ރާއްޖޭގެ ރަށްތަކަށް ކުރައްވަމުން ގެންދަވާ ސިލްސިލާ ދަތުރުފުޅުގެ ތެރެއިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދާދި ދެންމެ ފުވައްމުލައް ސިޓީ އާއި އައްޑު އަތޮޅަށް ދެދުވަހުގެ ދަތުރުފުޅަކަށް ފުރާ ވަޑައިގެންފިއެވެ.

ރައީސުލްޖުމްހޫރިއްޔާގެ އަރިހުގައި ސަރުކާރުގެ ވަޒީރުންނާއި އިސް އޮފިޝަލުން ބައިވެރިވެވަޑައިގެންނެވި އިރު، އައްޑޫ އަށް އެމަނިކުފާނު މި ކުރައްވާ ދަތުރުފުޅު ދިމާވެފައި މިވަނީ ހުޅުދޫ އާއި މީދޫ އަކީ އައްޑޫ ސިޓިން ވަކިވެ، މީހުން ދިރިއުޅޭ ވަކި ދެރަށެއްގެ ގޮތުގައި ހަމަޖެހިފައިވާ ދަނޑިވަޅެއްގައެވެ.

އައްޑޫ ރައްޔިތުންގެ ތެރެއިން މި ދެންނެވި ދެރަށުގެ ރައްޔިތުން ވެސް ބޭނުން ވަނީ ޒިންމާދާރު ކައުންސިލެއްގެ ދަށުގައި ރަށުގެ ތަރައްޤީއަށްޓަކައި، ހިތަދޫގައި މަސައްކަތް ކުރުމުގެ ބަދަލުގައި އަމިއްލަ ރަށުގައި ކައުންސިލަރުން މަސައްކަތް ކުރުމަށެވެ.

ރައީސުލްޖުމްހޫރިއްޔާގެ މި ދަތުރުފުޅުގައި ފުވައްމުލައް، އައްޑޫ ސިޓީގެ ހިތަދޫ، މަރަދޫ، މަރަދޫފޭދޫ، ފޭދޫ، ހުޅުދޫ، އަދި މީދޫ އަށް ވަޑައިގެން ކައުންސިލް ތަކާއި އަދި އަންހެނުންގެ ތަރައްޤީ އަށް ބޭނުންވާ ކަންކަމުގެ އިތުރުން ރައްޔިތުން އެންމެ އެދޭ ކަންކަމާއި ބެހޭ ގޮތުން ގާތުން މަޝްވަރާ ކުރައްވައި ރައްޔިތުންގެ ޙާލު ބައްލަވާނެ ކަމަށް ރައީސް އޮފީހުން ބުނެއެވެ.

ރާއްޖޭގެ މި ފަހުގެ ތާރީޚުގައި މީހުން ދިރިއުޅޭ ހުރިހާ ރަށަކަށް ވަޑައިގެން ރައްޔިތުންނާއި ގާތުން ބައްދަލުކުރެއްވި ހަމަ އެކަނި ރައީސަކީ ވެރިކަމުގެ ތިންވަނަ އަހަރަށް ގުނަމުންދާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.