކުލާހެއްގެ ތެރޭގައި ހިނގި ހާދިސާގައި ޓީޗަރުގެ ޖީބަށް ދަރިވަރު އަތް ކޮއްޕަނީ (ސްކްރީންޝޮޓެއް)
"އެއަށްފަހު ޓީޗަރާއި މާރާމާރީ ހިންގުމުން އޭނާގެ (ދަރިވަރުގެ) ލަފުގައި ހިފީމާ އޭނާ (ދަރިވަރު) ވެއްޓިގަތީ ކުލާސްތެރެއަށް ޓީޗަރާއި އެކީގަ… މިއީ ކަންތައް ވީ ގޮތަކީ"، ޚުލާޞާ އަށް މަޢުލޫމާތު ދެއްވަމުން އިތުބާރު ހުރި އެ ފަރާތުން ވިދާޅުވިއެވެ. "ބައެއް ދުވަސްދުވަހު އަންހެން ދަރިވަރުގެ ގޮނޑީގައި ވެސް އެ ބަ އިށީނދޭ. ގަޔަށް އަތްލާ އެބަ ހަދާ… ކޮންމެ ކުއްޖަކަށް ގޮނޑިއެއް ނުހުންނަނީތޯ..؟ މިއީ އެ ކުލާހުގެ ޙާލަތަކީ… އަންހެން ދަރިވަރުންނަށް އެއްވެސް ރައްކާތެރި ކަމެއް ނެތް”
އެނގިފައިވާ ގޮތުގައި ސަސްޕެންޑް ކޮށްފައިވާ ގްރޭދް 12 ގެ ދަރިވަރު ސަސްޕެންޑް ފިލާނީ "ޑިސިޕްލިން ޕްރޮގުރާމް" ފުރިހަމަ ކުރުމުންނެވެ.
