ރަހީނުންގެ ހަށިގަނޑުތަކޭ ކިޔައި ޙަމާސް އިން އިސްރާއީލަށް ދިނީ ނުބައި މީހުންގެ ހަށިގަނޑު ކަމަށް ބުނެ އިސްރާއީލުން ދޮގު ހަދައި ޣައްޒާ އަށް އިތުރު ޙަމަލާތަކެއް ދިން އިރު، ޙަމާސް އިން ދިނީ ރަނގަޅު ހަށިގަނޑުތަކެއް ކަމަށް ފޮރެންސިކް އެކްސްޕާޓުން ކަށަވަރު ކޮށްފިއެވެ.
ޙަމާސް އިން ރެޑް ކްރޮސް އާއި ޙަވާލު ކުރި ހުރިހާ ހަށިގަނޑުތަކަކީ ވެސް ރަހީނު ކޮށްފައި ހުއްޓާ އިސްރާއީލުން އެ މީހުން ތިބި ތަންތަނަށް ދިން ބޮމުގެ ޙަމަލާ ތަކުގައި މަރުވި މީހުންގެ ހަށިތައް ކަމަށް ޙަމާސް އިން ބުންޏެވެ.
ނަމަވެސް ޔަހޫދީ ސަރުކާރުން ވަނީ އޭގެތެރެއިން ބައެއް ހަށިތައް އެއީ 7 އޮކްޓޯބަރު 2023 ގައި ޙަމާސް އިން ރަހީނުކުރި މީހުންގެ ހަށިތަކެއް ނޫން ކަމަށް ބުނެ، ޙަމާސް އިން ހަނގުރާމަ ހުއްޓާލުމުގެ އެއްބަސްވުމާއި އެއްގޮތަށް ރަހީނުން މިނިވަންކުރުމުގެ އެއްބަސްވުމަށް ޢަމަލު ނުކުރާ ކަމަށް ބުނެފައެވެ. އަދި އެކަމުގެ ބަދަލެއްގެ ގޮތުން އިސްރާއީލުން ޣައްޒާއަށް ޙަމަލާދީ 200 އެއްހާ މީހުން ޝަހީދުކޮށްލިއެވެ.
ޔަހޫދީންގެ ވާހަކަތައް ދޮގުކޮށް ޙަމާސް އިން އިތުރަށް ޗެކުކުރުމަށް ރެޑްކްރޮސް މެދުވެރިކޮށް ޔަހޫދީ ސަރުކާރުގައި އެދުމުން، ފޮރިންސިކް އެކްސްޕާޓުން ވަނީ ރެޑްކްރޮސްގެ ބެލުމުގެ ދަށުން އަލުން އެ މީހުންގެ ދަތްތަކާއި އެ މީހުންގެ ޢާއިލާގެ މީހުންގެ ދަތްތަކުން ސާމްޕަލް ނަގައި ޑީއެންއޭ ޓެސްޓު ކޮށްފައެވެ. އެއާއި އެކު އެއީ ސީދާ އިސްރާއީލްގެ ރަށްވެހިން ކަމަށް ކަށަވަރުވެ، އަދި އެ މީހުންނަކީ 7 އޮކްޓޯބަރު 2023 ވަނަ އަހަރު ޙަމާސް އިން ރަހީނުކުރި ޔަހޫދީންގެ ހަށިތައް ކަމަށް ވެސް ކަށަވަރުވެ، ޔަހޫދީ ސަރުކާރު ބޭޒާރުވީއެވެ.
