ލ. ގަން އިންޖީނުގޭގައި މިއަދު މެންދުރު ހިނގި އަލިފާނުގެ ހާދިސާގައި ގެއްލުންވެފައިވަނީ އިންޖީނުގޭގައި ބޭނުންކުރާ 5 އިންޖީނުގެ ތެރެއިން 1 އިންޖީނަށް ކަމަށާއި އެ އިންޖީނުގެއާ ގުޅިފައިވާ އަވަށްތަކަށް ކަރަންޓު އަނބުރާ ފޯރުކޮށްދިނުމުގެ މަސައްކަތް ކުރަމުންދާ ކަމަށް ފެނަކަ ކޯޕަރޭޝަނުން ބުނެފިއެވެ.

ގަން އިންޖީނުގޭގައި ރޯވީ މިއަދު މެންދުރުފަހު 14:50 ހާއިރު އެވެ. އަލިފާން ރޯވީ އިންޖީން ރޫމުގެ ޕެެނަލް ބޯޑެއްގައެވެ. އަލިފާން ރޯވެ އެ އިންޖީނުގެއާއި ގުޅިފައިވާ އަވަށްތަކުން ވަނީ ކަރަންޓު ކެނޑިފައެވެ. އެމްއެންޑީއެފް އިން ބުނިގޮތުގައި މި އަލިފާން ނިއްވާލެވުނީ 16:26 ހާއިރުއެވެ.

މިހާދިސާއާ ގުޅިގެން ފެނަކައިން މިރޭ ނެރުނު ބަޔާނެއްގައި ބުނީ ވީހާވެސް އަވަހަކަށް ރަށަށް ކަރަންޓު ފޯރުކޮށްދިނުމުގެ މަސައްކަތް ކުރަމުންދާ ކަމަށެވެ. އެގޮތުން މިރޭގެ ވަގުތެއްގައި ރަށުގެ ބޮޑު ބަޔަކަށް ކަރަންޓު ފޯރުކޮށްދެވޭނެކަމަށް ބެލެވޭކަމަށް އެ ކުންފުނިން ބުންޏެވެ.

ފެނަކައިން ބުނީ މި ހާދިސާގައި އަލިފާން ރޯވީ އެރަށުގެ 2 އެނެކްސްގެ ތެރެއިން އެއް އެނެކްސްގައި ކަމަށެވެ. އެނެކްސް 2 އަށް އަލިފާނުގެ އަސަރުކޮށްފައިނުވާ ކަމަށާއި ވިޝުއަލް އިންސްޕެކްޝަން އިން ފާހަގަވެފައިވާ ގޮތުން ގެއްލުންވެފައިވަނީ އެރަށް ކަރަންޓު ފޯރުކޮށްދޭން ބޭނުންކުރާ 5 އިންޖީނުގެ ތެރެއިން އެންމެ އިންޖީނަކަށް ކަމަށްވެސް ބުންޏެވެ.

އަދި މިހާދިސާގައި އިންޖީނުގެއަށާއި ޕެނަލްތަކަށް ލިބުނު ގެއްލުން ދެނެގަނެ އެ މައްސަލަ ހައްލުކުރުމުގެ މަސައްކަތް ކުރަމުންދާ ކަމަށް ފެނަކައިން ބުންޏެވެ.

އޭގެ އިތުރުން މިހާރު އެރަށަށް ފެނުގެ ހިދުމަތްދޭން ފަށާފައިވާ ކަމަށާއި އެރަށުގެ ނަރުދަމާ ނިޒާމުގައި އެއްވެސް މައްސަލައެއް އުޅޭތޯވެސް އެކަމަށް ހާއްސަ ޓީމަކުން ބަލަމުންދާ ކަމަށް ފެނަކައިން ބުންޏެވެ.