އައްޑޫ ސިޓީގައި އިއްޔެ ވިހެއުމުގެ ތެރޭގައި ނިޔާވި، އައްޑޫ ސިޓީ ކައުންސިލްގައި މަސައްކަތް ކުރާ މުވައްޒަފެއް ކަމުގައިވާ އާއިޝަތު ނަޒާހަތު އަހުމަދުގެ އާއިލާއަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެ އެވެ.

އެމަނިކުފާނު އެކްސްގައި ހިއްސާ ކުރެއްވި ޕޯސްޓެއްގައި ވިދާޅުވީ، އައްޑޫ ސިޓީގައި ވިހެއުމުގެ ތެރޭގައި ކުއްލި ހާލަތެއް މެދުވެރިވެ ޒުވާނަކު ނިޔާވުމަކީ ފުން ހިތާމައާއި ނުތަނަވަސްކަން އިހުސާސްކުރުވި ކަމެއް ކަމަށެވެ. އަދި އެ ޒުވާނާއަށް މާތްﷲ ޝަހީދެއްގެ ދަރަޖަ ދެއްވައި، ސުވަރުގޭގެ ދާއިމީ ނިއުމަތާއި ރަހުމަތުގައި ލެއްވުން އެދި އެމަނިކުފާނު ވަނީ ދުއާ ދަންނަވާ ކަމަށެވެ.

މީގެ އިތުރުން އެ މަރުހޫމާގެ ތުއްތު ދަރިފުޅަށް އަވަސް ޝިފާއެއް ދެއްވުމަށާއި މަރުހޫމާގެ އާއިލާއަށް ކެއްތެރިކަން މިންވަރު ކުރެއްވުމަށް އެދި ވެސް އެމަނިކުފާނު ވަނީ ދުއާ ދަންނަވައިފަ އެވެ.

ވިހެއުމުގެ ތެރޭގައި އިއްޔެ ނިޔާވެފައި ވަނީ އައްޑޫ ސިޓީ ކައުންސިލްގައި މަސައްކަތް ކުރާ މުވައްޒަފެއް ކަމުގައިވާ އާއިޝަތު ނަޒާހަތު އަހުމަދު އެވެ. ނަޒާހަތު ނިޔާވުމާއި ގުޅިގެން އައްޑޫ ސިޓީ މޭޔަރުވެސް އޭނާގެ އާއިލާއަށް ތައުޒިޔާ ވިދާޅުވެފައިވެ އެވެ.